الماتى قالالىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى ءدارى تاپشىلىعى تۋىنداعانىن جاريالادى.

«شەكتەۋ بىتۋىنە بايلانىستى الماتىدا رەسپيراتورلىق ۆيرۋس ينفەكسياسىنىڭ وسكەنى بايقالادى. اتاپ ايتقاندا، كوروناۆيرۋس ينفەكسياسىنىڭ دا وسكەنى راس. وسى جاعدايدا نەعۇرلىم ءجيى قولدانىلاتىن دارىلىك زاتتار مەن مەديسينالىق بۇيىمدارعا سۇرانىس ءوستى. اسىرەسە، تەرمومەترگە. بۇل رەتتە كوپ ازاماتتار الەۋمەتتىك جەلىلەردەگى بەيرەسمي كەڭەستەرگە جانە ءوز تانىستارىنىڭ كەڭەستەرىنە سۇيەنە وتىرىپ، ءوز بەتىمەن ەمدەلۋ ءۇشىن دارىلىك زاتتار ساتىپ الا باستادى»، - دەدى دەپارتامەنتتىڭ باسپا ءسوز قىزمەتىنەن.

ماماندار قالاداعى كوتەرمە ساۋدا كومپانيالارى مەن ءدارىحانالارعا جۇرگىزىلگەن مونيتورينگ بويىنشا دارىلىك پرەپاراتتار جەتكىلىكتى دەپ سەندىردى.

«قالاداعى ءدارىحانا مەن قويمالاردا 24 370 قوراپ پاراسەتامول 0،5 №10 بار، سونداي-اق «ينكار» جانە «مەدسەرۆيس پليۋس» كومپانيالارىنا 450 000 قوراپ ءدارى اكەلىندى. ولار ءقازىر كەدەندىك راسىمدەۋدە تۇر. ودان بولەك، پانادول، ەففەرالگان، فەرۆەكس، كولدرەكس، كۇن/ءتۇن، جانە باسقا دا قۇرامىندا پاراسەتامول بار دارىلەر جەتكىلىكتى. اسيكلوۆير دارىلىك زاتىنىڭ ۆيرۋسقا قارسى ۇقساس تۇرلەرى ينگوۆەرين، تاميفليۋ، كاگوسەل جەتكىلىكتى. 68 480 قوراپ ينگوۆەرين 90 ءدارىسى سەرتيفيكاتتان ءوتىپ جاتىر. شىلدەدە ساتىلىمعا تۇسەدى» دەدى دەپارتامەنتتەن.

ال تەرمومەترگە قاتىستى كوتەرمە فارمكومپانيالارمەن قازاقستانعا وسى مەديسينالىق بۇيىمدى جىلدام جەتكىزۋگە كەلىسسوز جۇرگىزىلىپ جاتىر. ءونىمدى وندىرەتىن ەلدەردە ۇلكەن سۇرانىس بولعاندىقتان (رەسەي، جۇڭگو حالىق رەسپۋبليكاسى) جانە باسقا دا ەلدەرگە شىعارلاتىندىقتان شەكتەلگەن كولەمدە جەتكىزىلىپ جاتىر.

«وسى مۇمكىندىكتى پايدالانا وتىرىپ، ءبىز حالىقتى ءوز بەتىنشە ەمدەلمەۋگە شاقىرامىز. اسىرەسە انتيبيوتيك قابىلداماۋ كەرەك. ويتكەنى بۇنىڭ سالدارى قايعىلى جاعدايعا اكەپ سوعۋى مۇمكىن. الەۋمەتتىك جەلىلەردە پايدا بولعان فەيك جاڭالىقتارعا سەنبەۋگە شاقىرامىز. اۋرۋدىڭ الدىن الۋ ماقساتىندا قازىرگى ۋاقىتتا دارۋمەنگە باي تاماقتاردى كوپ ءىشۋ قاجەت. ءدارىحانا ۇيىمدارىنا فارماسيەۆتيكالىق قاۋىمداستىق جانە تىكەلەي رەسەپتسىز وتكىزىلەتىن دارىلىك زاتتاردىڭ سانىن شەكتەۋدى ۇسىنامىز»، - دەدى دەپارتامەنتتەن.