استانادا قالامگەرلەر اللەياسىندا «ۇلتتىق ويىندار – بابادان قالعان اسىل قازىنا» ءىس-شاراسى ۇيىمداستىرىلدى، دەپ حابارلادى ەلوردا اكىمدىگىنىڭ رەسمي سايتى.

وتباسىلىق ويىندار جارىسىنىڭ باستى ماقساتى – جاس ۇرپاققا ۇلتتىق ويىنداردى ناسيحاتتاۋ.

«استانا قالاسى ورتالىقتاندىرىلعان كىتاپحانالار جۇيەسى بۇگىن 5ء-شى دۇنيەجۇزىلىك كوشپەندىلەر ويىندارى اياسىندا وسىنداي ءىس-شارانى ۇيىمداستىرىپ وتىر. بۇل جارىس سول ەلىمىزدە بولىپ جاتقان ويىنداردىڭ جالعاسى ىسپەتتى. ەلىمىزدىڭ ابىرويىن اسقاقتاتقان سپورتتىق دوداعا قوسقان ۇلەسىمىز دەپ بىلەمىز. مەرەكەگە وراي كىتاپ كورمەسى دە كوپشىلىك نازارىنا ۇسىنىلدى. ماقساتى – ءوزىمىزدىڭ ۇلتتىق ويىندارىمىزدى ءارى قاراي دامىتۋ. ويتكەنى جاسوسپىرىمدەر بابادان كەلە جاتقان اسىل مۇرالارىمىزدى ۇمىتپاۋى كەرەك دەپ ەسەپتەيمىز»، - دەدى استانا قالاسى ورتالىقتاندىرىلعان كىتاپحانالار جۇيەسى باسشىسى گۇلبادام مادىبايەۆا.

ونىڭ ايتۋىنشا، قاتىسۋشىلار – قالا مەكتەپتەرىنىڭ وقۋشىلارى، ياعني كىتاپحانانىڭ بەلسەندى وقىرماندارى.

ءىس-شاراعا 40-قا جۋىق مەكتەپ وقۋشىسى قاتىستى.

ءىس-شارانىڭ اشىلۋىندا «ەلوردا اقساقالدارى كەڭەسى» قوعامدىق بىرلەستىگىنىڭ ءتوراعاسى انۋاربەك ەرالى، سارىارقا اۋدانى ارداگەرلەر كەڭەسىنىڭ ءتوراعاسى ەركىن نۇرعازين جارىسقا قاتىسۋشىلارعا ۇلتتىق ويىنداردىڭ تۇرلەرىن ايتىپ، ماڭىزىن ءتۇسىندىردى. سونداي-اق، جاس سپورتشىلارعا ساتتىلىك تىلەدى.

ءۇش توپقا بولىنگەن جارىس قاتىسۋشىلارى توعىزقۇمالاق، اسىق اتۋ، ارقان تارتۋ جانە سۇراق-جاۋاپ ويىندارىندا ءوزارا ب ا ق سىنادى.

وتباسىلىق ويىندار جارىسىنىڭ قورىتىندىسىندا ۇزدىك شىققان قاتىسۋشىلار ماراپاتتالدى.