جاس تىڭدارمانداردىڭ نازارىنا ىلىگە  باستاعان ءانشى  اليشەر قايرات ۇلى «قامشى» رەداكسياسىنا ات باسىن بۇرىپ ەدى. وقىرماندارعا انشىمەن وربىگەن اڭگىمەمىزدى ۇسىنامىز.

-اليشەر، قايرات نۇرتاس پەن بىرلەسكەن بەينەبايانىڭىز حالىق قوشەمەتىنە يە بولدى.  قايرات نۇرتاسپەن قالاي سەلبەستىك جاسادىڭىزدار؟

- بۇل جوبا وسىدان ەكى جىل بۇرىن بولعان. دۋەت جازۋعا "الماتى ءتۇنى" ءانى سەبەپكەر بولدى. مەن وسى ءاندى قايرات نۇرتاسپەن ورىنداۋدى ءجون كوردىم دە، بۇل ءاندى وعان بىرگە شىرقاۋعا نيەتتى ەكەنىمدى ايتتىم. بۇل ءان العاش قايرات اعانىڭ ءان كەشىندە ورىندالعان بولاتىن. «الماتى ءتۇنى» ءانى مەنىڭ ونەرگە كەلۋىمنىڭ العاش باستاماسى، باسپالداعى رەتىندە قالىپتاستىرعان ءان بولىپ قالدى. ول ءان كۇز مەزگىلىندە شىققانىمەن، تارالىمى، تىڭدارمانى كوپ بولعان سوڭ، بەينەباياندى جاز مەزگىلىندە تۇسىردىك. ءبىر قىزىعى، ءبىز بەينەباياندى ءتۇسىرۋ بارىسىندا جاڭبىر كۇن سايىن جاۋىپ، كەدەرگى كەلتىرىپ تۇردى. ءبىراق، بەينەبايان ءوز دەڭگەيىمەن ءساتتى شىقتى.

- ءسوزىڭىزدى قايرات اعا دەپ ساباقتاپ وتىرسىز، ءسىز ودان قانشا جاسقا كىشىسىز؟

-مەن 1997 جىلى 18 قاڭتاردا تالدىقورعان  قالاسىندا  دۇنيەگە كەلگەنمىن.

ء-سىزدى ستۋدەنت دەپ ەستىپ ەدىم...

- قازىرگى تاڭدا ءال-فارابي اتىنداعى قازۇۋ-دە "قۇقىق" فاكۋلتەتىندە ءبىلىم الىپ جاتىرمىن. ال، ونەر جاعىنا كەلەتىن بولساق، بي جانە ۆوكال جاعىنان مامانداردان ساباق الىپ ءجۇرمىن.

- وسى ۋاقىتقا دەيىن قانداي جەتىستىكتەرگە جەتتىڭىز؟

- وسى ۋاقىتقا دەيىن كىشىگىرىم جەتىستىكتەرگە ەڭبەگىمنىڭ ارقاسىندا قول جەتكىزىپ كەلەمىن، الدا تالاي بەلەستەر بار سولاردى باعىندىرام دەپ ويلايمىن.

- ءان كەشىن وتكىزىپ كوردىڭىز بە؟

- الماتىدا 3 رەت كونسەرتىمىدى بەردىم. وتانىمىزدىڭ قالالارىن دا ارالاۋدى باستاعان بولاتىنمىن. وسى ۋاقىتقا دەيىن 50 شاقتى كونسەرتىمدى وتكىزىپ ۇلگەردىم.

- جاس بولساڭىز دا، جەتىستىگىڭىز مول ەكەن. ءبىراق، جىلت ەتىپ شىققان جاستاردىڭ بارلىعى ۇلتقا ەڭبەك ەتسە دەگەن نيەتىمىز بار.  سىزدە ۇللتىق مۇددە بار ما؟ الدە ساحنالىق ونەر يەلەرىن، ونىڭ ىشىندە جاس ەستراداشىلاردى بۇل مۇددەنىڭ توڭىرىگىنەن بايقاۋ مۇمكىن ەمەس پە؟

- ونىڭ ءبارى الداعى ۋاقىت ەنشىسىنىدە، ۇلت ءۇشىن جاقسى ماتەريالدار، جوسپارلار جاسايمىن،  بارىمدى بەرەم دەپ ويلايمىن. ارىق ايتىپ سەمىز شىق دەيدى عوي. مەن ، مەن دەپ كەۋدەنى كەرىپ تاستاپ، ەرتەڭ كۇلكىگە قالعىم كەلمەيدى.

- رەنجىمەڭىز، ءبىراق، ءسىز ونەر ورتاسىندا اسا تانىمال ەمەسسىز. بۇل ەندى مەنىڭ ويىم عوي. ال ءسىز قالاي ويلايسىز، مۇمكىن مەن قاتەلەسىپ وتىرعان بولارمىن.

