قازاق تويىندا قازاقستانعا كەلىپ، جەڭىل جولمەن تابىس تاۋىپ جۇرگەن شەتەلدىكتەردىڭ قاراسى كوبەيۋدە. «قازاقتىڭ ءانى مەن كۇيىنە ىقىلاسى اۋعان قارا ناسىلدىلەردىڭ ءبىر تويدان الاتىن قالاماقىسى قانداي؟» دەگەن ساۋالعا 31 ارنا جاۋاپ بەردى.

قازاق تويلارىنىڭ ءسانىن كىرگىزىپ، كارى مەن جاستى تەڭدەي بيلەتەتىن اندەردى سوڭعى ۋاقىتتا شەتەلدىكتەر ورىنداۋعا قۇمارتىپ ءجۇر. ونىسى بىلاي تۇرسىن بار اقشاسىن تويعا شاشاتىن كەڭ پەيىل قازاقتىڭ اقشاسىنا دا ورتاقتاسقىسى  كەلەدى.

العاشىندا ەلىمىزگە قوناق بولىپ كەلگەن  «سين -فرونتەرا» توبىنىڭ بۇگىندە قازاق توي-بيزنەسىندە ايى وڭىنان تۋىپ تۇر. ءبىر اپتادا 3-4 تويعا بارىپ ۇلگەرەتىن دارەجەگە جەتكەن. كۋبادا جولدارى بولماعان قارا مارجاندار قازاقستانعا كەلىپ قالتالارىن قامپايتىپ جۇرگەندەرىنە 5 جىل. توي نارىعىندا باسەكەلەستەرىنەن باسىپ وزۋ ماقساتىندا ولار العاشىندا  اباي بەگەيدىڭ «اسپانعا قارايمىن» ءانىن شىرقاسا، كەيىن دوسمۇقاسان توبىنىڭ «قايداسىڭ» تۋىندىسىن ۇيرەنىپ الىپتى. ءقازىر وسى اندەرى ءۇشىن  تويدا سۇرانىسقا يە.

«ءبىز تەك تويعا عانا شىعىپ قويمايمىز. كورپوراتيۆتى كەشتەر، كلۋبتاردا ءان ايتامىز. ال تويعا كەلەتىن بولساق، سۇرانىس كوپ. تەك الماتى عانا ەمەس، استانا، اتىراۋ، اقتاۋ قالالارىنا دا  شاقىرىپ تۇرادى»، — دەيدى دجوي.

قازاقستانعا كەلىپ، جەڭىل جولمەن تابىس تاۋىپ جۇرگەندەردىڭ ءبىرى دانيەل دجەين. قازاقتى تاڭقالدىرۋدىڭ ءتۇرلى امال تاسىلدەرىن ۇيرەنىپ العان دانيەل بۇگىندە ۇلتتىق اسپاپتىڭ قۇلاعىندا ەركىن وينايدى. اكەسى نيگەريالىق، اناسى ورىس، ال ءوزى قازاق ازاماتى. بۇگىندە ول بەتاشاردى ۇيرەنىپ ءجۇر.

بۇرىن تەك كۇي تارتىپ، ءان ايتقانى ءۇشىن 600 دوللار الىپ كەلسە، ەندى ونىڭ قالاماقىسى ەكى ەسەگە كوبەيدى. تۇراقتى جۇمىسى جوق دانيەلدىڭ بار تابىسى قازاقتىڭ تويى.

«ءبارىن ءبىلۋ كەرەكپىن. حالىق تۋرالى سوندىقتان ماعان ءبارى قىزىق. مەن باسىندا دومبىرا اسپابىمەن ويناپ باستاعانمىن سوسىن بەتاشاردى ۇيرەنۋگە قىزىعۋشىلىعىم بار سوندىقتاندا ويناپ جاتىرمىن»، — دەيدى دانيەل دجەين.