قوستاناي. 9 قاراشا. وبلىستىق پروكۋراتۋرا قىزمەتكەرلەرى VKontakte جەلىسىندەگى بالالار اراسىندا پورنوگرافيالىق ماتەريالداردى ناسيحاتتايتىن ينتەترنەت توپتارعا بۇعاۋ سالۋدى ءجون دەپ تاپتى. بۇل تۋرالى egemen.kz ءتىلشىسى حابارلادى.
بالالار مەن جاسوسپىرىمدەر اراسىندا جىنىستىق تيىسپەۋشىلىككە قارسى پروفيلاكتيكالىق جۇمىستارعا پارنوگرافيانى، ونىڭ ىشىندە بالالار اراسىندا ناسيحاتتاعان ينتەرنەت توپتاردى تاۋىپ، ولاردىڭ جۇمىسىنا تيىم سالۋ دا جاتادى. ساراپتاۋ جۇرگىزۋدىڭ ارقاسىندا VKontakte الەۋمەتتىك جەلىسىندە بالالار مەن جاسوسپىرىمدەر اراسىندا جىنىستىق قاتىناستى بەينەلەگەن بەينەروليكتەر، پورنوگرافيا مەن پەدوفيليانى ناسيحاتتاعان باسقا دا ماتەريالدار جىبەرگەن توپتار انىقتالدى.
بيىلعى قازاننىڭ 29-ى مەن 5 قاراشاسى اراسىندا 26 وسىنداي ينتەرنەت توپتار انىقتالعان. ولاردىڭ 1 ميليوننان اسا جازىلۋشىلارى بار، ونىڭ ىشىندە 32 مىڭى قازاقستاندىق، وسىلاردىڭ 2،9 مىڭى كامەلەتكە جەتپەگەندەر. بۇل توپتارعا قوستانايلىقتار دا باس سۇعىپتى، ءبىراق ولار بارلىق كونتەنتتەردىڭ 1-2 پايىزىنداي عانا بولادى. ولاردىڭ جاس ەرەكشەلىگى نەگىزىنەن 14 پەن 18 جاس ارالىعىندا.
قوستاناي وبلىستىق پروكۋراتۋراسىنىڭ وكىلى نۇربول ءابدىراحمانوۆ: «پورنوگرافيانى، پەدوفيليانى ناسيحاتتاعان توپقا كىرگەن بالالار نەگىزىنەن مەكتەپ وقۋشىلارى. ولاردىڭ بارلىعىنىڭ ناقتى كىم ەكەنى انىقتالىپ، ولاردىڭ  مۇعالىمدەرىمەن، اتا-انالارىمەن جۇمىس جۇرگىزىلۋدە. وبلىستىق پروكۋراتۋرا وسىنداي VKontakte الەۋمەتتىك جەلىسىندەگى پورنوگرافيانى، پەدوفيليانى ناسيحاتتايتىن وسىنداي توپتاردىڭ جۇمىسىن سوتقا دەيىنگى رەتپەن توقتاتۋ تۋرالى باستاما كوتەرىپ، رەسپۋبليكانىڭ باس پپروكۋراتۋراسىنا ۇسىنىس جاسادى. ەگەر  باس پروكۋراتۋرا بۇل ۇسىنىستى قولداسا، الداعى كۇندەرى اتالعان ينتەرنەت توپتاردىڭ جۇمىسىن الاستايتىن بولامىز»، – دەدى.
وسى تاقىرىپقا وراي وبلىستىق پروكۋراتۋرادا وتكىزىلگەن باسپا ءسوز ءماسليحاتىندا وبلىس پروكۋرورىنىڭ اعا كومەكشىسى رينات كارىموۆ بۇل جۇمىستىڭ الداعى ۋاقىتتا ۇزبەي جالعاساتىنىن دا ايتتى. ينتەرنەت جەلىلەرىندە بالالار مەن جاسوسپىرىمدەرگە جات قىلىقتاردى ناسيحاتايتىن توپتاردىڭ جۇمىسىن توقتاتۋ، ولارعا ساراپتاما جاساۋ ءبىر بۇل ەمەس. وسىدان بۇرىن وبلىستىق پروكۋراتۋرا قىزمەتكەرلەرى سۋيسيدتى ناسيحاتتاعان ينتەرنەت-قوعامداستىقتارعا دا ساراپتاما جاساپ، ولاردىڭ جۇمىسى بەلەڭ الىپ كەتپەۋىنە كولدەنەڭ تۇرعان بولاتىن.
وبلىس پروكۋرورىنىڭ اعا كومەكشىسى رينات كارىموۆ: «ءسۋيسيدتى ناسيحاتتاعان 50 توپتى انىقتاپ، ولاردىڭ بارلىعىن جاۋىپ تاستادىق. ءبىز اتا-انالارعا ولاردىڭ بالالارى قانداي ينتەرنەت قوعامداستىقتاردىڭ مۇشەسى بولىپ جۇرگەنىن حابارلاپ، كوزىن جەتكىزدىك. سونىڭ ارقاسىندا 74 ءجاسوسپىرىم سول قوعامداستىقتاردان شىقتى. سونىمەن قاتار وبلىستىق پروكۋراتۋرا وبلىس اكىمى الدىنا وبلىستىق ءبىلىم باسقارماسىندا ينتەرنەت كەڭىستىككە ىلعي ساراپتاما جاساپ، ءسۋيسيدتى، پورنوگرافيانى، پەدوفيليانى، بالالارعا، جانۋارلارعا ازاپ كورسەتۋدى ناسيحاتتايتىن سايتتاردىڭ پايدا بولۋىن انىقتاپ وتىراتىن مامان ءبولىنۋىن ماسەلە ەتىپ قويعان بولاتىن. ءقازىر ول مامان جۇمىس ىستەپ وتىر»، – دەدى.

دەرەككوز: ەگەمەن قازاقستان