- مەن ءوزىمدى تانىمالدىعىم جايلى ايتا المايمىن. حالىق ءبارىن وزدەرى سارالاپ،  ءوز قالاۋلارىن وزدەرى  تاڭدايدى.

- ونەر جولىندا العا قويعان ماقساتىڭىز قانداي؟

- ونەر جولىنىڭ  باستاعان سوڭ، سوڭىنا دەيىن جەتكىزەمىن. جاقسى بەينەباياندار مەن جاقسى اندەرىممەن قۋانتامىن.

-  وتباسىڭىز جايلى جانە دە جەكە ءومىرىڭىز حاقىندا ايتىپ كەتسەڭىز؟

- وتباسىمىزدا 6 جانبىز. اكەم، انام، اعام-اركەن، ەكىنشىسى - مەن، ودان كەيىن ابىلاي ءىنىم، سوسىن تۋعانىنا ءبىر جاس بولعان كىشكەنتاي قارىنداسىم بار. جەكە باسىما كەلەتىن بولسام-باسىم بوس.

- كەشە عانا ارىپتەسىڭىز اشا ماتاي ءۇندىنىڭ ستيلىندە قىز عۇمىرىمەن قوشتاسقان كەشىن وتكىزگەن. قازاقى قۇندىلىعى جوق باسقانىڭ سالتىن دارىپتەگەن ءانشىنى ينتەرنەتتەگى پاراقشاسىندا تىڭدارماندارى سىننىڭ استىنا العان بولاتىن. وسىنداي ۇلتتىق ونەردى كومەسكىلەۋدىڭ كورىنىسىنە ءسىزدىڭ ايتارىڭىز بار ما؟

- ءار ادامنىڭ جان قالاۋى بار. ءبىر جاقتى پىكىرمەن كوزقاراس تانىتۋعا بولمايتىن شىعار.

- ءقازىر دەمەۋشىڭىز (پروديۋسسەرىڭىز) بار ما؟

- پروديۋسسەرىم جوق. دەمەۋشى دەگەن ول قارجىلىق جاعىنان قولداۋ كورسەتەتىن ادام. ال مەنىمەن ديرەكتور، پيار مەنەدجەر، ادمينستراتور سول قاتارلى ادامدار جۇمىس جاسايدى. قارجىلاي كومەكتى جوباما قاراي دوستارىم  جاسايدى.

- "شوۋ بيزنەس" دەپ جاتامىز ول بولەك، "توي بيزنەسىڭىز" قالاي؟ تابار تابىسىڭىز قانشالىق؟ ديەۆالۆاسيا توي بيزنەسىڭىزگە اسەرىن بەرىپ جاتىر ما؟

- ارينە، ءار ءانشىنىڭ 80% تابىس كوزى تويدان كەلەدى. ءقازىر ديەۆالۆاسياعا بايلانىستى باعانى تۇسىردىك. ديەۆالۆاسيا تەك قانا بىزگە ەمەس، باعانىڭ كوتەرىلۋى، ازىق-تۇلىكتىڭ قىمباتتاۋى - بارشا حالىققا اسەر ەتىپ جاتىر.

- ونەردەگى ۇلگى تۇتارىڭىز كىم؟

- قازاقستاندا "مۋزاات" توبىنىڭ ءانشىسى مەيرامبەك بەسپايەۆ سىندى ەل القاۋىنا بولەنگەن اعالاردان ۇيرەنەرىم كوپ. ال، شەتەلدە دجاستين تيمبەرلەيك قاتارلى انشىلەردى ۇلگى تۇتامىن.

- "پوتومۋ چتو، شىمكەنتسكيي" فيلمىندە ءوز پروديۋسسەرلىك قىرىڭىزبەن تانىلعان بولاتىنسىز. وسى فيلم تۋرالى ايىتىپ كەتسەڭىز؟ حالىق اراسىندا فيلمگە سۇرانىس قانداي بولدى؟

- مەنىڭ انشىلىك قىرىمنان دا، اكتەرلىك قىرىمنان دا بولەك بۇل فيلم ەڭ العاشقى جوبام  بولدى. مەنىڭ وسى ءفيلمدى تۇسىرگەن كوماندام جاقسى بولعان سوڭ دا، بۇل فيلم جاقسى ناتيجەمەن شىقتى. حالىق زور ىلتيپاتىمەن قابىلدادى. قارجى جاعىنا كەلەتىن بولساق، سەرىكتەستىكتىڭ ارقاسىندا قارجىلىق جاعىنان كومەك بولدى. ءبىراق فيلمگە كەتكەن شىعىننىڭ ءۇش ەسەسىن فيلم ءوزى قايتارىپ الدى.

-  سۇحباتتاسقانىڭزعا راقمەت! ونەرىڭىزگە شىعارماشىلىق تابىس تىلەيمىن!

-  سىزگە دە راحمەت!

سۇحباتتاسقان  گۇلدەن ءابدىباقىت