الاتاۋدىڭ باۋرايىنداعى الىپ شاھار الماتىنىڭ ىرگەسىندەگى «دوستىق ۇيىندە» بۇۇ-نىڭ 6 تىلىنە اۋدارىلعان قازىرگى قازاق ادەبيەتى انتولوگيالارىنىڭ تانىستىرىلىمى بولىپ ءوتتى دەپ جازادى Qamshy.kz اقپارات اگەنتتىگى turkystan.kz سايتىنىڭ دەرەگىن نەگىزگە الىپ.

«جاھانداعى زاماناۋي قازاقستاندىق مادەنيەت» اياسىندا اتقارىلعان جوبانىڭ تانىستىرىلىمىنا شىعارمالارى العاشقى انتولوگيالارعا كىرگەن اۆتورلارمەن قاتار جوباعا ۇلەسىن قوسقان ۇلىبريتانيا، يسپانيا، رەسەي، فرانسيا، جۇڭگو، ەگيپەت، جانە تاياۋ شىعىس ەلدەرىنىڭ اۋدارماشىلارى مەن ادەبيەتشىلەرى، اۋدارما جانە باسپا ۇيىمدارىنىڭ باسشىلار قاتىستى. 

سالتاناتتى شارانىڭ شىمىلدىعىن اشقان ق ر پرەزيدەنتى اكىمشىلىگى ىشكى ساياسات ءبولىمىنىڭ مەڭگەرۋشىسى، «جاھانداعى زاماناۋي قازاقستاندىق مادەنيەت» جوباسىن ىسكە اسىرۋعا جاۋاپتى جۇمىس توبىنىڭ جەتەكشىسى ايدا بالايەۆا:

«ونەر مەن مادەنيەت قايراتكەرلەرى، ءقادىرلى قوناقتار 12 ساۋىردە ەلباسى ن.ءا.نازاربايەۆ «رۋحاني جاڭعىرۋ» باعدارلاماسىنىڭ باستالعانىنا 2 جىل تولدى.ۇرپاق تاعدىرىن تاريح تەرەڭىنە بويلاي وتىرىپ، بولاشاققا قاجەت قاسيەتتەردى بويىنا سىڭىرۋگە باستاۋ بولعان باعدارلاما ۇلتتىق رۋحىمىزعا ەرەكشە سەرپىلىس اكەلدى. بۇگىنگى جيىندا وسى جۇمىستىڭ تابىستى وتۋىنە اتسالىسىپ كەلگەن بارشا حالىققا زور ريزاشىلىعىمدى بىلدىرەمىن. اسىرەسە الىستان كەلىپ وتىرعان شەتەلدىك قوناقتارىمىز سوڭعى ءبىر جىلدا قىرۋار جۇمىس اتقاردى» - دەدى.

اتالمىش جوبا اياسىندا «قازاقستاننىڭ قازىرگى پوەزياسىنىڭ انتولوگياسى» مەن «قازاقستاننىڭ قازىرگى پروزاسى انتولوگياسى» ازىرلەندى. بۇل جوبا قازاق مادەنيەتىن الەمگە تانىستىرىپ، قۇڭدىلىعىن ارتتىرىپ، بايلانىس ورناتۋعا باعىتتالعان. 160 قازاقستاندىق اۆتوردىڭ تاڭدامالى شىعارمالارى الەمنىڭ ەڭ ءىرى 6 تىلىنە اۋدارىلىپ، بەدەلدى باسپالاردان شىعىپ 5 قۇرلىقتاعى 90-نان اسا ەلگە جول تارتتى. «جاھانداعى زاماناۋي قازاقستاندىق مادەنيەت» جوباسى بويىنشا جالپى سانى 2 ميلليارد 600 ميلليون حالىق قازىرگى قازاق ادەبيەتىنىڭ جاۋھارلارىمەن تانىسۋعا مۇمكىندىك الادى.

جيىن بارىسىندا شەتەلدىك قوناقتارمەن قاتار اۆتورلار ءسوز الىپ اۋدارما ىسىندەگى ماڭىزدى ماسەلەلەر تالقىلاندى. ناقتىراق ايتقاندا، قازاق ادەبيەتى ۇلگىلەرىن شەت تىلىندە سويلەتۋ بارىسىندا اۋدارمانىڭ كوركەمدىك ساپاسىن قامتاماسىز ەتۋ جايىندا ءسوز قوزعالدى. 

ۇسىنعان: اسەل بولات قىزى