«2013 جىل 1 شىلدە كۇنى وتاندىق تەلەارنالار كەڭىستىگىندە تۇڭعىش رەت «KAZsport» سپورت تەلەارناسى ءوزىنىڭ العاشقى حابارىن تاراتادى» دەپ حابارلادى «قازاقستان» رترك اق باسپا ءسوز قىزمەتى. قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ 2012 جىلى «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» جولداۋىندا سپورت جانە دەنە شىنىقتىرۋ ىستەرى اگەنتتىگى مەن مادەنيەت جانە اقپارات مينيسترلىگىنە بىرلەسىپ، مامانداندىرىلعان سپورت ارناسىن اشۋ تۋرالى تاپسىرما بەردى. سپورتتىق ارنا «قازاقستان» رترك» اق قۇرامىنا ەنەدى. ەلىمىزدىڭ بارلىق ايماقتارىنان تىكەلەي ەفيردە حابار تاراتۋعا مۇمكىندىگى بار كورپوراسيا قۇرامىنداعى «KAZsport» تەلەارناسىن جەرسەرىكتىك جانە كابەلدىك جۇيەدە حابار تاراتاتىن وپەراتورلار جەلىسىندە كورۋگە بولادى. «KAZsport» سپورت تەلەارناسىنىڭ شىعارماشىلىق ۇجىمىندا ءوز ءىسىنىڭ بىلىكتى ماماندارى قىزمەت اتقارادى. ولاردىڭ اراسىندا قازاقستاننىڭ ەڭ ۇزدىك سپورت جۋرناليستەرىنە بەرىلەتىن سەيداحمەت بەردىقۇلوۆ اتىنداعى جۇلدەنىڭ يەگەرلەرى بار. قازاقستاندىق جانكۇيەرلەر ۇلتتىق قۇراما كوماندالار قاتىساتىن قۇرلىقتىق جانە الەمدىك دەڭگەيدەگى جارىستاردى، ەل بىرىنشىلىكتەرىن تىكەلەي كورە الادى. اتاپ ايتساق، ۆەلوسپورتتان تۋر دە فرانس پەن ۆۋەلتا كوپكۇندىكتەرى، سۋ سپورتى تۇرلەرى، جەڭىل اتلەتيكا، دزيۋدو، كوركەم گيمناستيكا، كاراتە شيتو-ريۋ، گرەك-ريم جانە ەركىن كۇرەس، اۋىر اتلەتيكا مەن شاڭعى سپورتىنان الەم چەمپيوناتى، ۆولەيبولدان ايەلدەر اراسىندا الەمدىك گران-پري كەزەڭدىك ويىندارى بەرىلەدى. سونىمەن قاتار، سپورت جانكۇيەرلەرى نەمىس بۋندەسليگاسىن، قازان قالاسىندا وتەتەتىن جازعى ۋنيۆەرسيادا ويىندارىن، تەنيستەن Wimbledon ءتۋرنيرىن، ۆولەيبول، اۋىر اتلەتيكا مەن ۆەلوسپورتتان ازيا بىرىنشىلىكتەرىنەن ترانسلياسياسىن كورەتىن بولادى.. ارنا تاۋلىگىنە 20 ساعات حابار تاراتپاق. جاڭا سپورتتىق ارنانى اشۋعا قاتىستى جۇمىس اياقتالىپ، ەفيرگە شىعۋعا دايىن ەكەندىگى جونىندە بۇگىن مادەنيەت جانە اقپارات ءمينيسترى مۇحتار قۇل-مۇحاممەد ق ر ۇكىمەتىنىڭ وتىرىسىندا حاباردار ەتتى. «KAZsport» تاراتىلىمىن «وتاۋ تۆ»، Icon TV، Digital TV جانە باسقا دا كابەلدىك وپەراتورلار ارقىلى ىسكە قوسۋ جوسپارلانعان، سونىمەن بىرگە ارنا ينتەرنەت جەلىسىندە حابار تاراتادى. kaztrk.kz
پىكىر قالدىرۋ