الماتىلىق ورىكگۇل ادىلبەكوۆانىڭ رەسەي پرەزيدەنتى ۆلاديمير پۋتينگە ماداق  ءانىن جۇبايى ءشامىل ءابىلتاي نوتاعا ءتۇسىردى. ورىنداۋشى تالعات كۇزەنبايەۆ ءاندى ۆلاديمير ءپۋتيننىڭ الدىندا شىرقاۋدى ارماندايدى.

عالامتوردا Youtube سايتىندا جۇرگەن«ۆلاديمير پۋتين» اتتى ءاننىڭ اۆتورى الماتىلىق ورىكگۇل ادىلبەكوۆا بۇل شىعارمانىڭ دۇنيەگە كەلۋىنە 2014 جىلى كوكتەمدە ۋكراينا مەن رەسەي اراسىنداعى جاعدايدىڭ شيەلەنىسۋى سەبەپ بولعانىن ايتادى. بۇل تۋرالى "قامشى" پورتالى azattyq.org-كە سىلتەمە جاساي وتىرىپ حابارلايدى.

اۆتور ءاۋ باستا پۋتينگە ارناپ ءان شىعارامىن دەپ ويلاماعانىن، ءبىراق تەلەارنادان ۋكراينانىڭ شىعىسىنداعى دونباستا بولىپ جاتقان قاندى وقيعالاردى باياندايتىن حابارلاردى كورىپ وتىرعاندا، كوكەيىنە ولەڭ جولدارى مەن ءان اۋەنى قاتار كەلگەنىن ايتادى.

– ءۇشىنشى دۇنيەجۇزىلىك سوعىس باستالىپ كەتە مە دەپ قاۋىپتەندىم. رەسەي بىزگە اۋەلدەن جاقىن ەل، جاقسى كورشى عوي. جان-جاقتان قىسىپ جاتقاندا رەسەي پرەزيدەنتى ۆلاديمير ءپۋتيننىڭ قارسى كۇش قولدانباي، شىدامدىلىق تانىتقانىنا ريزا  بولدىم. بۇل – بەيبىتشىلىكتى ناسيحاتتاۋعا ارنالعان ءان. ول ءۇشىن الدەنە دامەتۋ ويىمدا دا جوق، - دەيدى ءان اۆتورى.

بۇرىن الماتىداعى مۇحتار اۋەزوۆ اتىنداعى تەاتردىڭ ءارتىسى بولعان ورىكگۇل ادىلبەكوۆا ءاندى كۇيەۋى ءشامىل ءابىلتايدىڭ نوتاعا سالىپ وڭدەگەنىن ايتتى.

قازاقستان پرەزيدەنتى نۇرسۇلتان نازاربايەۆقا ارناپ «ازاتتىق اسۋى» ءانى مەن «قازاقستان – نۇرسۇلتان» كۇيىن شىعارعان، نازاربايەۆتىڭ سوزىنە «شۇبارات» ءانىن جازعان كومپوزيتور ءشامىل ءابىلتايدىڭ سوزىنشە، ايەلىنىڭ پۋتينگە ارناعان ءانى وزىنە قاتتى ۇنعان ەكەن. ءان اۋەنىن وڭدەۋ بارىسىندا، ءشامىل ءابىلتاي ءاندى دومبىراعا سالىپ وڭدەپ، ءان ءسوزىن ورىسشاعا اۋدارۋدى ۇسىنىپتى.

ونىڭ ايتۋىنشا، وپەرا ءانشىسى تالعات كۇزەنبايەۆ ورىس تىلىندە ورىنداعان جاڭا ءان كومپاكت-ديسكىگە جازىلىپ، بىلتىر ۆلاديمير پۋتينگە پوشتامەن جىبەرىلگەن. ءان اۆتورى ورىكگۇل ادىلبەكوۆا «ەۋرازيا ەكونوميكا وداعى اياسىندا تابىسقا جەتۋگە» تىلەكتەستىگىن جازىپ، كرەمل باسشىسىنا حات جولداعان. ال بيىل ناۋرىز ايىندا رەسەي پرەزيدەنتى اكىمشىلىگىنەن قازاقستاننان سالەمدەمەنى العانى تۋرالى جاۋاپ حات العان.

ءشامىل ءابىلتايدىڭ ايتۋىنشا، ول «ۆلاديمير پۋتين» ءانى جازىلعان ءۇنتاسپانى وزگە اندەرىمەن بىرگە قازاقستان پرەزيدەنتى نۇرسۇلتان نازاربايەۆقا دا جولداعان ەكەن. كوپ كەشىكپەي پرەزيدەنت اكىمشىلىگىنەن كومپوزيتورعا العىس بىلدىرگەن حات كەلگەن. وندا: «پرەزيدەنت اكىمشىلىگىنىڭ جاۋاپتى قىزمەتكەرى وتەگەن ورالبايەۆ ارقىلى بەرىپ جىبەرگەن ءوز ورىنداۋىڭىزداعى اندەرىڭىز بەن كۇيلەرىڭىز جازىلعان كومپاكت-ديسكىلەرىڭىزدى الدىق. سولاردى مەملەكەت باسشىسىنا ۇسىنار كەزدە پرەزيدەنتكە ءوزىڭىزدىڭ جەكە جولداعان حاتىڭىز بەن ديسكىلەرىڭىز دە كەلىپ جەتتى.» دەپ جازىلعان.

«ۆلاديمير پۋتين» ءانىنىڭ ورىنداۋشىسى، الماتىداعى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ ءانشىسى، قازاقستاننىڭ مەملەكەتتىك ءانۇرانىن ورىنداۋشى تالعات كۇزەنبايەۆ بۇل ءاندى ءان ارنالعان رەسەي پرەزيدەنتى ۆلاديمير ءپۋتيننىڭ الدىندا ورىنداۋدى ارماندايدى ەكەن.

ەل مادەنيەتى قانشالىقتى جۇرتتان اراشالانىپ، دارالانىپ تۇرعانىمەن دارا پاتشالىق جۇيە رۋحاني سانامىزدان ءالى ارىلا قويماعان ەكەن. بيلىگى مىقتىعا باس يگەن قۇلدىق سانا ءوز قۇدىرەتىمەن مادەنيەت سالاسىن دا قۇر اينالىپ وتە الماپتى. رەسەيگە تاۋەلدىلىكتى ايقىندايتىن ءبىر دالەل رەتىندە  قازاقتىڭ بەتكە ۇستار باعىلاندارى  "ۆلاديمير پۋتينگە" جىر ارناپ كوسىلىپ جۇرگەندە جەتكەنمىز بەلگىلى ەكەن.

گۇلدەن ءابدىباقىت