استانا. 9 قاراشا. 2015 جىلدىڭ 29 قازانىندا مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قۇقىق قورعاۋ ورگاندارىنىڭ قىزمەتىن جانە قۇقىق قورعاۋ قىزمەتىن وتكەرۋ ءتارتىبىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى. بۇل تۋرالى باس پروكۋراتۋرانىڭ باسپا ءسوز قىزمەتى حابارلادى.
زاڭ «مەملەكەت باسشىسىنىڭ بەس ينستيتۋسيونالدىق رەفورمانى ىسكە اسىرۋ جونىندەگى ۇلت جوسپارى – 100 قادامدى»، سونداي-اق قازاقستان رەسپۋبليكاسى پرەزيدەنتىنىڭ 2013 جىلعى 31 جەلتوقسانداعى №720 جارلىعىمەن ماقۇلدانعان قۇقىق قورعاۋ جۇيەسىن ودان ءارى جاڭعىرتۋدىڭ 2014-2020 جىلدارعا ارنالعان مەملەكەتتىك باعدارلاماسىن جانە قۇقىق قورعاۋ ورگاندارىنىڭ كادر ساياساتى تۇجىرىمىن ىسكە اسىرۋ ماقساتىندا ازىرلەنگەن.
زاڭمەن جەكەلەگەن زاڭنامالىق اكتىلەرگە تۇزەتۋلەر ەنگىزىلەدى.
«پروكۋراتۋرا تۋرالى» زاڭعا مەملەكەت باسشىسىنىڭ 2015 جىلعى 4 مامىرداعى № 15 جارلىعىمەن قۇرىلعان باس پروكۋراتۋرا جانىنداعى قۇقىق قورعاۋ ورگاندارى اكادەمياسىنىڭ قىزمەتىن رەگلامەنتتەۋ بويىنشا تولىقتىرۋلار ەنگىزىلگەن.
اكادەميا قىزمەتىنىڭ نەگىزگى باعىتتارى رەتىندە قۇقىق قورعاۋ ورگاندارى قىزمەتكەرلەرىنىڭ، ونىڭ ىشىندە قۇقىق قورعاۋ ورگاندارى باسشىلىعىنىڭ پرەزيدەنتتىك رەزەرۆىندە تۇرعان قىزمەتكەرلەردىڭ كاسىبي دەڭگەيىن ارتتىرۋ، قۇقىق قورعاۋ قىزمەتى سالاسىنداعى ۆەدومستۆوارالىق عىلىمي زەرتتەۋلەر جۇرگىزۋ جانە ولاردى ۇيلەستىرۋ، سونداي-اق جوعارى وقۋ ورنىنان كەيىنگى ءبىلىم بەرۋ باعدارلامالارىن ىسكە اسىرۋ ايقىندالعان.
«قۇقىق قورعاۋ قىزمەتى تۋرالى» زاڭعا ەنگىزىلگەن تۇزەتۋلەر قۇقىق قورعاۋ جۇيەسىن كادرلىق قامسىزداندىرۋدىڭ قۇقىقتىق بازاسىن جەتىلدىرەدى. «كادرلىق بولجام»، «كادرلىق جوسپارلاۋ»، «باسەكەگە قابىلەتتىلىك كورسەتكىشى»، «مورالدى-پسيحولوگيالىق جاعداي» «روتاسيانى جوسپارلاۋ» سەكىلدى جانە باسقا دا نوۆەللالار ەنگىزىلەدى.
قىزمەتكە قابىلدانعان جاس قىزمەتكەرلەر ارنايى باعدارلاما بويىنشا دايىندىقتان وتەتىن بولادى. بۇل ولاردىڭ قۇقىق قورعاۋ قىزمەتىنە بەيىمدەلۋى، كاسىبي قالىپتاسۋى جانە جۇكتەلگەن مىندەتتەردى ساپالى ورىنداۋ قاسيەتتەرىنىڭ دامۋى ءۇشىن قاجەت. زاڭمەن سونداي-اق تالىمگەرلىك ينستيتۋتى بەكىتىلەدى.
قۇقىق قورعاۋ قىزمەتىنە كانديداتتاردىڭ جانە رەزەرۆتەگىلەردىڭ ۆەدومستۆولىق دەرەكقورىن قۇرۋ قاراستىرىلادى. قول جەتكىزگەن ناتيجەلەرگە قاراي جالاقى تولەۋدىڭ ديففەرەنسياسياسىنا نەگىزدەلگەن ىنتالاندىرۋ جۇيەسى ەنگىزىلەدى.
تارتىپتىك تەرىس قىلىقتاردىڭ اۋىرلىعىن باعالاۋ جۇيەسىن جانە تارتىپتىك جاۋاپكەرشىلىك قالىپتاستىرۋ ءتارتىبىن مەملەكەت باسشىسى ايقىندايتىن بولادى.
2014 جىلى مەملەكەتتىك باسقارۋدى رەفورمالاۋ بارىسىندا قۇرىلعان سىبايلاس جەمقورلىققا قارسى قىزمەت پەن ەكونوميكالىق تەرگەۋ قىزمەتىنە قازاقستان رەسپۋبليكاسىنىڭ زاڭناماسىندا كوزدەلگەن تارتىپتە ۋاقىتشا ۇستاۋ يزولياتورلارىن، تەرگەۋ يزولياتورلارىن پايدالانۋ قۇقىعى بەرىلەدى.
ءۇش جاسقا دەيىنگى بالا كۇتىمى بويىنشا دەمالىستاعى قۇقىق قورعاۋ ورگاندارىنىڭ قىزمەتكەرلەرىن الەۋمەتتىك قورعاۋ ماسەلەسى ناقتىلاندى.
ەندى وسىنداي دەمالىستا بولۋ كەزەڭى قۇقىق قورعاۋ قىزمەتىندەگى ەڭبەك وتىلىنە، ارناۋلى اتاق، سىنىپتىق شەن بەرۋ نەمەسە بىلىكتىلىك سىنىبىن بەلگىلەۋ ءۇشىن ەڭبەك سىڭىرگەن جىلدارعا ەسەپتەلەتىن بولادى.
«ازاماتتىق قورعاۋ تۋرالى» زاڭعا ەنگىزىلگەن تۇزەتۋلەرمەن ىشكى ىستەر مينيسترلىگىنە ارناۋلى اتاقتار، بىلىكتىلىك سىنىپتارى بەرىلەتىن ورتكە قارسى قىزمەت، مەملەكەتتىك فەلدەگەرلىك قىزمەت لاۋازىمدارىنىڭ، سونداي-اق اتالعان قىزمەتتەر سانىنىڭ نورماتيۆتەرىنىڭ ءتىزىمىن بەكىتۋ قۇقىعى بەرىلەدى. بۇدان باسقا، اتالعان قىزمەتتەردىڭ قىزمەتكەرلەرىن نىساندىق كيىممەن جانە ارناۋلى كيىم-كەشەكپەن قامتاماسىز ەتۋ ماسەلەلەرى رەتتەلدى.
قابىلدانعان زاڭمەن قۇقىق قورعاۋ ورگاندارىنا تۇرعىنداردان ساتىپ الىنعان تەحنيكالىق اقاۋسىز جانە پايدالانۋعا جارامدى تراۆماتيكالىق اسەر بەرەتىن ۇڭعىسىز اتىس قارۋى مەن گاز قارۋىن بەرۋ ءتارتىبىن بەكىتۋگە ۇكىمەتتىڭ قۇزىرەتى كوزدەلگەن.

دەرەككوز: ەگەمەن قازاقستان