سەرىك بايماعامبەتوۆ كولونيادا.

قازاقستاننىڭ ىشكى ىستەر ەكس-مينيسترى جانە رەسپۋبليكانىڭ كەدەندىك باقىلاۋ كوميتەتىنىڭ ەكس-باسشىسى سەرىك بايماعامبەتوۆ كولونيادا جالاڭاش كۇيدە ەدەن جۋۋعا ءماجبۇر بولعان. بۇل تۋرالى "قامشى" اقپاراتتىق پورتالى  tengrinews.kz-كە  سىلتەمە جاساي وتىرىپ حابارلايدى. 

شاحتينسك سوتىندا بايماعامبەتوۆ ىسىنە بايلانىستى اك 159/6 تۇزەتۋ كولونياسىنىڭ 25 جاستاعى جەدەل ۋاكىلىنىڭ ءىسى قارالىپ جاتىر.

 جەدەل ءبولىمنىڭ جاس قىزمەتكەرىنە بۇرىنعى ءىىم باسشىسى بايماعامبەتوۆتى  ازاپتادى دەگەن ايىپ تاعىلىپ  وتىر.

"سوتتالۋشى سەرىك بايماعامبەتوۆتى جالاڭاش كۇيدە تۇزەتۋ مەكەمەسىنىڭ عيماراتىندا ەدەن جۋعىزعان. سوتتالۋشىنى ايىپتى دەپ تانىپ، قك 141-بابىنىڭ 1-بولىگى بويىنشا ("ازاپتاۋ") جالپى رەجيمدەگى تۇزەتۋ كولونياسىنا ءۇش جىلعا باس بوستاندىعىنان ايىرۋدى سۇرايمىن"، - دەدى سوت تىڭداۋىندا مەملەكەتتىك ايىپتاۋشى تالعان الەكبايەۆ.

2013 جىلدىڭ قاراشاسىندا جانە 2014 جىلدىڭ ءساۋىر ايىندا ول جەدەل ۋاكىلدىڭ (ونىڭ ءاتى-جونى كورسەتىلمەيدى) ۆيپ-ارەستانتتى ەكى رەت قورلاعانىن قوسىپ ايتتى.

ەسكە سالا كەتەيىك، سەرىك بايماعامبەتوۆكە 2013 جىلدىڭ قاڭتار ايىندا 80 مىڭ دوللار كولەمىندە پارا الدى جانە قىزمەتتىك وكىلدىگىن تەرىس پايدالاندى دەگەن ايىپ تاعىلعان بولاتىن. سوت جوعارى لاۋازىمدى شەنەۋنىكتى 10 جىلعا باس بوستاندىعىنان ايىرىپ، قاراعاندى وبلىسىنداعى كولونياعا جىبەرگەن. 2014 جىلدىڭ جازىندا بايماعامبەتوۆتى بىرەۋلەردىڭ ۇرىپ-سوققانى جايلى مالىمەت تارالدى. ال 2015 جىلدىڭ اقپانىندا بايماعامبەتوۆ مەرزىمىنەن بۇرىن بوستاندىققا شىقتى.