2013 جىلى كۇيەۋىمەن بىرگە سيريا اسقان 33 جاستاعى قازاقستاندىق كەلىنشەك مايدان دالاسىنداعى ايەلدەردىڭ جاعدايلارى تۋرالى شىندىقتى ايىپ بەردى دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.

"2010 جىلى مەن ءدىن جولىندا جۇرگەن ازاماتقا تۇرمىسقا شىقتىم. ول كەزدە "دجيحاد" دەگەننىڭ نە ەكەنىن بىلمەيتىنمىن. 2012 جىلى ول جۇمىسقا كەتتىم دەپ ساپارعا شىقتى. قايدا باراتىنىن ايتپادى. ارادا اي وتكەندە بايلانىسقا شىعىپ، وزىمەن بىرگە الىپ كەتەتىنىن جەتكىزدى. ءبىز سيرياعا تۇركيا ارقىلى جەتتىك. كىشكەنە اۋىلعا قونىستانعانبىز. ارادا اپتا وتپەي جاتىپ، مەن ۇيگە قايتقىم كەلگەن. ءبىراق ول مەنى سولاي جاساسام تالاق ەتەتىنىن ايتتى"، - دەيدى كەلىنشەك ءسىم وتكەن كەزدەسۋدە.

جاس كەلىنشەكتىڭ ءبىرىنشى نەكەسىنەن سەگىز جاسار قىزى بار. ال ەكىنشى جارىنان ەكى ۇل تاۋىپتى. ءبىراق ونىڭ ءبىرى شاقالاق كەزىندە جاعداي بولماعاندىقتان شەتىنەپ كەتكەن.

"ەلگە قايتۋعا دەگەن تۇراقتى ۇمتىلىس 2017 جىلى كۇيەۋىم قايتىس بولعاننان كەيىن باستالدى. ول جاقتا جەسىرلەردىڭ بارلىعىن سۋ مەن جارىعى، تاماعى جوق جەرگە ءتورت اي جانە ون كۇنگە قاماپ تاستايدى. اتالعان مەرزىم وتكەن كەزدە ول جەرگە ءتۇرلى ەر ادامدار كەلىپ، وزدەرىنە ايەل تاڭدايدى. كەلىنشەكتەر امالسىزدان تاعى دا ەرگە شىعادى. بۇگىن جار قۇشساڭ، ەرتەڭىنە ول قازا تابۋى مۇمكىن. وسىنداي جاعدايمەن 19 رەت تۇرمىس قۇرعان ايەلدەر دە بار"، - دەيدى ول.

اتالعان جاعدايداعى ايەلدەر وزدەرىنىڭ احۋالى تۋرالى وتانىنا حابار بەرە المايدى. ەگەر سولاي ەتەتىن بولسا، ولاردى ساتقىندىق جاساعانى ءۇشىن ءولىم جازاسىنا كەسەدى ەكەن.

اۋدارعان: ادىلەت مادەنيەت