ورتالىق ازياداعى ەڭ ۇلكەن قالا ءۇرىمجىنىڭ بيىك ءزاۋلىم عيماراتتارىنىڭ ءبىرى - 17 قاباتىنداعى بىرنەشە سەرىكتەستىكتى قول استىنا قامتىعان «كەرۋەن يمپورت-ەكسپورت شەكتى جاۋاپكەرشىلىك سەرىكتەستىگىنىڭ» ديرەكتورى ارعى بەتتە «اتىمتاي جومارت» اتانعان كاسىپكەر «قامشى» اقپاراتتىق پورتالىنىڭ “قازاق حاندىعىنا 550 جىل” توسبەلگىسىمەن ماراپاتتالعان. ەسبول مۇحامادان ۇلى اعامىزدىڭ كابينەتىندە اۋىلدان الدىرعان قىسىردىڭ قىمىزىن ىشە وتىرىپ اڭگىمەدە وتىرمىز.

- باۋىرىم مىنا ءاندى سەن سەكىلدى ءبىزدىڭ قالامىزدىڭ كەلىپ- كەتىپ تۇراتىن سىيلى قوناعىنىڭ بىرەۋى جازعان.

- قانداي ءان؟

- الدىمەن تىڭداڭ كور.

ءان قۇلاقتان كىرىپ جۇرەككە جەتىپ جاتىر. ساعىنىش پەن سەزىمنىڭ ىرعاعى جانىڭدى ەرىكسىز تەربەتەدى. ءاندى جازعان اداممەن ورىنداۋشى ەگىز سەكىلدى. ءبىرىنىڭ باعىن ءبىرى اشىپ تۇر.

جاسى قىرىقتىڭ بەل ورتاسىنداعى قارا تورى، ورتا بويلى اعامىز اڭگىمەنىڭ تيەگىن ودان ارى اعىتتى

وسىدان ءبىراز بۇرىن اقتوبەدەن ماعان بياعام حابارلاسىپ «اسسالاۋماعالايكۋم ەسبولجان باۋىرىم! دەنساۋلىعىڭ قالاي؟ امانسىڭدارما؟  ءارۋاقىتتا سەنىڭ بياعا، اعا دەگەن جاعىمدى ءسوزىڭ مەن ءۇشىن ۇلكەن قۇرمەت. ساعان ەسقاتارداي اعا بولىپ كورىنبەسەم دە، ايتەۋىر اعالىق شىن كوڭىلىمدى بىلەسىڭ، سەنى تۋعان ىنىمدەي كورەمىن. جاڭا ءوزىڭ تىڭداعان ولەڭدى جازعاندا سەزىمدە بولعانىمدى بىلەسىڭ. قاشان شىڭجاڭعا بارسام دا سەندەردىڭ قوشامەتتەرىڭە، ىقىلاستارىڭا، نيەتتەرىڭە ەرەكشە ريزامىز. بۇل ءان ارعى بەتتەگى قانداستارىمىزدىڭ قازاقى قوناقجايلىلىعى مەن اقپەيىلىنە، ىزگىلىكتەرى مەن مەيىرباندىلىقتارىنا، قۇرمەتتەرىنە ارنالعان العىسىمىز. سەن وتكەندە ءدوپ باسىپ ايتتىڭ، سول ءبىر كەشكى قوناقاسىدا وتىرعاندا ۇرىمشىدەگى سەنىڭ سىنىپتاس قىزدارىڭمەن قارىنداستارىڭنىڭ ادەپ يباسى، قازاق قىزىنا ءتان سىپايىلىعىمەن بيازىلىعىنا ارنالعان ءان عوي. تاعى ءبىر جۇرەكتى تولقىتار ءبىر سەزىم بولعان، ونى ءوزىڭ بىلەسىڭ. سوندادا بۇل ءان ۇرىمشىدەگى بارلىق شىركىن قازاقتىڭ قىزى وسىنداي بولسا ەكەن دەگەن قارا كوز قارىنداستارىمىزعا ارنالادى. اللا قالاسا، وسى ءاندى جازۋشى ءارى ورىنداۋشى قانات ايتبايەۆ دوسىڭمەن بىرگە سىزدەرگە بارىپ بەينەبايان ءتۇسىرىپ قايتساق دەگەن ويىمىز بار. ەڭ باستىسى جان دوسىمىز ساعان ۇناعانىنا قۋانامىز. بۇل ءاندى قازاق راديوسى وتە تاماشا ءان دەپ التىن قورعا سالىپ قويدى.»،- دەگەن ۆاتساپتاعى جازبانى قويىپ بەردى

