قالايسىزدار، دوستارىم؟ دەمالىس قالاي ءوتىپ جاتىر؟
ال مەنىڭ دەمالىسىمنىڭ ءبىر كۇنى بوس وتكەن جوق. بوس وتپەدى دەگەنىم نە ءتايىرى، جۇدەگەن جانىمدى جادىراتىپ قايتتىم. جۇرەگىمە ءۇڭىلىپ كەلدىم. وتكەنىم مەن كەلەشەگىم كوز الدىمدا كولبەڭدەپ، وز-وزىمنەن بۋلىعىپ جىلاعىم كەلگەنى-اي... نەگە ەكەنىن...
بارىنە سەبەپكەر – گيتاراسىن اسىنعان سول ءبىر بۇيرا شاشتى سۇيكىمدى كەلىنشەك... ماقپال جۇماباي.
ماقپالدىڭ ماقامدى جىرلارى تۋرالى كوپ ەسىتسەم دە، ءوز اۋزىنان تىڭداعاندا ءاننىڭ وزگەشە ءوڭ الاتىنىن ءبىلىپپىن بە؟.. تۇلا بويدى ءيىتىپ، ەلجىرەتىپ، بۋىن-بۋىنىڭدا جۇگىرەتىن وسىنشا ەرەكشە، وسىنشا تۇنىق ساز دا بولادى ەكەن-اۋ...
«مەن ءانشى ەمەسپىن، مەن – اقىنمىن. الدىمەن ولەڭ تۋعان سوڭ، ارتىنان وز-وزىنەن كوكىرەككە ولەڭنىڭ سازى كەلىپ، ۇيىرىلە قالادى. قاي-قاي اقىنىمىزدىڭ بولماسىن، ولەڭى اۋىزدان-اۋىزعا انمەن جەتكەن. بەرىرەكتەگى جامبىل اقىندى الىڭىز. ول دا دومبىراسىمەن ولەڭ ايتقان. مەن سول اقىنداردىڭ سىنىعىمىن»، – دەپ ءسوزىن باستاعان ماقپال اقىن اينالاسىنا ولەڭ مەن سازدىڭ ءقادىرىن تۇسىنەتىن قاۋىمدى جيناپ، سازىمەن سۋسىنداتۋدى داستۇرگە اينالدىرعان.
ءيا، ءسىز دە جانارلاردان مۇڭ كورىپ تۇرعان شىعارسىز؟.. ول – ءمولدىر مۇڭ... ماقپالدىڭ ماقامدى جىرلارى تۋدىرعان ماقپال مۇڭ...
ول سويلەدى بۇگىن. مۇڭدى ايتام. جۇرەكتەن شىعىپ، جۇرەككە جەتتى...
كىرپىگىمە ىلىنگەن كۇننىڭ ءبارىن وزىڭە. كوكىرەكتى كەرنەگەن مۇڭنىڭ ءبارىن وزىڭە. و، الىستان مۇنارتقان شىڭنىڭ ءبارىن وزىڭە. ولەڭگە دە ايتپايتىن سىردىڭ ءبارىن وزىڭە ساقتاپ قويامىن…
ءوزىم عانا سەنەتىن شىندىعىمدى وزىڭە. ءوزىم عانا سۇرەتىن تىرلىگىمدى وزىڭە. ءوزىم عانا ەستيتىن كۇمبىرىمدى وزىڭە. مويىنداعىم كەلمەيتىن سۇمدىعىمدى وزىڭە ساقتاپ قويامىن…
مەيىرىممەن قاراعان كوزدىڭ ءبارىن وزىڭە. انام ايتقان اياۋلى ءسوزدىڭ ءبارىن وزىڭە. تاعدىرىمدى سەل ەتكەن تەزدىڭ ءبارىن وزىڭە. ءوتتى دەۋگە قيمايتىن كەزدىڭ ءبارىن وزىڭە ساقتاپ قويامىن…
ۇزىلەيىن دەپ تۇرعان ءتوزىمىمدى وزىڭە. الدانباۋعا ۇيرەتكەن سەزىگىمدى وزىڭە. مەنى جەردە بار ەتكەن سەزىمىمدى وزىڭە. مەنى ءتۇبى ولتىرەر سول سەزىمدى وزىڭە ساقتاپ قويامىن…
قاسىرەتتى ءھام سۇلۋ زامانىمدى وزىڭە. كەڭ دالامدا جاڭعىرعان ازالى ءۇندى وزىڭە. ءمولت-مولت ەتىپ جاس تۇنعان جانارىمدى وزىڭە. جىلاپ تۇرىپ سۇيەتىن قازاعىمدى وزىڭە ساقتاپ قويامىن… قارا جاشىك…
– دەپ ولەڭدەتكەن ماقپال اقىن ماقامدى جىرلارىن بۇگىن ءار جۇرەككە ساقتاپ قويدى...
مەيىرگۇل وڭعاروۆا
پىكىر قالدىرۋ