ەركىن يسليام ۇلى شەريازدانوۆ مارقاكول اۋدانىنىڭ تۋماسى. 1974 جىلى بوران اۋىلىنداعى اتاقتى ۇستاز قۇماش نۇرعالييەۆ اتىنداعى ورتا مەكتەپتى بىتىرگەن سوڭ سەمەي مەديسينا ينستيتۋتىنىڭ ەمدەۋ ءىسى فاكۋلتەتىنە وقۋعا ءتۇسىپ، ونى 1980 جىلى بىتىرگەن سوڭ جولدامامەن ريددەر قالاسىنا قىزمەتكە كەلەدى. ال 1981 جىلدان 1997 جىلعا دەيىن سامار اۋىلىنداعى اۋرۋحانادا حيرۋرگ، بولىمشە مەڭگەرۋشىسى قىزمەتىن اتقارادى.
قالاداعى 60 جىلدىق تاريحى بار جالعىز جەدەل جاردەم اۋرۋحاناسىنا جابىلۋ ءقاۋپى تۋدى
سامار اۋداندىق اۋرۋحاناسىندا قىزمەت ەتكەن جىلدار ىزدەنىس، ءوسۋ مەن تاجىريبەنىڭ قالىپتاسۋىن قامتاماسىز ەتتى دەۋگە نەگىز بار. سول كەزدە تاجىريبەلى حيرۋرگتەر امانجول ءجۇنىسوۆ، سايلاۋحان كۇدەربايەۆ، امانگەلدى قايسانوۆ سياقتى اعالارى جاس مامانعا بىلگەندەرىن ۇيرەتۋدەن جالىقپادى. حيرۋرگ – كۇر­دەلى ماماندىق، ءتۇرلى ىشكى جاراقاتتار مەن اۋىر جارالانعاندارعا وتا جاساۋ ءۇشىن قايتپاس قايسارلىق پەن باتىلدىق، ەرجۇرەك بولۋ قاجەت دەپ اقىلىن ايتاتىن اعالارى. بىلىكتى دە ءبىلىمدى اعالارىنىڭ اقىلى، نەبىر اۋىر وتا جاساعان كەزدە تاپقىرلىق پەن قيىننان قيىستىراتىن ادىس-تاسىلدەرى ەركىن يسليام ۇلىنىڭ ومىرلىك كرەدوسىنا اينالدى دەسەك، ارتىق ايتقاندىق ەمەس.
اۋداندىق اۋرۋحانادا قىزمەت ەتكەن جىلدارى ەركىن يسليام ۇلى شالعايداعى اۋىلدارعا، شوپاندار مەكەندەپ جاتقان جايلاۋعا ءجيى شىعىپ، ولارعا جەدەل كومەك كورسەتەتىن. بىردە كوكجوتا اۋىلىندا مەكتەپتە وقيتىن بالا قاتتى ناۋقاستانىپ قالدى دەگەن حاباردى ەستىسىمەن جولعا شىعادى. شىنىندا دا، بالانىڭ ناۋقاسى اۋىر ەكەن، جەدەل وتا جاسالماسا سوقىرىشەگى جارىلىپ كەتۋى مۇمكىن. ونى سامارداعى اۋرۋحاناعا تەز جەتكىزىپ، وتا جاساعان سوڭ ناۋقاس ءتاۋىر بولدى. ال اۋداندا قىزمەت ەتكەن 16 جىلدا ەركىن شەريازدانوۆ مىڭنان استام ادامدى شيپالى قولىمەن ەمدەدى.
1997 جىلى بىلىكتى حيرۋرگتى وسكەمەندەگى جەدەل جاردەم اۋرۋحاناسىنىڭ ەكىنشى حيرۋرگيا بولىمشەسىنە قىزمەتكە شاقىرادى. مىنە، سوڭعى 18 جىلدان بەرى ە.شەريازدانوۆ ءبىر ورىندا جەمىستى قىزمەت ەتىپ كەلەدى. ول سوڭعى ءتورت جىل بويى ءبىرىنشى بولىمشەنىڭ مەڭگەرۋشىسى. بولىمشەدە 14 توسەك بار، سىرقاتتارعا ءتورت حيرۋرگ قىزمەت كورسەتەدى. جاس بولسا دا تاجىريبە جيناقتاعان قۋانىش سىدىقوۆ، ءبىرجان تەمىرشينوۆ، دامير شالبايەۆ كۇردەلى وتالاردى باتىل جاساپ ءجۇر. ەكىنشى قالالىق اۋرۋحانانىڭ قولى شيپالى جاندارى، 33 جىلدىق ەڭبەك ءوتىلى بار، قابىلداۋ بولىمشەسىنىڭ مەڭگەرۋشىسى باقىت وگۋزبايەۆا، 45 جىلدان استام حيرۋرگ بولىپ ابىرويمەن قىزمەت ەتكەن، ءقازىر دە وتا جاسايتىن، ءوزىنىڭ مول تاجىريبەسىن جاستارعا تالماي ۇيرەتىپ كەلە جاتقان توقتاربەك ءابىلماجىنوۆ ۇجىمنىڭ ماقتانىشى. مۇرات بەيسەنوۆ قولى شيپالى، 35 جىلدا مىڭداعان ادامدى اجالدان اراشالاعان ازامات.
