ەلوردا اتاۋىن وزگەرتۋ ەلباسى ساياساتىنىڭ مىزعىماستىعىنىڭ جارقىن كورىنىسى. بۇل تۋرالى «Nur Otan» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ دەموكراتيالىق كۇشتەردىڭ «قازاقستان-2050» جالپىۇلتتىق كواليسياسىنىڭ كەزەكتى وتىرىسىندا ايتتى دەپ حابارلايدى Qamshy.kz اقپارات اگەنتتىگى.

الدىمەن ول ەلباسى قاشاندا ەل مەن حالىقتىڭ مۇددەسىن ءبىرىنشى كەزەككە قويىپ، ءاردايىم دۇرىس شەشىمدەر قابىلدايتىنىنا نازار اۋداردى.

– قازاقستان حالقى ءۇشىن تۇڭعىش پرەزيدەنتىمىزدىڭ ەسىمى ءاردايىم مەملەكەتتىلىك، ەگەمەندىك جانە تاۋەلسىزدىك سياقتى اسا ماڭىزدى قۇندىلىقتارمەن ءبىر قاتاردا تۇرادى. ءقازىردىڭ وزىندە ەلباسىنىڭ ەسىمى تاۋەلسىز مەملەكەتىمىزدىڭ نەگىزىن قالاۋشى، بارلىق رەفورمالاردىڭ اۆتورى، الەمدىك دەڭگەيدەگى ساياساتكەر رەتىندە تاريحىمىزعا التىن ارىپتەرمەن جازىلاتىنى ءسوزسىز، – دەدى ماۋلەن اشىمبايەۆ.

سونداي-اق ول وتىرىستا تالقىلانعان استانامىزدى نۇر-سۇلتان قالاسى دەپ قايتا اتاۋ ماسەلەسى تۋرالى ءسوز قوزعاپ، ونىڭ ماڭىزى تۋرالى ايتتى.

– ەلوردا اتاۋىن وزگەرتۋ ەلباسى ساياساتىنىڭ مىزعىماستىعىنىڭ جارقىن كورىنىسى. باس قالامىزعا تۇڭعىش پرەزيدەنتىمىزدىڭ ەسىمىن بەرۋ ارقىلى ءبىز بارشا قازاقستاندىقتار مەن حالىقارالىق قاۋىمداستىققا ەلىمىزدىڭ دامۋ جولىندا ەلباسى ساياساتى ودان ءارى جالعاساتىنىن كورسەتەمىز. سوندىقتان بۇل شەشىمدى قولداي وتىرىپ، مۇنداي ماڭىزدى قادامدى حالىقتىڭ ەلباسىنىڭ تاۋەلسىز قازاقستاننىڭ نەگىزىن قالاپ، استانامىزدى سالۋداعى ەرەن ەڭبەگىنە كورسەتكەن زور قۇرمەتى دەپ قابىلدايمىز، – دەدى ماۋلەن اشىمبايەۆ.

وتىرىسقا كواليسيا مۇشەلەرى: ەلدەگى جەتەكشى پارتيالاردىڭ باسشىلارى، پارلامەنت دەپۋتاتتارى، قازاقستان حالقى اسسامبلەياسىنىڭ، كاسىبي جانە قوعامدىق بىرلەستىكتەردىڭ وكىلدەرى قاتىستى. ءىس-شارا سوڭىندا بارشا قازاقستاندىقتاردى قازاقستاننىڭ تۇڭعىش پرەزيدەنتى ايقىنداعان ەلدىڭ ستراتەگيالىق باسىمدىقتارىنا سوزبەن دە، ىسپەن دە تولىق قولداۋ كورسەتۋگە جانە ەلباسىنىڭ تاۋەلسىزدىكتى كۇشەيتۋگە، ەلدى جۇيەلى جاڭعىرتۋعا، سونداي-اق، ءاربىر قازاقستاندىقتىڭ ءال-اۋقاتىن ارتتىرۋعا باعىتتالعان ساياساتىن بىرلەسىپ جالعاستىرۋعا، استانامىزدىڭ اتاۋىن وزگەرتۋ تۋرالى تاريحي شەشىمگە ءۇن قوسۋعا شاقىرعان ۇندەۋ قابىلداندى.

ۇسىنعان: گۇلىم جاقان