قازاق شوۋ-بيزنەسىنىڭ تارتىمدى جىگىتى، كوپتەگەن قىزداردىڭ ارمانىنا اينالعان، جۇلدىزدار اراسىنداعى سپورتشىلاردىڭ ءبىرى تاۋەكەل ءمۇسىلىم 1show.kz جۋرنالىنا بەرگەن سۇحباتىندا ومىرلىك تالابىمەن دە تالعامىمەن دە ءبولىستى.
- تەلەارناعا دەيىنگى ءومىرىڭىز جايلى ءبىراز بايانداپ بەرسەڭىز؟
- مەنىڭ وتباسىم ۇلكەن ەمەس. ءوزىم جانە اپكەم. بۇگىندە اپكەم تۇرمىس قۇرعان، ەلورداسى استانا قالاسىندا تۇرىپ جاتىر. ال انام ەكەۋىمىز الماتى قالاسىندا تىرشىلىگىمىزدى جاساپ جاتىرمىز. ءبىلىم جولىنا كەلەتىن بولساق، مۇقاعالي ماقاتايەۆ اتىنداعى مەكتەپتى ءتامامداپ، باكالاۆر ماماندىعى، ينجەنەر-مەحانيك كاسىبى بويىنشا ق. ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتىنە وقۋعا ءتۇستىم. كەيىن عىلىم جولىن قۋىپ، ماگيستراتۋرادا ءىلىم الدىم.
- ءسىزدىڭ شىعارماشىلىق جولىڭىز جارنامادان باستالعانى ءمالىم، جاۋاپكەرشىلىگى مول كاسىپتى يگەرۋ وڭاي بولدى ما؟
- يا، شىنى كەرەك، بۇل جول كىشىگىرىم جارنامادان باستالدى. بيلبوردتارعا، فوتو جارنامالارعا، ۋاقىت وتە كەلە، روليكتەرگە دە تۇسە باستادىم. ءتىپتى بەينەبايانعا ءتۇسىپ تە ۇلگەردىك. وسىنداي دارەجەگە جەتۋ وڭاي بولعان جوق. باستاپقى جۇرگىزگەن «ەل ارنا» تەلەارناسىنداعى «ءان ارنا» باعدارلاماسى بولدى. العاش جارىققا شىققان تۇسىرىلىمدەردى قاراپ، بىردەن قاتەلىكتەرىمدى ەسكەرۋگە تىرىستىم. مۇرات ابدەلبايەۆ ساحنا ءتىل جاعىنان دايىنداپ، شەشەن سوزگە ءۇيىر بولۋعا كومەگىن تيگىزگەن ەدى. وسىنداي قيىنشىلىقتارمەن كۇرەسىپ، قازىرگى تاڭدا «حابار»، «حيت تۆ» ارنالارىندا باعدارلاما جۇرگىزۋشىسى رەتىندە تانىلىپ جۇرگەن جايىم بار. دەگەنمەن، تەلەارنانىڭ قىر-سىرىن جەتىك مەڭگەردىم، دەپ ايتا المايمىن. ءالى دە ەڭبەكتەنىپ، كۇش جۇمساۋ قاجەت.
- اكتەرلىك جولىڭىزدا قانداي ءرول كوڭىلىڭىزدەن شىقتى؟
- نەگىزى، 2008 جىلدان باستاپ اكتەرلىككە اياق باستىم. شاعىن ەپيزودتاردان كورىنە باستادىم. ازىرشە، باستى ءرولدى سومداعان تەلەحيكايانىڭ ءبىرى «ماحاباتىم جۇرەگىمدە». سەنارييدى قولعا العان ساتتەن باستاپ، بىردەن تەرەڭ ءۇڭىلدىم. نەگە دەسەڭىز، ونداعى داستاننىڭ وبرازى ءوزىمنىڭ شىنايى ومىردەگى كەيپىمە، كوزقاراسىما ءدال كەلەتىنىن ءتۇسىندىم. ءتىپتى سپورتقا دەگەن قۇمارلىعى ءوزىمدى ايقىن كورسەتتى، دەپ ايتا الامىن. ال، الداعى ۋاقىتتا ەر-ازامaتقا ءتان كەيىپكەرلەردىڭ ءرولىن سومداعىم كەلەدى. حان، باتىر، جاۋىنگەرلىك جانرلارعا دا ءتانتىمىن. جان-جاقتى دامۋ ماقساتىندا كەز-كەلگەن رولدەردى ويناعان ابزال بولار. ءقازىر بۇل باعىتتا ونەرىمدى شىڭداپ جاتىرمىن.
