نۇرتاس ادامبايەۆ «ءسابينا كەلىن-2» ءفيلمىنىڭ ءتۇسىرىلىم جۇمىستارىنىڭ اياقتالعاندىعى تۋرالى ءوزىنىڭ  «Facebook» پاراقشاسىندا حابارلادى. ول فيلم كورەرمەندەر نازارىنا كەلەر جىلدىڭ اقپان نەمەسە ناۋرىز ايلارىندا ۇسىنىلماق.  بۇل تۋرالى «قامشى» پورتالى حابارلايدى. كارتينا اۆتورىنىڭ ايتۋى بويىنشا بۇل فيلم كوپتەگەن قىزعا جاقسى ۇلگى بولارلىق تاربيەلىك ءمانى بار تۋىندى ەكەن. كينو  الماتى وبلىسىنىڭ جامبىل اۋدانىنا قاراسىتى دەگەرەس اۋىلىندا تۇسىرىلگەن. ءتۇسىرىلىم بارىسىندا اۋىلدىقتار مەن شىعارماشىلىق ۇجىم اراسىندا كەلىسپەۋشىلىكتەر دە بولعان. دەگەرەستىكتەر اۋىلىن كەلەمەج ەتكەن شىعارماشىلىق ۇجىمعا وكپەلى كورىنەدى. دەگەرەس اۋىلىنىڭ تۇرعىنى ەلنۇر بەيسەن ۇلى «ءسابينا كەلىن» فيلمىندەگى كينوشىلاردىڭ جاستاردىڭ نەكە تويىنداعى ءليمۋزيننىڭ ورىنا ەسەك پەن اربانى بەزەندىرۋى- اۋىلدىقتاردىڭ نامىسىنا ءتيدى دەپ ەسەپتەيدى. «مەن كينو تۇسىرۋشىلەردىڭ ول ارەكەتىن قازاقتى كەلەمەجدەۋ دەپ بىلەمىن. دالاعا توي جاساتىپ، ەسەكپەن جاستاردى قىدىرتۋ دەگەن نە سۇمدىق؟ قاي اتامىز ەسەكتى مال ساناپ ەدى. ءبىزدىڭ اۋىلدا ەسەك بالالاردىڭ ويىنشىعى. تارپاڭ تۇلپارعا مىنۋگە ءالى شاماسى جەتە بەرمەيتىن 4 جاسار بالالار ەسەكپەن وينايدى. ويىن بالاسىنىڭ ەسەگىن ۇستاپ الىپ، « قازاقتار وسىلاي توي جاسايدى»، - دەگەندەرىنە جول بولسىن. كەرىسىنشە، دەگەرەس -الەمگە جۇيرىك جىلقىلارىمەن اتى ءماشھۇر بولعان اۋىل. ال قازاقتار تويىندا ەسەكتى سالتاناتتى ەتىپ بەزەندىرىپ مىنەدى دەگەن شىلعي وتىرىك. بانكتەن نەسيە السا دا، بالاسىنا ءبىر توي جاساپ، اپپاق ماشيناعا مىنگىزەتىن دە قازاقتار ەمەس پە؟ قازاقتىڭ نەسيەگە العان اقشاسىن قالتاسىنا باسىپ، ءوزىن كەلەكە  ەتىپ كەتەتىن جۇلدىزدارعا اۋىلدىقتاردىڭ وكپەسى قارا قازانداي. ءبىز وسى فيلم ارقىلى نۇرتاس كۇللى قازاقتى كەلەمەجگە اينالدىردى دەپ ەسەپتەيمىز. »،-دەدى اۋىل تۇرعىنى .

 "ءسابينا كەلىن" كومەديالىق ءفيلمىنىڭ ءبىرىنشى ءبولىمى بەس كۇن ىشىندە پروكاتتا 600 مىڭ دوللار اقشا جيناعان بولاتىن. ءسابينا كەلىن تۋرالى ءفيلمدى تۇسىرۋگە 300 مىڭ دوللار (54،6 ميلليون تەڭگە) جۇمسالعان.

اينۇر تولەۋ