ەلباسى، "نۇروتان" پارتياسىنىڭ ءتوراعاسى ن.ن.نازاربايەۆقا،

"نۇروتان" پارتياسى ءتوراعاسىنىڭ ورىنباسارى ب.ق.بايبەككە،

قر پرەمەر-ءمينيسترى ك. ءماسىموۆكە،

باس پروكۋرور ا.داۋىلبايەۆقا،

قارجى ءمينيسترى ب.ت. سۇلتانوۆقا،

ءماءجىلىس دەپۋتاتتارى:

ر.حالمۇرادوۆقا،

ن.سابيليانوۆقا،

و.اسانقىزىنا،

م.بەگەنتايەۆكە،

ءتاۋەلسىز ب ا ق ءوكىلدەرىنە،

ءجانە  قازاق ءتىلى قولدانىستان ءمۇلدە شىعىپ جاتقانىنا الاڭداۋشى حالىققا

مەن، بەيسەنباي تەگى ر.ز.، جوبالاۋ سالاسىنداعى جەكە كاسىپكەرمىن. بىلتىر مەملەكەتتىك ساتىپ الۋلارعا قاتىسام دەپ، مەملەكەتتىك ساتىپ الۋ پورتالىنان قازاق ءتىلدى اقپارات الا الماۋىم سەبەپتى ۇزاق «سوعىستىڭ»، پرەزيدەنتتەن باستاپ بۇكىل رەسپۋبليكاعا جاريا ەتەم دەگەن "شانتاجدىڭ" ارقاسىندا عانا قاتىسا الدىم.

ماعان دا كۇنكورىس كەرەك. ءبىراق، بارشا قازاق كۇنكورىس دەپ، انا ءتىلىمىزدى، مەملەكەت ءتىلدى شەتتەتكەندىكتەن وسىنداي قورلىق، كۇلكىلى جاعدايدا وتىرمىز عوي!

وتكەن اپتادا، مەملەكەتتىك ساتىپ الۋعا قاتىسپاق بولعانىمدا، سايتتان قازاق تىلىندە 3 كۇن مالىمەت الا المادىم. نە قازاقشا پاراقشاسى ىستەمەيدى، ۋلاتىپ - شۋلاتىپ (ءجاي، مەملەكەتتىك ساتىپ-الۋلاردا مەملەكەت ءتىلى تۇرۋى كەرەك، جانە ءبىرىنشى تۇرۋى كەرەك دەگەنگە ەشكىم قۇلاق اسپايدى) ونى ىستەتكەنىمشە، تەحنيكالىق قولداۋ قىزمەتى، استانا قالاسى 72-90-90 تەلەفونداعى قىزمەتىنىڭ تەك قانا ورىس تىلىندەگى اۆتووتۆەچيگى تۇرعانى بىلاي تۇرسىن، تەلەفوندى  الاتىن وپەراتور مىندەتتى تۇردە: «زدراستۆۋيتە، ... سلۋشاەت، چەم موگۋ پوموچ؟» دەيدى. قازاق ءتىلىنىڭ ءيىسى دە اڭقىمايدى! قازاق ءتىلدى وپەراتورعا قوس دەسەڭ، تاعى 15-20 مينۋتتاي توسۋىڭ كەرەك. ويتكەنى ولاردىڭ ايتۋىنشا قازاق ءتىلدى وپەراتورلار از! ولاردىڭ رەگلامەنتى بويىنشا، كەشىرىڭىزدەر، «ءبىسمىللاسى» ورىسشادان باستالۋى كەرەك! ايتپاقشى ورىس تىلىندە «ۆاش زۆونوك، وچەن ۆاجەن دليا ناس، ۆرەميا ۆاشەگو وجيدانيا 31 مينۋتا!» دەگەن اۆتووتۆەچيك سارىنىن، ۇستىنە 7-10 مينۋتتاي قوسىلاتىن ۇستەمەمەن تىڭدايسىڭ! 10-شاقتى رەت قوڭىراۋلاتقانىمدا، ەڭ از بەرگەن ۋاقىتى 15 مين. بولدى. ارينە، ول دا قوسىمشا ۋاقىتپەن. مۇمكىن وسىلايشا ءبىزدىڭ ۋاقىتىمىزدان (تەحنيكالىق كومەك كورسەتەتىن جۇمىسكەرلەردى كوبەيتپەۋ ارقىلى) كومپانيا ەكونوميا دا جاساپ وتىر...