- كۇندەلىكتى ومىردە قانداي ستيلدە كيىنگەندى ۇناتاسىز؟
- جاسقا ساي كيىنگەن دۇرىس دەپ ەسەپتەيمىن. ەسەيە كەلە، كلاسسيكاعا بەت بۇرۋعا تۋرا كەلەدى. ماڭىزدى كەزدەسۋلەرگە كوستيۋم كيىپ، شارۋالارىممەن جۇرگەن ۋاقىتتا كەجۋال ستيلىندە كيىنگەندى ۇناتامىن. دەمالىس كۇندەرى جانىما جاقىن سپورتتىق ۇلگىدە كيىنگەندى قالايمىن. وزىمە جاعىمدى ءيىس تابا المادىم. تۇراقتى قولداناتىن ءيىس سۋىم جوقتىعىن جاسىرمايمىن. دەگەنمەن، كوڭىلدەن شىعاتىن ءيىس سۋلار بار. ولار: Christian Dior-Absolute Fahrenheit، Cartier جانە ءقازىر قولدانىپ جۇرگەن Bleu de Chanel. اۆتوكولىككە كەلەتىن بولساق، ءار ەر جىگىتتىڭ السىزدىگى دەپ بىلەمىن. الدىندا «تويوتا كامري» ءمىنىپ ءجۇردىم. كەيىن پروديۋسەرىم جاننا ابۋوۆا ۇلكەن اۆتوكولىك «دجيپ» ساتىپ الىپ بەردى. «جاقسىعا تەز ۇيرەنىپ الاسىن» دەمەكشى، اتالمىش كولىكتەن ارتىعىن كەزدەستىرمەگەنىمە سەنىمدىمىن (كۇلىپ).
- شوۋ-بيزنەسكە كەلۋگە ءماجبۇر بولدىڭىز با؟ الدە ءان ايتۋ ونەرىڭىز بۇرىننان بار ما؟
- مەكتەپ قابىرعاسىندا وقىپ جۇرگەن كەزىمدە فۋتبولشى نەمەسە كاسىپكەر بولامىن دەگەن ويلار بولعاندى. ناقتى ءبىر مامان يەسى بولۋعا تالپىنعان ەمەسپىن. ەڭ باستى جەتكىلىكتى، ءوز كۇنىمدى كورە السام دەپ، ۇنەمى ويلايتىنمىن. مودەل بيزنەسىنە كەلمەس بۇرىن، مىنەزىم وتە تۇيىق، ۇياڭ بولاتىنمىن. كوپتى كورگەن، كوپ بىلەتىن ادامداردىڭ اراسىندا ءجۇرۋ، مەن ءۇشىن ءبىر ۇلكەن ساباق بولدى. تۇلعا بولىپ قالىپتاۋىسۋما ءبىراز اسەرىن تيگىزدى، دەپ ايتا الامىن. -بيزنەسكە كەلۋگە ەشكىم ماجبۇرلەگەن جوق. نەگىزى، جاستايىمنان ءان ايتۋعا قۇمارمىن. ءجاسوسپىرىم كەزىمدە «Super star.kz» بايقاۋىنا كۇنى-تۇنى دايىندالىپ، ەندى قاتىسۋعا بەل بۋعاندا، داۋسىم وزگەرىسكە ۇشىرادى. ءان جولىنا كەلگەنىمە ءبىر جىل بولدى. انشىلىككە جەتپەيتىن قىرلارىم بارشىلىق. جان-تانىمەن ءان ايتىپ ۇيرەنۋ كەرەك. داۋىس دەگەن زور كۇشكە يە ەكەنىن ءتۇسىندىم. ءقازىر داۋىستى اشۋ ۇستىندەمىز. بولاشاقتا بۇل سالانى دا مەڭگەرىپ، ونەرىمدى پاش ەتسەم دەيمىن.
- جاڭا بەينەبايانىڭىز قايدا ءتۇسىرىلدى؟ كوپ ۋاقىت الدى ما؟
- بۇگىنگى تاڭدا قورجىنىمدا ءۇش بەينەبايانىم بار. بارلىعى دا الماتى قالاسىندا ءتۇسىرىلدى. سوڭعىسىن ايتاتىن بولساق، الماتى ماڭايىنداعى بەلگىلى دەمالىس ورنىن تاڭداپ، تاڭ اتا جۇمىسقا كىرىسىپ، ءبىر تاۋلىك ۋاقىتىمىزدى العان بولاتىن. سيۋجەتتىڭ تاقىرىبىنا بايلانىستى بولار، قىسقى ۋاقىتتا ءتۇسىرىلىم جاساۋ قيىنعا سوقتى. دەگەنمەن، جەمىسىن كورىپ كەلەمىز.
- توي-بيزنەسكە قاتىسىڭىز بار ما؟ ءسىزدىڭ جەكە كوزقاراسىڭىز قانداي؟
- توي-بيزنەسكە ەش قاتىسىم جوق. كوپشىلىك مەنى ءانشى رەتىندە قابىلداي الماي جاتقانى كورىنەدى (كۇلىپ). ساحنادان، كامەرادان تىس اتاۋلى كەشتەرگە بايلانىستى ماسەلەلەردى جاننا حانىممەن شەشىمگە كەلگەن ءجون بولادى. دەگەنمەن، توي بيزنەسكە بەت بۇرمايمىز دەگەن ويدامىن. ءبىزدىڭ ماقساتىمىز بۇگىنگى دارەجەدەن اسىپ، ەليتاعا جاقىن بولۋ. ول كىسىنىڭ توي-دۋمانعا ارنالعان 10-نان استام جوباسى بار. سول ورتادا تانىلىپ جۇرگەن توپتارمەن تىعىز بايلانىس ورناتۋدا. توي بيزنەس تابىس كوزى بولىپ سانالاتىندىقتان، ءوز باسىم كەلىسەمىن. ءبىراق ءوزىم بۇل ورتاعا اياق باسپايمىن. بىزگە التىن ۋاقىتىڭىزدى ءبولىپ، ساۋالدارىمىزعا جاۋاپ بەرگەنىڭىز ءۇشىن كوپ راحمەت! سىزگە دە راحمەت!
اۆتور: سالتانات گابباس
