ارمەنيا استاناسى ەريەۆان قالاسىنداعى ەرەۋىلشى توپتى  قاداعالاۋ بارىسىندا پوليسيا 237 ادامدى تۇتقىنداعان. بۇل تۋرالى Reuters اگەنتتىگى جازادى. جەرگىلىكتى بيلىك وكىلدەرىنە وزدەرىنىڭ نارازىلىعىن ءبىلدىرۋ ءۇشىن ەريەۆان كوشەلەرىنە جينالعان 5000-عا جۋىق  ارمياندى جەرگىلىكتى پوليسيا سىرتتاي باقىلاپ تۇرعان. الايدا ايتار ۋاجدەرىن ەل پرەزيدەنتىنە تىكەلەي جەتكىزۋدى ماقسات تۇتقان اكسيا ۇيىمداستىرۋشىلارىن پوليسيا باقىلاۋىنان شىعارىپ العان. وسىلايشا  19 ماۋسىمدا باستالعان نارازىلىق اكسياسىنىڭ سوڭى جاپپاي تارتىپسىزدىكە ۇلاسقان. مۇنداعى دەمونسترانتتاردىڭ نارازىلىعىن تۋعىزعان – ەلەكتر ەنەرگياسىنىڭ ءتاريفىنىڭ كۇرت كوتەرىلۋى بولعان. 22 ماۋسىم كۇنى ەرۆانداعى ورتالىق الاڭعا جينالعان نارازى توپ بەلسەندىلەرى پرەزيدەنت اكىمشىلىگى عيماراتىنا باعىت العان. الايدا پوليسيا قىزمەتكەرلەرى شەرۋشىلەردى توقتاتقان بولاتىن.

22 ماۋسىم كۇنى پوليسيا دەمونسترانتتارعا ەسكەرتۋ جاساعان. الايدا ەسكەرتۋلەرگە قۇلاق اسپاعان ەرەۋىلشىلەرگە 23 ماۋسىم كۇنى كۇش قولدانا باستاعان. نارازىلىق اكسياسى بەلسەندىلەرىنە قارسى سۋ اتقىلايتىن ماشينالار مەن اۋىر تەحنيكالار قولدانىلعان. ناتيجەسىندە اكسيا بەلسەندىلەرىنىڭ 7-ەۋى دارىگەرلىك كومەككە جۇگىنگەن جانە 3 بەلسەندى اۋرۋحاناعا جەتكىزىلىپ، 11 پوليسيا قىزمەتكەرىنە دارىگەرلىك كومەك كورسەتىلگەن. ارمەنيا باس پروكۋراتۋراسى «اتالمىش اكسياعا قاتىستى قىلمىستىق ءىس قوزعالىپ، اكسيا قاتىسۋشىلارىنا بۇزاقىلىق، قوعامدىق ءتارتىپتى بۇزۋ ايىپتارى تاعىلعانىن» جەتكىزگەن.

نۇرزات توعجان