شىمكەنتتە ءۇش اۋىسىممەن وقيتىن مەكتەپ سانى بيىل 15-كە جەتتى. قالادا مىڭ بالاعا شاقتالعان مەكتەپتەردە تورت-بەس مىڭ وقۋشى ءبىلىم الادى. مەكتەپتەر وقۋ كابينەتتەرى جەتپەگەندىكتەن قوسىمشا ساباقتاردى الىپ تاستاعان دەپ جازادى Qamshy.kz اقپارات اگەنتتىگى ازاتتىق راديوسى اقپاراتىنا سۇيەنىپ. 

 شىمكەنتتەگى سايرام ىقشاماۋدانىندا ورنالاسقان №65 مەكتەپ-گيمنازياسى ەكى جىلدان بەرى ءۇش اۋىسىمدا وقيدى. مەكتەپ ديرەكتورىنىڭ مىندەتىن ۋاقىتشا اتقارۋشى ايگۇل كەرىمبايەۆانىڭ ازاتتىققا ايتۋىنشا، 1250 بالاعا شاقتالعان گيمنازيادا جاڭا وقۋ جىلىندا وقۋشى سانى 3700-گە جەتكەن. وقۋ كابينەتتەرى از، ال سىنىپتاعى وقۋشى سانى كوپ.

– بىزدەگى قيىندىق سول – بالا سانى كوپ، اتا-انانىڭ سۇرانىسى جوعارى. كەيبىر سىنىپتاردا وقۋشى سانى قىرىقتان اسادى، – دەيدى ول. 

رەسپۋبليكالىق "زياتكەر – ۇستاز" قوعامدىق بىرلەستىگىنىڭ ءتوراعاسى ءومىر شىنىبەك ۇلىنىڭ پىكىرىنشە، قازاقستاندا ءۇش اۋىسىمدى مەكتەپتەر پروبلەماسىنىڭ پايدا بولۋى – ابسۋرد

– 20 عاسىردىڭ العاشقى جارتىسىندا بالا تۋۋ كوبەيدى. مەديسينا دامىپ، بالا ءولىمى ازايدى. سودان بەرى دەموگرافيا ءوستى. 2018 جىلى شىمكەنت قالاسىندا 22 مىڭعا جۋىق بالا 1-سىنىپقا باردى. ءقازىر مەكتەپ تاپشى. ءۇش اۋىسىمدى مەكتەپتەردەگى كەيبىر سىنىپتاردا 45 وقۋشىعا دەيىن وتىر. سىنىپتا وقۋشى سانى 25-تەن ارتىق بولسا، ءبىلىم ساپاسى تومەندەيدى. ءمۇعالىم 40 مينۋت ۋاقىتىنىڭ ءبىر بولىگىن بالالاردى تىنىشتاندىرۋعا جۇمسايدى. بۇل – دۇرىس جوسپاردىڭ بولماۋىنان پايدا بولعان ماسەلە، – دەيدى مەكتەپ ءمۇعالىمى ازاتتىق تىلشىسىنە بەرگەن سۇحباتىندا.