وڭتۇستىك قازاقستان وبلىسى اكىمىنىڭ ءبىرىنشى ورىنباسارى بەرىك وسپانوۆ قازىعۇرت پەن تولە بي اۋداندارىندا بولىپ، سالىنىپ جاتقان الەۋمەتتىك نىسان قۇرىلىستارىمەن تانىستى، دەپ حابارلايدى  وقو اكىمىنىڭ باسپا ءسوز قىزمەتى. ساپارىن قازىعۇرت اۋدانىنان باستاعان ب.وسپانوۆ التىنتوبە، قاراباۋ، تۇربات ەلدى مەكەندەرىندەگى 300 ورىندىق مەكتەپ قۇرىلىستارى مەن قىزىلقيا اۋىلىنداعى اپاتتى مەكتەپپەن، سونداي-اق اۋدانداعى گاز، اۋىز سۋ جۇيەلەرىن جوندەۋ جۇمىستارىنىڭ بارىسىمەن تانىستى. بۇگىنگى تاڭدا قازىعۇرت اۋدانىنداعى 64 ەلدى مەكەننىڭ 70 پايىزى اۋىزسۋمەن قامتىلعان. اۋدانداعى 11 اۋىلدا ءقازىر اۋىزسۋ كەستەمەن بەرىلسە، قالعان 30-عا جۋىق ەلدى مەكەن تۇرعىندارى 24 ساعات تازا اۋىزسۋدى پايدالانىپ وتىر. تولە بي اۋدانىنداعى بەينەتكەش، اڭگىر اتا، قازىعۇرت ەلدى مەكەندەرىندەگى مەكتەپتەر مەن اۋدان ورتالىعىنداعى 280 ورىندىق بالاباقشا قۇرىلىسىمەن تانىسقان ب.وسپانوۆ مەردىگەر ۇيىمدارعا جوسپارلانعان جۇمىستاردى بەكىتىلگەن كەستە اياسىندا ۋاقىتىلى ءارى ساپالى اياقتاۋدى مىندەتتەدى. ەلدى مەكەندەردى اۋىز سۋمەن، كوگىلدىر وتىنمەن قامتۋ باعىتىندا قولعا الىنعان شارالار جايلى جاۋاپتىلاردىڭ ەسەبىن تىڭداعان ب.وسپانوۆ جىل سوڭىنا دەيىن مەجەلەنگەن جوسپاردى ءوز مەرزىمىندە اياقتاۋدى تاپسىردى. لەڭگىر قالاسىندا قۇرىلىسى ءجۇرىپ جاتقان 60 پاتەرلى كوپقاباتتى تۇرعىن ءۇي مەن ينفراقۇرىلىمداردى تارتۋ جۇمىستارىن ءوز كوزىمەن كورگەن وبلىس اكىمىنىڭ ءبىرىنشى ورىنباسارى ولقىلىقتارعا جول بەرگەن باسشىلارعا ءبىرقاتار سىن-ەسكەرتپەلەر ايتىپ، كەمشىلىكتەردى تەز ارادا جويۋدى جۇكتەدى. ەكى اۋدانداعى الەۋمەتتىك نىسانداردى ارالاپ كورگەن وبلىس اكىمىنىڭ ءبىرىنشى ورىنباسارى جەرگىلىكتى تۇرعىنداردى جەكە ماسەلەلەرى بويىنشا قابىلدادى.