كەشە بەيبىتشىلىك جانە كەلىسىم سارايىندا قازاقستان حالقى اسسامبلەياسى ءتوراعاسىنىڭ ورىنباسارى – حاتشىلىق مەڭگەرۋشىسى ەرالى توعجانوۆتىڭ بولگاريا حالىقتىق جينالىسىنىڭ (پارلامەنت) ءتورايىمى سەسكا ساچيەۆامەن كەزدەسۋى ءوتتى.
كەزدەسۋگە مادەنيەت جانە سپورت ۆيسە-مينيسترى عالىم اح­مەدياروۆ، قازاقستان حالقى اسسام­بلەياسى ءتوراعاسىنىڭ ورىنباسارى ولەگ دىموۆ، پارلامەنت ءماجىلىسى الەۋمەتتىك-دامۋ كوميتەتىنىڭ ءتورايىمى گۇلنار ىقسانوۆا جانە پارلامەنت ءماجىلىسىنىڭ دەپۋتاتى ناتاليا كالاشنيكوۆا، قازاقستان مەن بولگاريانىڭ مەملەكەتتىك ورگاندارىنىڭ وكىلدەرى قاتىستى.
بولگاريالىق دەلەگاسيامەن كەزدەسۋ بارىسىندا ەتنوسارالىق تاتۋلىق پەن قوعامدىق كەلىسىمنىڭ قازاقستاندىق ۇلگىسى تانىستىرىلدى. ە.توعجانوۆ شەتەلدىك قو­ناقتاردى قحا-نىڭ قۇرىلۋ تاري­حىمەن، كونستيتۋسيالىق مارتە­بەسىمەن تانىستىرىپ، ەتنوسارالىق تاتۋلىق پەن قوعامدىق كەلىسىمدى نىعايتۋ بويىنشا الدا تۇرعان مىندەتتەر مەن جۇرگىزىلىپ جاتقان جۇمىستار، قحا-دان سايلانعان دە­پۋ­تاتتاردىڭ جۇمىسى، حالىق­ارالىق ىنتىماقتاستىق تۋرالى ءبىراز مالىمەتتەردەن حاباردار ەتتى.
كەزدەسۋ بارىسىندا تاراپتار ەكىجاقتى ىنتىماقتاستىق ماسە­لەلەرىن تالقىلاپ، قازاقستان رەس­پۋب­ليكاسىنىڭ مادەنيەت جانە سپورت مينيسترلىگى مەن بولگا­ريا رەسپۋبليكاسى مادەنيەت مي­نيسترلىگىنىڭ اراسىندا مادەنيەت سالاسىنداعى ىنتىماقتاستىق تۋرالى كەلىسىمگە قول قويىلدى.
«بولگاريا رەسپۋبليكاسى – ءبىزدىڭ ءداستۇرلى ارىپتەسىمىز. مۇنىڭ ايعاعى رەتىندە بولگار تاراپىنىڭ قازاقستاندىق باستامالارعا، سونىڭ ىشىندە قازاقستاننىڭ 2010 جىلى ەۋروپاداعى قاۋىپسىزدىك جانە ىنتىماقتاستىق ۇيىمىنا ءتوراعالىعىنا، دۇنيەجۇزىلىك ساۋدا ۇيىمىنا وتۋىنە، بۇۇ قاۋىپسىزدىك كەڭەسىنىڭ 2017-2018 جىلدارعى تۇراقتى ەمەس مۇشەلىگىنە ءجا­نە اس­تانادا ەكسپو-2017 حالىق­ارالىق كورمەسىن وتكىزۋ تاپسىرىسىنا قولداۋ كورسەتۋىن اتاپ وتۋگە بولادى»، – دەدى عالىم احمەدياروۆ.
مادەنيەت سالاسىنداعى ىن­تىماقتاستىق تۋرالى كەلىسىم تاريح جانە مادەنيەت ەسكەرتكىشتەرىن ساق­تاۋ، جاڭعىرتۋ جانە كونسەرۆا­سيالاۋ سالاسىنداعى ەكىجاق­تى باي­لانىستاردى دامىتۋدى قاراس­تىرادى. سونداي-اق، قازاقستان مەن بولگاريا كىتاپحانالارى، مۇ­راجايلارى، كينو ونەرى مەن كون­سەرتتىك قىزمەت ۇيىمدارى ارا­سىنداعى ارىپتەستىك قاتىناستاردى ورىستەتە ءتۇسۋدى كوزدەيدى.
سونىمەن قاتار، كەلىسىمگە ءساي­كەس، مەملەكەتتەر بىر-بىرىمەن ەكى جاق­تىڭ مۇددەلەرىنە تيەسىلى اقپا­رات­تارىمەن الماسىپ وتىراتىن بولادى. تاراپتار كەلىسىمگە قول قويۋ ەكى مەملەكەت حا­لىق­تارى­نىڭ اراسىنداعى دوستىق قارىم-قا­تى­ناستاردى كۇشەيتۋ مەن دا­مىتۋعا جاڭا سەرپىن بەرەتىندىگىنە سەنىم ءبىلدىردى.
سونداي-اق، قازاقستان حالقى اس­سامبلەياسىنىڭ بەيبىتشىلىك ءجا­نە كەلىسىم سارايىنداعى كورمە پاۆيلونىنا بولگار ۇلتتىق كوستيۋمى سىيعا تارتىلدى.

دەرەككوز. ەگەمەن قازاقستان