الماتى قالاسىنداعى اسفەندياروۆ اتىنداعى مەديسينا ۋنيۆەرسيتەتىنىڭ 116 ستۋدەنتى جامبىل وبلىسىنىڭ بيۋدجەتىنەن بولىنگەن قارجى بويىنشا تەگىن ءبىلىم الىپ كەلگەن ەدى. بۇل تۋرالى "قامشى" پورتالى كتك تەلەارناسىنا سىلتەمە جاساي وتىرىپ حابارلايدى.

باستاپقىداعى ءۇشجاقتى كەلىسىم بويىنشا وقۋ اقىسىن وبلىس اكىمدىگى تولەمەك بولعان. ءبىراق بۇل كومەك كەزىندە جامبىل وبلىسىنداعى مامان تاپشىلىعىن جويامىن دەگەن نيەتپەن وسىنداي ۇيعارىم جاساعان قانات بوزىمبايەۆ باسقا ايماققا باسشى بولىپ كەتىسىمەن مۇلدەم توقتاپ قالىپتى. 

ەندى، ءارى قاراي ءبىلىم الامىن دەگەن تۇلەك وتكەن وقۋ جىلى ءۇشىن 400 مىڭ تەڭگە تولەۋگە مىندەتتى. بۇعان قوسا، ءار جىل سايىن 800 مىڭ تەڭگە وقۋ اقىسىن دا وزدەرى تولەيدى. ءبىراق اكىمدىك گرانتىمەن ءبىلىم الىپ كەلگەندەردىڭ ءبارى تۇرمىسى تومەن وتباسىدان شىققاندار. ال ەگەر ءتيىستى اقشانى تولەمەسە، 25 تامىزدان باستاپ وقۋدان شىعارىلماق. دارىگەر بولسام دەگەن 116 تۇلەكتىڭ ارمانى وسىلايشا اتقامىنەرلەردىڭ كەسىرىنەن كوككە ۇشقالى وتىر.

و باستا مەكتەپ تۇلەكتەرىنە ءۇمىت سىيلاپ، تەگىن وقىتامىز دەگەن اكىمدىك وكىلدەرى ەندى تىلشىلەرگە دە تۇسىنىكتەمە بەرۋدەن باس تارتتى. جاقىن ارادا ماسەلەگە قاتىستى كەزەكتى سوت وتىرىسى وتپەك. ال ءبىرىنشى سوت وتىرىسىندا جامبىلدىق جاستارعا شكەنەۋنىكتەر بولگەن گرانتتىڭ زاڭسىز ەكەنى انىقتالعان. ءبىر انىعى، وبلىس بيۋدجەتىندە جىل سايىن ءار ستۋدەنتكە 800 مىڭ تەڭگە تولەيتىندەي قارجى دا جوق ەكەن.

ال مەديسينا ۋنيۆەرسيتەتىنىڭ باسشىلىعى كۇتۋگە قاۋقارسىز. دارىگەر بولۋدى ارمانداعان ستۋدەنتتەر ەندى جاڭا وقۋ جىلى باستالار تۇستا وقۋدان شىعارىلماق. شەنەۋنىكتەردەن قايىر بولماي، ابدەن ءۇمىتى ۇزىلگەندەر سوتتان شاعىمدارىن قايتىپ الىپ جاتىر. ال وقۋ اقىسىن داۋلاعان 116 شاكىرتتىڭ وتىزعا جۋىعى ويىمىزداعىنى ورىنداتپاي قويمايمىز دەپ وتىر.