الماتىدا كوپىرگە كونستيتۋسياداعى سوزدەر جازىلعان پلاكاتتى ىلگەن سۋرەتشى رومان زاحاروۆ بوساتىلدى دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.
ونىڭ جازاسى بەس كۇندىك اكىمشىلىك قاماۋ تۇرىندەگى جازا ايىپپۇلعا اۋىستىرىلدى.
"29 ساۋىردە الماتى قالالىق سوتىنىڭ اپەللياسيالىق القاسى مامانداندىرىلعان اۋدانارالىق اكىمشىلىك سوتتىڭ رومان زاحاروۆقا قاتىستى شىعارعان ۇكىمىن قارادى. اپەللياسيالىق القاداعىلار وسىعان دەيىن بەس كۇندىك اكىمشىلىك قاماۋ تۇرىندەگى جازانى اكىمشىلىك ايىپپۇلعا وزگەرتتى. رومان زاحاروۆ اكىمشىلىك قۇقىق بۇزۋشىلىق تۋرالى كودەكستىڭ 434-بابىنىڭ 1-بولىگى بويىنشا 5 اەك كولەمىندە (12 625 تەڭگە) ايىپپۇل تولەۋگە مىندەتتەلدى. سوت ۇكىمى زاڭدى كۇشىنە ەندى"، - دەپ حابارلادى سوتتاعىلار.
وسىعان دەيىن الەۋمەتتىك جەلىلەردە كونستيتۋسياداعى سوزدەر كەلتىرىلگەن پلاكاتتىڭ سۋرەتتەرى تارالعان بولاتىن. پلاكاتتىڭ اۆتورى رومان زاحاروۆ ەكەنى انىقتالعان ەدى. كەيىنىرەك پوليسياداعىلار وقيعانىڭ ءمان-جايىن ايتىپ بەرگەن ەدى.
"تاڭعى ساعات 6-دا جەدەل باسقارما ورتالىعىنا تۇرعىندار حابارلاسىپ، ءال-فارابي داڭعىلى مەن دوستىق كوشەسىنىڭ قيىلىسىندا بەلگىسىز ەر ادامنىڭ قاعازدار جانە تاعى باسقا زاتتاردى لاقتىرىپ جۇرگەنى جايلى حابارلادى. جول-پاترۋلدىك پوليسيا قىزمەتكەرلەرى وقيعا ورنىنا باردى. ەر ادام ءوزىن ەرسى ۇستاپ، قۇقىق بۇزۋىن توقتاتپادى. ونىڭ ءاتى-جونىن انىقتاۋ ءۇشىن پوليسيا جاساعى ەر ادامدى مەدەۋ اۋداندىق پوليسيا باسقارماسىنا جەتكىزدى"، - دەپ حابارلاعان ەدى پوليسياداعىلار
ۇسىنعان: ماقپال سەمباي
