سەنبى، 9 قازان كۇنى وبلىس اكىمى وڭداسىن ورازالين بوكەنباي باتىر كوشەسى مەن ترياتلون-پاركىندە جالپىقالالىق كۇزگى اعاش وتىرعىزۋ باعىتىندا ۇيىمداستىرىلعان «ءوز اعاشىڭدى وتىرعىزىپ – قالامىزدىڭ كوگالدانۋىنا ۇلەسىڭدى قوس!» اكسياسىنا قاتىسىپ، جەمىس اعاشتارىن وتىرعىزدى. يگى شاراعا قالا اكىمى اسحات شاحاروۆ، وبلىستىق باسقارمالاردىڭ ماماندارى مەن قالا تۇرعىندارى قاتىستى.
«مەملەكەت باسشىسىنىڭ ەلىمىزدەگى ورمان القاپتارىن ۇلكەيتۋ تاپسىرماسىنا وراي، وبلىسىمىزدىڭ اۋماعىن جاسىل جەلەكتەندىرۋ بويىنشا كوپتەگەن جۇمىستار اتقارىلۋدا. ەستەرىڭىزدە بولسا، بيىلدىڭ وزىندە بارلىق اۋدانداردىڭ ورمان شارۋاشىلىقتارىنا جاڭا تەحنيكالار مەن قاجەتتى قۇرال-جابدىقتار ساتىپ الىندى. قالامىزدىڭ كوركىن اشاتىن گۇلدەردى ەگۋ، اعاش-تالداردى وتىرعىزىپ، كۇتىپ-باپتاۋ، ءوسىرۋ ءاربىر تۇرعىننىڭ مىندەتى. ءوز اۋلاسىن كوگالداندىرىپ، جاسىل جەلەكپەن كومكەرۋ - بۇل مادەنيەتتىلىكتىڭ بەلگىسى»، - دەدى ايماق باسشىسى.
وبلىس اكىمى سودان كەيىن تۇڭعىش پرەزيدەنت اتىنداعى ساياباقتا ورمان شارۋاشىلىقتارى جانە اۋدان كاسىپكەرلەرىنىڭ قاتىسۋىمەن ۇيىمداستىرىلعان كوپ جىلدىق گۇلدەر مەن كوشەتتەر جارمەڭكەسىنە قاتىسىپ، شارۋا قوجالىقتارىنىڭ جاي-كۇيىمەن تانىستى.
شارا سوڭىندا وڭداسىن ورازالين جالپىقالالىق كۇزگى اعاش وتىرعىزۋ اكسياسىنىڭ ماڭىزىنا توقتالىپ، وسى شارانى جىلىنا ەكى رەت جۇيەلى تۇردە وتكىزىپ تۇرۋدى ايتىپ ءوتىپ، قالا اكىمىنە ءبىرقاتار تاپسىرمالار بەردى.
