قىتايدىڭ ورتالىعى بەيجىڭدە جەڭىستىڭ 70 جىلدىعىنا(گەرمانيا مەن جاپونيا باسقىنشىلارىنا قارسى) وراي وتەتىن اسكەري پارادقا جالپى سانى 12 مىڭنان استام سارباز قاتىسادى. ءقازىر جۇڭگو اۋقىمدى شاراعا دايىندالىپ جاتىر. ال اسكەريلەر بولسا، ازىرلىك شارالارىن ءۇش اي بۇرىن باستاپ كەتكەن. بۇل تۋرالى قامشى" اقپاراتتىق پورتالى  Baq.kz-كە سىلتەمە جاساي وتىرىپ حابارلايدى.

 جۇڭگو حالىقتىق ازات ەتۋ ارمياسىنىڭ بەتكە ۇستار ساربازدارى بەيجىڭنىڭ قاپىرىق ىستىعىندا ءۇش ايدان بەرى جاتتىعىپ كەلەدى. 40 گرادۋستا جاۋىنگەرلەر سۋ بولىپ تەرلەيدى. كەيبىرى بۇل قيىندىققا شىداماي تالىپ تا جاتتى. ءبىراق ءتارتىپ قاتال، تالاپ جوعارى. ساپ تۇزەپ ادىمداعاندا قالت كەتپەس ءۇشىن، كوزدەرىن بايلاپ، قۇمنىڭ ۇستىمەن جۇرەدى. جالپى جۇڭگو اۋقىمدى شارالاردى وتكىزگەندە ادام رەسۋرسىمەن تاڭقالدىرۋدان جالىققان ەمەس. بۇل جولى دا قىركۇيەكتىڭ ۇشىندەگى اسكەري پارادقا 12 مىڭنان استام جاۋىنگەر قاتىسادى.

 «مەن العاش جالاۋ ۇستاپ ءجۇرۋ مىندەتىن قابىلداپ العاندا ۇلكەن جاۋاپكەرشىلىكتى سەزىندىم. ابىرويلى ءىستى ءمىنسىز اتقارۋ ءۇشىن كۇنى-تۇنى جاتتىقتىم. دايىندىق بارىسىندا بايراقتىڭ سابىن اۋىر تەمىرگە ايىرباستاپ، ورنىقتى ادىمداۋ ءۇشىن، جالاۋدىڭ جوعارعى جاعىنا سۋ تولى ىدىس قويدىم. ساربازداردىڭ كوبى 20 جاس شاماسىندا، مەن 30-دان استىم، سوندىقتان وڭاي بولعان جوق»، – دەيدى اسكەري پارادتا تۋ ۇستاپ ءجۇرۋشى جاڭ حۋڭجيە.

 بيىلعى پارادتا جاياۋ اسكەر تورتكە ءبولىنىپ ونەر كورسەتەدى. جەڭىستىڭ 60 جىلدىعىمەن سالىستىرعاندا بۇل جولى ساربازدار سانى ازايتىلعان. «ءبىراق ساپاعا كوپ كوڭىل بولدىك»، – دەيدى ۇيىمداستىرۋشىلار. ايتپاقشى بيىل تۇڭعىش رەت قۇرمەتتى قاراۋىل قىزمەتىندەگى ايەلدەر اسكەري پارادقا قاتىسادى. اسكەري ساراپشىلاردىڭ ايتۋىنشا، وسى جىلى ءدۇيىم جۇرت قىتايدىڭ ەڭ وزىق قارۋى سانالاتىن، جەتىلدىرىلگەن ت99 تانكسىن كورە الادى. بۇدان بولەك، تيانانمىندەگى شەرۋگە 40 ءتۇرلى 500 تەحنيكا، 20 ءتۇرلى 200 ۇشاق شىعارىلادى. جالپى كورسەتىلەتىن تەحنيكانىڭ 84% العاش رەت جۇرت نازارىنا ۇسىنىلادى. وسى شەرۋگە قازاقستان قورعانىس مينيسترلىگىنىڭ قۇرمەتتى قاراۋىل روتاسىنان كەلگەن 100-گە جۋىق جەرلەسىمىز دە قاتىسادى. ءقازىر ولار قىتايلىق ارىپتەستەرىمەن بىرگە دايىندىق وتكىزىپ جاتىر.