«نۇر وتان» پارتياسى بولاشاقتا ءوز مۇشەلەرىنىڭ سانىن 100 مىڭنان اسىرۋدى جوسپارلاپ وتىر. سوڭعى مالىمەتتەرگە سايكەس، قازىرگى تاڭدا رەسپۋبليكا بويىنشا «نۇر وتان» پارتياسىنىڭ قۇرامىندا 870 مىڭنان استام مۇشە بار. بۇل تۋرالى «قامشى» پورتالى «نۇر وتان» پارتياسى ورتالىق اپپاراتىنىڭ ۇيىمداستىرۋ-باقىلاۋ جۇمىسى دەپارتامەنتىنە سىلتەمە جاساپ حابارلايدى.

«ەڭ نەگىزگى باسىمدىق ەكونوميكالىق سالاعا قويىلماق. وسىنى ەسكەرە وتىرىپ، پارتيا قۇرامىنىڭ ساپاسىنا تالداۋ جاسالدى. وسىعان وراي، ەكونوميكا مەن شاعىن جانە ورتا بيزنەس سالالارىنا ەرەكشە كوڭىل ءبولۋ كەرەكتىگى انىقتالدى. ستاتيستيكالىق مالىمەتتەرگە سايكەس، ءبىزدىڭ ەلدە ەكونوميكالىق بەلسەندى 9 ميلليون ادام بار، ولاردىڭ 2 ميلليوننان استامى - شاعىن جانە ورتا بيزنەستە ءجۇر. ولاردىڭ ىشىندە «نۇر وتان» پارتياسىنىڭ مۇشەلىگىندە تۇرعاندار 1 پايىزدان ءسال اسادى. ال، مەديسينا، ءبىلىم بەرۋ، مادەنيەت سالالارىندا جۇمىس ىستەيتىن ەكونوميكالىق بەلسەندى حالىقتىڭ 1،5 ميلليونىنا دا جەتپەيدى، دەي تۇرعانمەن وندا ءبىزدىڭ پارتيانىڭ مۇشەلەرى جەتەرلىك. ەكونوميكا سالاسىندا بىزدە 3 ميلليونان استام ادام بار، الايدا «نۇر وتان» پارتياسىنىڭ مۇشەلەرى ونىڭ 19-20 پايىزىن عانا قۇرايدى. ىشكى پارتيالىق جۇمىستى ءدال وسى سالالاردا كۇشەيتۋ قاجەتتىگى تۋىنداپ وتىر»، - دەيدى دەپارتامەنت ديرەكتورى جىگەر قالييەۆ پارتيانىڭ ورتالىق اپپاراتىندا وتكەن باسپا ءسوز ءماسليحاتىندا.

ونىڭ ايتۋىنشا، قوعامدىق قابىلداۋدىڭ ءتيىمدى جۇمىسىنىڭ ارقاسىندا قازىرگى ۋاقىتتا پارتيا قاتارىنا وتەمىن دەگەندەردىڭ سانى ارتىپ وتىر.

«وسىعان قاراماستان، پارتيا مۇشەلەر سانىنا ەمەس، ساپاسىنا قارايتىن بولادى. بىزدە وزدەرىمىزدىڭ تالاپتارىمىز بار. سونىڭ نەگىزىندە ءبىز پارتياعا ەڭ لايىقتى دەگەن ازاماتتاردى قابىلدايتىن بولامىز. دەمەك، بىزدە ساپا تۇرعىسىنان كەلگەندە وتە جوعارى تالاپتار قويىلماق»، - دەيدى ج.قالييەۆ.