ءماجىلىستىڭ جالپى وتىرىسىندا جوعارى اۋديتورلىق پالاتانىڭ ءتوراعاسى ءاليحان سمايىلوۆ مەملەكەتتىك حولدينگتەردىڭ اكتيۆتەردى باسقارۋ تيىمدىلىگىن قاتاڭ سىنعا الدى. ونىڭ ايتۋىنشا، «بايتەرەك» ۇلتتىق باسقارۋشى حولدينگى مەن «سامۇرىق-قازىنا» ءال-اۋقات قورى اكتيۆتەردى ۇتىمسىز پايدالانىپ وتىر.

— جەكەشەلەندىرۋدىڭ 2021–2025 جىلدارعا ارنالعان كەشەندى جوسپارىن ىسكە اسىرۋ قارقىنى كۇرت تومەندەدى. 2024 جىلى نەبارى 14 نىسان جەكەشەلەندىرىلگەن. بۇل – وتە تومەن كورسەتكىش. وڭ ناتيجە رەتىندە رەسپۋبليكالىق بيۋدجەتتەن كۆازيمەملەكەتتىك سەكتوردى قارجىلاندىرۋ كولەمىنىڭ 29%-عا قىسقارعانىن ايتۋعا بولادى. الايدا بۇل سالاداعى باسقارۋ ساپاسى ءالى دە الاڭداتارلىق دەڭگەيدە، — دەدى سمايىلوۆ.

پالاتا ءتوراعاسى كۆازيمەملەكەتتىك سەكتورداعى بىرنەشە ناقتى ولقىلىقتى دا اتادى.

— «بايتەرەك» حولدينگىنە قاراستى كومپانيالار جەڭىلدىكپەن بەرىلەتىن قارجىلىق رەسۋرستاردى تۇپكىلىكتى الۋشىلارعا جەتكىزۋدى تىم كەشىكتىرىپ وتىر. جوبالاردى ىرىكتەۋ كەزىندە اشىقتىق جوق. كەي جاعدايلاردا KPI كورسەتكىشتەرى ورىندالماسا دا، قولداۋ كورسەتىلگەن. ال كەي جوبالاردا قارسى مىندەتتەمەلەر مۇلدەم قاراستىرىلماعان، — دەدى ول.

سمايىلوۆتىڭ مالىمدەۋىنشە، «سامۇرىق-قازىنا» قورى جالپى قۇنى 239 ملرد تەڭگە بولاتىن تاۋ-كەن، مەتاللۋرگيا جانە ونەركاسىپ سالالارىنداعى 13 جوبانى توقتاتىپ تاستاعان. بۇل ۇلتتىق ەكونوميكانىڭ ستراتەگيالىق سەكتورلارىنا كەرى اسەر ەتۋى مۇمكىن.

وتىرىستا ءاليحان سمايىلوۆ ەلىمىزدە ءىرى سالىق تولەۋشىلەرگە جۇرگىزىلەتىن مونيتورينگتىڭ جۇيەسىز ەكەنىن دە اتاپ ءوتتى. ونىڭ ايتۋىنشا، بۇل سالىقتىق باقىلاۋدىڭ تيىمدىلىگىن تومەندەتىپ، بيۋدجەت كىرىسىن ارتتىرۋعا كەدەرگى كەلتىرەدى.