بۇل تۋرالى «Nur Otan» پارتياسى ءتوراعاسىنىڭ ءبىرىنشى ورىنباسارى #NurOtanPikir ەركىن پىكىرتالاس الاڭىنىڭ كەزەكتى وتىرىسىندا ايتتى.
وتىرىستا «جاستار جىلى» اياسىندا اتقارىلىپ جاتقان شارۋالار، جاستاردى باسپانامەن جانە جۇمىسپەن قامتۋ ماسەلەلەرى، جاس بۋىندى الەۋمەتتىك قولداۋ سياقتى ماڭىزدى جايتتار ءسوز بولدى.
بۇدان باسقا ءىس-شارادا اۋىل جاستارىنا قاتىستى ماسەلە دە كوتەرىلدى. اتالعان ماسەلە جايىندا ماۋلەن اشىمبايەۆ اۋىل جاستارىنىڭ باسەكەگە قابىلەتتى بولۋى ءۇشىن جەرگىلىكتى مەكتەپتەردىڭ بەدەلىن ارتتىرىپ، ولاردىڭ ءبىلىم دەڭگەيىن كوتەرۋ كەرەكتىگىن ايتتى.
ال جاستاردى دۇرىس تاربيەلەۋ ىسىنە قاتىستى «Nur Otan» پارتياسى ءتوراعاسىنىڭ ءبىرىنشى ورىنباسارى ەڭ الدىمەن وسكەلەڭ ۇرپاق اراسىندا دۇرىس قۇندىلىقتار قالىپتاستىرۋ كەرەكتىگىنە نازار اۋداردى.
– جاستاردى تاربيەلەۋ، جاڭا زامان تۇلعالارىن قالىپتاستىرۋ تۋرالى ايتقاندا، جاس بۋىن اراسىندا دۇرىس قۇندىلىقتاردى قالىپتاستىرۋدى ەسكەرۋىمىز كەرەك. سونىڭ ىشىندە ادامگەرشىلىك، قاراپايىمدىلىق، ەڭبەكقورلىق، تاباندىلىق سياقتى قاسيەتتەرگە باسىمدىق بەرگەن ءجون. مۇنىڭ بارلىعى كوزدەگەن ماقساتقا جەتەلەيتىن قادامدار. بۇل ىستە، اعا بۋىنعا، ياعني بىزگە، سونداي-اق زيالى قاۋىمعا جۇكتەلەر جاۋاپكەرشىلىكتىڭ جۇگى اۋىر، – دەدى ماۋلەن اشىمبايەۆ.
ودان بولەك، ءىس-شارا بارىسىندا اقپارات جانە قوعامدىق دامۋ ۆيسە-مينيسترى جۇلدىز وماربەكوۆا، بەلگىلى اقىن، قازاقستان جازۋشىلار وداعىنىڭ مۇشەسى، «Shalqar» راديوسىنىڭ ديرەكتورى قالقامان سارين، كاسىپكەر، ءىت تەحنولوگيالار سالاسىندا قىزمەت كورسەتەتىن STEM اكادەمياسىنىڭ نەگىزىن قالاۋشى ءابۋتالىپ ءمۇتالى، «Qazaqstan» ۇلتتىق تەلەارناسىنىڭ جۇرگىزۋشىسى ايگەرىم ەسەنالى، «Nur Otan» پارتياسى باسپا ءسوز قىزمەتىنىڭ باسشىسى ماكسيم سپوتكاي جانە «جاس وتان» جاستار قاناتىنىڭ اتقارۋشى حاتشىسى داۋلەت كارىبەك كوتەرىلگەن تاقىرىپقا قاتىستى ءوز ويلارىن ايتىپ، پىكىرلەرىن ءبىلدىردى.
