اقتوبە. 9 قاراشا. اقتوبەدە ءبىر كۇندە ەكى بىردەي بالاباقشا پايدالانۋعا بەرىلدى. بۇل تۋرالى egemen.kz حابارلادى.
«شاتتىق» پەن «دۋمان» بالاباقشالارىندا 400-گە جۋىق ءبۇلدىرشىن تاربيەلەنەتىن بولادى. «زارەچنىي-1» شاعىن اۋدانىندا بوي كوتەرگەن №48 «شاتتىق» بالاباقشاسىنىڭ اشىلۋ سالتاناتىنا قاتىسقان قالا اكىمى بەكبول ساعىن تۇرعىنداردى اتا-انالاردىڭ يگىلىگى ءۇشىن پايدالانۋعا بەرىلگەن الەۋمەتتىك نىساننىڭ اشىلۋىمەن قۇتتىقتاپ، جىلى لەبىزىن ءبىلدىردى.
ول ەلباسىنىڭ تاپسىرماسىمەن اقتوبەدە تاعى دا ءبىر بالاباقشا پايدالانۋعا بەرىلگەنىن، «ماڭگىلىك ەل» بولامىز دەپ الدىنا ۇلكەن مۇرات قويعان مەملەكەتىمىزدە جاس ۇرپاقتىڭ تاربيەسىنە ۇلكەن ماڭىز بەرىلىپ وتىرعانىن جەتكىزدى. قازاقتىڭ ۇلى جازۋشىسى مۇحتار اۋەزوۆتىڭ «ەل بولامىن دەسەڭ، بەسىگىڭدى تۇزە!» دەگەن اتالى ءسوزىن تىلگە تيەك ەتە كەلىپ، ەلباسى نۇرسۇلتان نازاربايەۆتىڭ 2020 جىلعا دەيىن ەلىمىزدەگى 3-6 جاستاعى بالدىرعانداردىڭ ءبارىن بىردەي بالاباقشامەن قامتۋدى مىندەتتەگەنىن اتاپ ءوتتى. ءقازىردىڭ وزىندە اقتوبە قالاسىنداعى 3-6 جاستاعى بالالاردىڭ بالاباقشامەن قامتىلۋ دەڭگەيى 80 پايىزدان اسقانىن بۇل سالاداعى جەتىستىك رەتىندە باعالادى.
اتا-انالار اتىنان ءسوز العان گۇلنار سارييەۆا بالاباقشانىڭ اشىلۋىنا ۇيىتقى بولعانى ءۇشىن ەلباسىنا جانە جەرگىلىكتى بيلىككە ريزاشىلىعىن ءبىلدىردى.
بالاباقشا قۇرىلىسىنا جەرگىلىكتى بيۋدجەتتەن 362،3 ميلليون تەڭگە بولىنگەن. 150 ورىندىق بالاباقشادا 6 توپ بار. 40-قا جۋىق مامان جۇمىس ىستەيدى. مۇندا بالالاردىڭ ويىن جانە جاتىن بولمەلەرى، مۋزىكا زالى، مەديسينالىق بولمە، اسحانا ساپالى جيھازدارمەن جاراقتاندىرىلعان. مەديسينالىق بلوگتا دەزينفەكسيالىق قۇرالداردى دايىندايتىن جانە فيزيوتەراپيەۆتىك بولمەلەر ورنالاسقان. بالاباقشا الاڭىندا بۇلدىرشىندەردىڭ بەلسەندى قيمىلداۋىنا ارنالعان كولەڭكەلى باستىرما، شاعىن ساۋلەت نىساندارى ورناتىلعان.
بۇدان كەيىن قالا باسشىسى وبلىس ورتالىعىنداعى 11-شاعىن اۋداندا ورنالاسقان №49 «دۋمان» بالاباقشاسىنا باردى. مەملەكەت باسشىسى بۇرىن بالاباقشا عيماراتى بولعان نىسانداردى قايتارىپ، كۇردەلى جوندەۋدەن وتكىزىپ، جاس ۇرپاققا قايتارۋدى جۇكتەگەن بولاتىن. «دۋمان» بالاباقشاسى وسى تاپسىرما نەگىزىندە اشىلىپ وتىر. كۇردەلى جوندەۋدەن كەيىن پايدالانۋعا بەرىلىپ وتىرعان عيماراتتا 11-شاعىن اۋدانمەن قاتار، وعان كورشىلەس ورنالاسقان 12، «ماسكەۋ» جانە «بولاشاق» شاعىن اۋداندارىنىڭ دا بالالارى تاربيەلەنەتىن بولادى.
«الەمدە، ەلىمىزدە قارجىلىق قيىنداقتار بولعانىنا قاراماستان، مەملەكەت الدىنا قويعان الەۋمەتتىك مىندەتتەمەلەرىن ورىنداۋدا. مۇنىڭ بارلىعى ەلىمىزدەگى سان ءتۇرلى ۇلت پەن ۇلىستىڭ تاتۋ تىرلىك ەتۋىنىڭ ارقاسىندا جۇزەگە اسىرىلىپ جاتىر»، – دەي كەلىپ، شاھار باسشىسى بەكبول ساعىن سالتاناتتى ساتكە جينالعان جۇرتشىلىقتى بالاباقشانىڭ اشىلۋىمەن قۇتتىقتادى.
230 بالاعا ارنالعان بالاباقشادا 10 توپ بار. جالپى الاڭى 3621،66 شارشى مەتر عيماراتتىڭ قۇرىلىسىنا بيۋدجەتتەن 238 247 مىڭ تەڭگە جۇمسالعان. قۇرىلىس جۇمىستارىن «ەليتسترويسەرۆيس» ج ش س جۇرگىزگەنىن اتاپ وتكەن ءجون.
«بيىل جاز ايىندا 7 مىڭعا جۋىق بالا بالاباقشامەن قامتىلدى. كەلەسى جىلى 8 مىڭ بۇلدىرشىنگە بالاباقشاعا جولداما بەرىلەدى»، – دەيدى قالالىق ءبىلىم ءبولىمىنىڭ باسشىسى ءلاززات ورازبايەۆا.
سونداي-اق، جىل اياعىنا قاراي «نۇر اقتوبە» شاعىن اۋدانىندا 320 ورىندىق بالاباقشا بوي كوتەرەدى دەپ كۇتىلۋدە.

دەرەككوز: ەگەمەن قازاقستان