ەكەۋى دە قاتارداعى كولدەنەڭ كوك اتتى ەمەس؛ ويى كەم، مويىنى بوس، وڭاي شاعىلار جاڭعاق تا ەمەس...ءبىرىنشىسى - الاشتىڭ ادۋىندى ءھام ورالدىڭ وراق ءتىلدى ايتىسكەر اقىنى باۋىرجان حاليوللا. ايتىستا الدىنا تەكسىز تۇياق تۇسىرمەگەن كوپتەگەن حالىقارالىق، رەسپۋبليكالىق ايتىستاردىڭ جەڭىمپاز-جۇلدەگەرى، «جۇمباق قىزدىڭ جانارى» («جازۋشى» باسپاسى، 2001)، «نازىك بۇلت كوشىپ بارادى» (ورال، 2005)، «جۇلدىز جاۋعان جارىق ءتۇن» (2012 جىل، ورال) اتتى جىر جيناقتارىنىڭ اۆتورى باۋىرجان باتىس قازاقستان وبلىسى، سىرىم اۋدانىنىڭ قوسوبا اۋىلىندا 1979 جىلى دۇنيەگە كەلدى.
«...مىنەزىم ءۇشىن وتە كوپ تاياق جەدىم. ءبىراق كوزبەن كورىپ تۇرعان نارسەنى قالاي بۇرمالاپ جەتكىزەسىڭ؟ جاعىمپازدىق قانىما جات...» – دەيتىن ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىنىڭ تۇلەگىنىڭ جۇمىر باسىنا نە زاۋال سوقپادى دەرسىڭ؟!.
قاشاندا ءبىر شەڭبەردىڭ اياسىنا سىيماي ويىن ەركىن جەتكىزىپ، كوبىنە جۇمىسسىز جۇرەتىن باۋىرجان قاليوللانىڭ: «اكەمنەن سەگىز جاسقا تولار-تولماس شاعىمدا جەتىم قالدىم. سودان كەيىنگى كورگەن شەشەمنىڭ بەينەتى كوز الدىمدا. ەندى قىزىق كورەم بە دەگەندە، ماڭگىلىك ۇيقىعا كەتە باردى. ەگەر مەنەن «وكىنىشىڭىز نە؟» دەپ سۇرار بولسا، «انامدى باقىتتى ەتە الماعانىم» دەر ەدىم. اللادان كەيىنگى ادامزاتتىڭ اسىلى انالار – سەندەر امان بولىڭدارشى. ءبىز سىزدەردى ايالاۋ ءۇشىن جارالعانبىز» – دەگەن جان سىرى ميلليونداعان ادامداردىڭ جۇرەگىن جىلىتىپ، جاندارىن مۇڭعا كومدى...
... ءسوز جوق، «ايتىسقا قۋارىپ كەلىپ، قۋانىپ قايتامىن» دەگەن حاليوللا ءبارىبىر ەلىنىڭ تاعدىرىنا ەلەڭدەمەي جۇرە المادى، كوزبوياۋ جاسالعان جالعان شارۋالاردى؛ توپاس-توعىشارلاردىڭ مىسىقتىلەۋلىگىن جۇمسارتىپ ايتىپ، جانامالاپ جەتكىزدى. اقىرىندا: «قىرىمبەك كوشەربايەۆ كەتكەلى بىزدەگى مادەني سالادان ءمان كەتتى. مادەنيەتىمىز مۇگەدەك، ادەبيەتىمىزدىڭ جاعدايى ءالجۋاز كۇيگە ءتۇستى» دەگەن تۇجىرىممەن توقتاپ، دەم باستى...
ءيا، اقىننىڭ الاساپىران ىشكى-الەمى جايىقتىڭ تولقىندارىنداي تىنىم تاپپاي، تالاي شايقالىپ، شىرىن تولعامدار ايتتى:
1. «مەنىڭ بارلىق تاعدىرىم كونە شاھار ورالمەن، كارى وزەن اق جايىقپەن تىعىز بايلانىستى...»
2. «كوڭىلىم دالانى اڭسايدى دا تۇرادى. تاس قالانىڭ تاس باۋىر تىرشىلىگى ادامدى باۋىرمالدىقتان، مەيىرىمنەن، ودان قالسا، تابيعي شىنايى سەزىمنەن الشاقتاتىپ جىبەرەدى...»
3. «مەن، نەگىزى، قۇداي ماڭدايىما نەسىبەسىن مول جازعان اداممىن.»
...راس ەكەن. ءبىر بۇرىلىس-بۇلقىنىستا: «مەنىڭ الاڭدايتىنىم، ايتىس ونەرىندە باتىس وڭىرىندە ءوسىپ كەلە جاتقان ورىمدەي جاستار كوپ. اتتەڭ، ماڭدايىنان سيپايتىن ادام جوق. ويىما العان جوسپارىم جەتەرلىك، قايسىسىنا ۇلگەرىپ، نە ۇقساتارىمدى ۋاقىت كورسەتەر…» - دەگەن باۋىرجان حاليوللا باۋرىمنىڭ نەسىبەسى ءناسىپ بولىپ، وبلىستىق جاستار شىعارماشىلىق ورتالىعىنىڭ ديرەكتورى ورىنتاعىنا وتىردى.باياندى بولسىن!
...اتقا قونعان اق جايىقتىڭ تاعى ءبىر اردا ۇلى – ارتۋر نىعمەتوۆ. ارتۋر – پۋبليسيست، ساياساتتانۋشى. 2007 جىلى باتىس قازاقستان مەملەكەتتىك ۋنيۆەرسيتەتىنىڭ تاريح فاكۋلتەتىن ءتامامدادى. ماسكەۋ ساياسي زەرتتەۋلەر مەكتەبىنىڭ تۇلەگى. شۆەسياداعى SIPU International (ستوكگولم، 2008) مەملەكەت جانە جەرگىلىكتى باسقارۋ ينستيتۋتى مەن كونراد ادەناۋەر قورىندا (بەرلين، 2012) تاعىلىم-سىناقتارىنان وتكەن. «نازاربايەۆ ورتالىعىندا» باس ساراپشى دا بولدى.
قازاقتىڭ مۇڭ-مۇددەسىن تۋرا ايتىپ، باعىتىنان جاڭىلماعان ارتۋر ءىنىمىز 2012 جىلى «حالىق قالاۋلىسى» سىيلىعىنىڭ «ۇزدىك پۋبليسيست» نوميناسياسى بويىنشا لاۋرەات اتاندى. 2014 جىلدان بەرى «Smart Advice» كوممۋنيكاسيالىق توبىنىڭ باسقارۋشى سەرىكتەسى بولىپ، جىل سوڭىندا «نۇر وتان» پارتياسىنىڭ قوعامدىق ساياسات ينستيتۋتى ديرەكتورىنىڭ شتاتتان تىس كەڭەسشىسى قىزمەتىنە كىرىستى. مۇندا نىعمەتوۆكە ينستيتۋتتىڭ جوبالاۋ ىستەرى بويىنشا تاۋەلسىز كەڭەستەر بەرۋ مىندەتتەرى جۇكتەلدى.
وركەني زاماننىڭ تىڭ تەتىكتەرىن تولىق مەڭگەرىپ، الەمنىڭ بىرنەشە ەلدەرىنىڭ تاجىريبەلەرىن بويىنا تەرەڭ سىڭىرگەن ارتۋر نىعمەتوۆ الماتى قالاسىنىڭ اكىمى باۋىرجان بايبەكتىڭ باسپا ءسوز قىزمەتى جەتەكشىلىگىنە تاعايىندالادى.
قاجىمۇقان عابدوللا