– ءوندىرىسى وركەندەگەن وسكەمەندە زاماناۋي تالاپقا ساي اۋرۋحانا قاجەت ەكەنى بەلگىلى. قالاداعى جالعىز جەدەل جاردەم كورسەتەتىن اۋرۋحانانىڭ 60 جىلدىق تاريحى بار. وكىنىشكە قاراي، ول 2012 جىلى بۇل مارتەبەدەن ايىرىلىپ، ءقازىر ەكىنشى قالالىق اۋرۋحانا دەپ اتالىپ كەتتى. ەندى ەكولوگياسى كۇردەلى قالادا سىرقاتتارعا جەدەل جاردەم كورسەتەتىن مەكەمە جابىلىپ، ءبىرىنشى قالالىق اۋرۋحانامەن بىرىكتىرىلگەلى جاتىر. سوندا وسىندا قىزمەت ەتەتىن 400-گە جۋىق ادام قايدا كەتەدى؟ بارلىعىنا قىزمەت تابىلادى دەگەنگە سەنۋ قيىن، كوپ مامان جۇمىسسىز قالا ما دەگەن ءقاۋىپ بار. بىزدىڭشە، قورشاعان ورتاسى بۇلىنگەن، اسا كۇردەلى ايماقتا جەدەل جاردەم كورسەتەتىن اۋرۋحانا اۋاداي قاجەت. وبلىس، قالا باسشىلارى بىزگە تۇسىنىستىكپەن قارايدى دەگەن ۇمىتتەمىز، – دەيدى ەركىن يسليام ۇلى.
كۇن سايىن دەرلىك جەدەل جاردەم كورسەتەتىن اۋرۋحاناعا ونداعان ادام ءتۇسىپ جاتادى. سەبەبى، دۇرىس تاماقتانباۋ، اۋىزسۋدى دۇرىس پايدالانباۋ سالدارىنان ءوت جولىنىڭ قابىنۋى، ىشەك سىرقاتتارى كوبەيىپ كەتتى. ونىڭ ۇستىنە سوڭعى كەزدە كولىك وقيعالارى، جۇرگىزۋشىلەردىڭ ادامداردى قاعىپ، قاشىپ كەتۋى كوبەيىپ كەتتى. ءبىر عانا مىسال.
9 قازاندا د.ورازبايەۆا دەگەن جاپ-جاس قىزدى ساتبايەۆ كوشەسىندەگى ارنايى جولاق بەلگىسى بار جەردەن وتەر تۇستا بەلگىسىز كولىك يەسى قاعىپ، كومەك كورسەتۋدىڭ ورنىنا قاشىپ كەتكەن. ءقازىر قىلمىسكەر ىزدەستىرىلۋدە. ءتۇننىڭ ءبىر مەزگىلىندە ەركىن شەريازدانوۆ ءىش قۇرىلىسىنا اۋىر زاقىم كەلگەن وعان وتا جاساپ، امان الىپ قالدى. ىلە-شالا توقىشەگى بىتەلىپ، اۋىر حالدە جەتكىزىلگەن يۋ.سوروكين، شابى جارىلعان س.شەلياگينگە ءساتتى وتا جاسالدى. «كەيدە ءبىر كۇندە بەس-التى ادامعا وتا جاساۋعا تۋرا كەلەدى، ۇيگە بارۋدى ۇمىتىپ كەتەمىز»، – دەگەن حيرۋرگتىڭ سوزىنەن تۇيگەنىمىز، تاڭدى تاڭعا ۇرىپ، ۋاقىتپەن ساناس­پاي سىرقاتتاردى امان الىپ قالۋعا جان-تانىمەن قىزمەت ەتەتىن حيرۋرگ ماماندىعىنىڭ اسا كۇردەلى، جاۋاپتى ەكەنىن ەرىكسىز تۇسىنەمىز.
بۇل كۇندەرى ەكىنشى قالالىق اۋرۋحانادا ءوز ءىسىنىڭ بىلگىرى 18 حيرۋرگ قىزمەت ەتەدى. ولار دا ەرتەڭىمىز نە بولادى دەپ الاڭداۋلى. قابىلداۋ بولىمشەسىنىڭ مەڭگەرۋشىسى باقىت وگىزبايەۆامەن تىلدەسكەنىمىزدە:
– 9 ايدا قابىلداۋ بولىمىنە جانى قىسىلعان 13 مىڭ ادام كەلدى. ونىڭ ىشىندە 9 مىڭنان استامىنا حيرۋرگيالىق جانە اۋىر جاراقاتتىڭ الدىن الۋ كومەگى كورسەتىلدى. 5 مىڭ ادام اۋرۋحاناعا جاتقىزىلدى. كوپ رەتتە جەدەل جاردەممەن باسقا اۋرۋحانالارعا جەتكىزىلگەن سىرقاتتاردى بىزگە جىبەرىپ جاتادى. سەبەبى، بىزگە تۇسكەندەرگە جەدەل وتا جاسالىپ نەمەسە تەرەڭدەتىپ ەم-دوم جاسايدى. ەگەر اۋرۋحانا جابىلسا سىرقاتتارعا جەدەل جاردەم كومەگىنىڭ وزەگىنە وت تۇسەدى، دەمەك، ءبىزدىڭ ايقايىمىز بوس بولماسا كەرەك، – دەدى 40 جىل بويى دەنساۋلىق سالاسىندا جەمىستى قىزمەت ەتىپ كەلە جاتقان حيرۋرگ.
ادام جانىنىڭ اراشاشىسى، بەيبىت زاماندا شيپالى قولدارىمەن مىڭداعان ادامدى ەمدەپ، ولاردىڭ ىستىق ىقىلاسىنا بولەنگەن ەركىن يسليام ۇلى، باسقا دا اق جەلەڭدى ابزال جاندارعا العىستان باسقا ايتارىمىز جوق.

دەرەككوز: ەگەمەن قازاقستان