ءسوز اراسىندا جۇرەك تولقىتار ءبىر سەزىم بولدى دەپ ايتىپ قالدى عوي، نەگىزى بۇل ءاننىڭ استارىندا ءبىر سىر بار سەكىلدى.

دۇرىس ايتاسىڭ، جاڭاعى بي اعام دەپ وتىرعانىم اقتوبە قالاسىندا تۇراتىن ءبىرجان قالماعامبەتوۆ دەگەن بىرگە تۋماساق تا بىرگە تۋعانداي بولىپ كەتكەن اعام. جاڭا جىلدا حابارلاسىپ جانىنا دوسىتارىم ونەرلى وتاباسى -ايتبايەۆتار جانە اكادەميك اعامىز التاي تايجانوۆپەن بىرگە كەلەتىنىن ايتتى. اسىرەسە قازاقستاننىڭ الەۋمەتتىك عىلىمدار اكادەمياسىنىڭ اكادەميگى، فيلوسوفيا عىلىمدارىنىڭ دوكتورى، پروفەسسور التاي تايجانوۆ اعاعا قۇرمەتىم شەكسىز. بي اعاممەن قانات دوسىما ۇرىمجىدەگى قازاقتىڭ ىقىلاسىمەن سول كەشتەگى قارىنداستارمىزبەن مەنىڭ كۋرستار قىزدارىمنىڭ قازاقي مىنەزى ۇناعان بولۋ كەرەك. كەتەر كەتكەنشە العىستارىن جاۋدىرۋمەن بولدى. ولاردى ءبىراز ادام اتتانارلارىندا اۋەجايدان ۇشاققا شىعارىپ سالدىق. كەيىن ءبىر اڭگىمەدە بي اعام “ەسبولجان سەندەر اتتانىدىرىپ سالعان كۇنى، ءبىر قارىنداسىمىز قوشتاساردا قولىمدى قاتتى قىستى” دەدى. “قىز بالا بەكەر قولدى قىسپايدى-عوي، سىزگە عاشىق بولىپ قالعان شىعار” دەدىم ءازىل-شىنى ارالاس. “باسە، سول كەزدە دەنەمدى ءبىر جالىن شارپىپ ءوتتى” دەپ اقكوڭىل بي اعام ۇيالىڭقىراپ قالدى. تەكتى ادام عوي، ويىندا ەشقانداي ءبىر كىر جوق، ونىڭ تالاي رەت كۋاسى بولعانبىز. سول اڭگىمەدەن كەيىن مىنە جاڭا تىڭداعان ءاندى جىبەرىپ، شۇيىنشىلەگەن تىلەگى سول.

ول ارۋ كىم بولدى ەكەن؟

بي اعام ايتقانداي ول ارۋدى وسى ۇرىمجىدەگى قازاق قىزى اتىنا لايىق قارا كوزدەردىڭ ءبىرى دەپ تۇسىنسەڭ بولدى- دەدى ەس اعام.

يا، بي اعامىز سەكىلدى بىزدە بۇل قالاعا ىسساپارمەن ءجيى كەلىپ-كەتىپ تۇرامىز. ميللياردتىڭ ىشىندە جاساپ جاتسادا، دىنىمەن ءتىلىن قازاقتىق بولمىسىن ساقتاپ جۇرگەن قانداستارىمىزبەن، قازاقتىڭ بار ۇياتىمەن ارىن بويىنا جيعان قارىنداستارىمىزعا ءدان ريزامىز.

الىبەك ىدىرىس