مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىندا اراعا 52 جىل سالىپ، «قارا قىپشاق قوبىلاندى» داستان-دراماسى قايتا ساحنالاندى. قويىلىمنىڭ رەجيسسەرى – قازاقستاننىڭ ەڭبەك سىڭىرگەن قايراتكەرى نۇرقانات جاقىپباي دەپ جازادى Qamshy.kz اقپارات اگەنتتىگى anatili.kazgazeta.kz سايتىنىڭ دەرەگىن نەگىزگە الىپ.
قويىلىمنىڭ اكتەرلىق قۇرامىنىڭ ەرەكشەلىگى – جاستار مەن تاجىريبەلى ساحنا ساڭلاقتارىنىڭ بىرىكتىرىلۋى. بۇل سپەكتاكلگە اكتەرلىق قۇراممەن كۇنى-تۇنى دايىندىق جۇرگىزگەنىن ايتقان رەجيسسەر جاستارعا باسىمدىق بەرىلگەنىن اتاپ ءوتتى.
– سپەكتاكلدىڭ اكتەرلىك قۇرامى تەاتر باسشىلىعىمەن كەلىسە وتىرىپ تاڭدالدى. بيىل 2019 جىل «جاستار جىلى» بولعاندىقتان، باسشىلىقتىڭ تالابى جاستاردى ساحنادا كورۋ بولدى. بۇل وي ماعان وتە ۇنادى. بولاشاق جاستاردىكى. جاستار وسىنداي ۇلكەن مەكتەپتى كورىپ ارى قاراي دامۋى كەرەك. كەشەگى اكتەرلەر ەرتەڭ وسى تەاتردى العا سۇيرەيدى دەپ سەنەمىن، – دەدى ن.جاقىپباي.
بۇل قويىلىمنان جاس اكتەرلاردىڭ شىڭدالىپ، تاجىريبە جيناقتاپ كەلە جاتقانىن كورۋگە بولادى. ايتا كەتسەك، قوبىلاندى ءرولىن جاس اكتەر – عالىمبەك وسپانوۆ، قۇرتقا ءرولىن – قازاقستان جاستار وداعى «سەرپەر» سىيلىعىنىڭ لاۋرەاتى ءلاززات قالدىبەكوۆا، قاراماندى – ماعجان اساۋباي سومدادى. سونىمەن بىرگە ساحنا مايتالماندارى ايدوس بەكتەمىر، بولات ءابدىلمانوۆ، دۋلىعا اقمولدا، نازگۇل قارابالينا، بايان قاجىنابييەۆا سىندى اكتەرلار ونەر كورسەتتى.
ساحنانى دەكوراسيامەن كوركەمدەگەن قويۋشى سۋرەتشى – مۇرات ساپاروۆ. ونىڭ قولتاڭباسى شىعارمانىڭ كورەرمەنمەن بايلانىسىنا ىقپال ەتتى.
– قوبىلاندىنىڭ بىزگە جەتكەن 29 نۇسقاسى بار. ءبىز قويعان نۇسقا مۇحتار اۋەزوۆتىكى. سەبەبى جازۋشى ساحنالىق نۇسقاسىن دايىنداعان. قويىلىم كورەرمەننىڭ كوڭىلىنەن شىقپاسا، تەلەفون شۇقىلاپ وتىرادى، كەتىپ قالادى. ال كەشەگى قويىلىمدا جاستار كوپ بولدى. جاستارعا ۇناسا وتە جاقسى. جاستار نازارىن ءقازىر ينتەرنەتتەن، تەلەفوننان تەاترعا اۋدارۋ وتە قيىن. ەكى ساعات قويىلىمدى كورىپ وتىرۋ وڭاي ەمەس، اسىرەسە جاس بۋىنعا. ءبىراق كەشە كورەرمەن جاقسى قابىلداعانىن بايقادىم، – دەيدى قويىلىمنىڭ قويۋشى سۋرەتشىسى م.ساپاروۆ.
قويىلىمدى قويۋ ءۇشىن بارلىق مۇمكىندىكتەر قولدانىلعان. جوعارى كوتەرىلىپ-تۇسەتىن ساحنا، شەڭبەردىڭ اينالۋى، قوبىلاندىنىڭ ۇشاتىن تايبۋرىل اتى… تاعىسىن تاعى دەگەندەي. جاڭا قويىلىمدا تايبۋرىلدىڭ ءوزى نەگىزگى كەيىپكەرگە اينالعان. ال كوكلان شىعارمادا جاعىمسىز كەيىپكەر بولسا، ول قويىلىمدا ءوز تراگەدياسى بار، ماڭگى جاسايتىن كورىپكەل بەينەسىندە سومدالىپتى.
1967 جىلى ەكىنشى رەت قويىلىپ، ساحنادا ۇزاق جۇرگەن پەسانىڭ سوزدەرى سول قالپىندا ساقتالعان. دەگەنمەن، جاڭا قويىلىم قازىرگى زامانعا لايىقتالىپ بەرىلدى.
ايتا كەتەيىك، قويىلىم العاش رەت 1946 جىلى قاپان بادىروۆتىڭ، ال 1967 جىلى ءازىربايجان مامبەتوۆتىڭ رەجيسسەرلىگىمەن قويىلعان. اراعا 52 جىل سالىپ قايتا قويىلعان پەسا ەندى اكەمتەاتردىڭ رەپەرتۋارىنان بەرىك ورىن العان.
ۇسىنعان: اسەل بولات قىزى