مەملەكەتتىك ساتىپ الۋلارداعى تەحنيكالىق كومەك، بىلۋىمشە قارجى مينيسترلىگىمەن كەلىسىم-شارت ارقىلى جاسالادى. سوندا اتالمىش مينيسترلىككە (ەستۋىمشە بۇعان جاۋاپتى باحمۋتوۆا حانىم) قازاق ءتىلدى ميكروبيزنەستى (مىندا قانداي بيزنەس ەكەنى ءماندى دە ەمەس) تۇقىرتۋ، ونى كونكۋرستارعا قاتىستىرماۋ ماقسات پا؟ بولماسا نەلىكتەن وسىنداي ماسقارا كومپانيامەن كەلىسىمگە وتىرعان؟ بىلتىر دا وسى جونىندە بىرنەشە رەت مينيسترلىككە دە، باس پروكۋراتۋراعا دا تەلەفون شالعانمىن.

بىلتىردان بەرى تۇزەتۋگە بولار ەدى عوي! بىلتىر، باس پروكۋراتۋرانىڭ بيزنەستى قولداۋ جونىندەگى سترۋكتۋراسىندا قازاق ءتىلدى ادام وتىرعان. بيىل ەلدەگى زاڭداردىڭ دۇرىس اتقارۋىلۋىن قاداعالايتىن باس پروكۋراتۋرا وكىلى اديلبەكوۆ مىرزادان مىناداي جاۋاپ الدىم(تەل:30-18-23):«سلۋشايۋ» دەپ باستاپ، «مەن قازاقپىن» دەگەن سوزىمە ورىسشا: «كتو تاكايا، پرەدستاۆتەس»  دەدى. 71-25-85، 77-31-11، 71-26-20 باس پروكۋراتۋرانىڭ مەن قوڭىراۋلاتقان وسى تەلەفوندارىن كوتەرگەندەر تەك كورشى مەملەكەتتىڭ مەملەكەتتىك تىلىندە جاۋاپ بەرىپ وتىردى: «سلۋشايۋ ۆاس»، «پريەمنايا»، ت.س.س. كەيبىرۋلەرى عانا: «ءبىز بىلمەيمىز عوي، كىم قوڭىراۋ شالىپ تۇرعانىن، سوندىقتان ورىسشا ايتامىز» دەيدى.

مىندا كونستيتۋسيادان باستاپ، تىلگە قاتىستى زاڭدار 100 پايىز بۇزىلىپ وتىرعانىن ايتپاعاندا، عاسىرلار بويى (سوڭعى 300 جىل) قازاق ءتىلىنىڭ تۇقىرتىلۋىنا قارسى تۇرعان، ءار كەزدەگى ەل باسىندا بولعان تۇلعالارىنىڭ جۇرناعى دا جوق پا ەل بيلىگىندە؟ سىزدەرگە ورىس تىلىنە سوعىس اشىڭدار دەگەن ەشكىم جوق! ءبىراق قازاق ءتىلىن زاڭ بويىنشا پايدالانۋلارىڭىزدى تالاپ ەتەمىن!

جازعاندارىما بايلانىستى دالەلدەمە سكيندار، اۋديوجازبالار قولىمدا بار.

جالعاسى: حاتتىڭ جازىلۋ بارىسىندا بەلگىلى بولعانداي، مەملەكەتتىك ساتىپ الۋلار سايتىنا، كونكۋرستىڭ كودى مەن اتاۋىن سامۇرىق-قازىنا كومپانياسى قويادى ەكەن. اتالمىش كومپانيا سولاردى (مەملەكەتتىك ساتىپ الۋلار سايتىنىڭ قازاقشاسىنا) اتاۋلارىمەن كودىن ورىسشا قويعان. بۇلار نەگە بۇاي ىستەپ جاتىر دەپ، بايلانىسقا شىقپاقشى بولىپ، SK.KZ سامۇرىق-قازىنا كومپانياسىنىڭ سايتىنا كىردىم. قازاق تىلىندەگى اقپارات تۇرماق وعان سىلتەمە دە جوق!

بارشامىز بىلەتىندەي، وسى كومپانيانىڭ باسشىسى، قاتەلەسپەسەم -ت.كۋليبايەۆ. قۇرمەتتى ەلباسى، ءسىز ءار سايتقا كىرە بەرمەيتىن شىعارسىز. دەگەنمەن قازاقستان مەملەكەتىنىڭ قازىناسى شوعىرلانعان ۇلكەن كومپانيانىڭ باسىندا وتىرىپ، مەملەكەت تىلىنە ورىن قالدىرماعان «سامۇرىق-قازىنانىڭ» سايتىنا ءبىر قاراڭىزشى...  ەستۋىمشە كومپانيا ءوز جۇمىسىن تولىعىمەن ورىس تىلىندە جۇرگىزەدى. سوندا بۇل مەكەمە اتا زاڭعا، ق ر تىلدەر تۋرالى زاڭىنا پىسقىرمايتىن بولعانى ما؟ الدە مەكەمە باسشىسى كورشى مەملەكەتتىڭ ءلوببيى مە؟