كەشە «نۇر وتان» پارتياسى ور­تا­لىق اپپاراتىنىڭ عيماراتىندا ورنا­لاسقان پارتيا باسپا ءسوز ورتالىعى ءوز جۇ­مىسىن رەسمي تۇردە باستادى. ونىڭ العاش­قى بريفينگىن پارتيا ءتوراعاسى ءبىرىنشى ورىنباسارىنىڭ كەڭەسشىسى بەرىك قۇرمانعالي مەن پارتيا ورتالىق اپپاراتىنىڭ جەتەكشىسى جانات قوجاحمەتوۆ وتكىزىپ، سوڭعى ەكى ايدا اتقارىلعان جۇمىستار بارىسىنان حاباردار ەتتى.
الدىمەن ءسوز العان بەرىك ءۋالي ۇلى باسپا ءسوز ورتالىعىنىڭ باستى ماقساتى ەلباسى، «نۇر وتان» پارتياسىنىڭ ءتوراعاسى ن.ءا.نازاربايەۆ بەكىتكەن بەس ينستيتۋتتىق رەفورمانىڭ «اشىق جانە حالىققا ەسەپ بەرۋشى مەم­لەكەت قۇرۋ» باعىتى بويىنشا پار­تيانىڭ قالىڭ جۇرتشىلىق الدىن­داعى جاريالىلىعىن كورسەتۋ ەكەنىن ايتتى. ونىڭ ايتۋىنشا، «نۇر وتان» ەلىمىزدەگى جەتەكشى ساياسي كۇش بولعاندىقتان، اقپاراتتىڭ اشىق­تىعىنا قاشاندا مۇددەلى. سونى­مەن قاتار، ول پارتيا اشىقتىق پەن اي­قىندىق قاعيداسىن ساقتاۋعا جانە كەز كەلگەن اقپاراتتى اشىق ۇسىنۋعا دايىن ەكەنىن جانە باسپا ءسوز ورتالىعى وسىنى جۇزەگە اسىرۋدىڭ ءبىر تەتىگى بولىپ تابىلاتىنىن العا تارتتى. ەندىگى جولى ءار اپتانىڭ سەيسەنبىسى مەن بەيسەنبىسى پارتيانىڭ لاۋازىمدى تۇلعالارى، دەپارتامەنت باسشىلارى جانە پارتيانىڭ ماجىلىستەگى فراكسياسىنىڭ دەپۋتاتتارى بۇقارالىق اقپارات قۇرالدارى وكىلدەرىنىڭ الدىنا شىعىپ، بريفينگ بەرەتىن بولادى.
ب.قۇرمانعالي بۇل ورايدا «نۇر وتاننىڭ» جاڭا مەديالىق ساياساتى جۇزەگە اسىرىلىپ جاتقاندىعىنا دا نازار اۋدارتتى. ول، سونداي-اق، ءقازىر­گى كەزدە جۇمىس التى باعىت بويىنشا ايقىندالعاندىعىن سانامالاپ بەردى. ءبىرىنشىسى – مەملەكەتتىك باعدارلامالاردىڭ ورىندالۋى، ياعني مەملەكەت قارجىسىنىڭ ءتيىمدى جۇمسالۋىنا پارتيالىق باقىلاۋدى كۇشەيتۋ. پارتيا الداعى ۋاقىتتا وسى جۇمىستاردى ورىستەتەتىن بولادى. ەكىنشىسى – قوعامدىق قابىلداۋلار جۇمىسىن جولعا قويۋ. ءۇشىنشى – باستاۋىش پارتيا ۇيىمدارىنىڭ جۇمىسىن جانداندىرىپ، جۇيەلەۋ جانە ورتالىق اپپارات پەن وڭىرلەر اراسىندا تىعىز بايلانىس ورناتۋ. ءتورتىنشى – «جاس وتان» جاستار قاناتىنىڭ جۇمىسىن ناقتىلىققا نەگىزدەۋ. بەسىنشى – پارتيانىڭ پارلامەنتتەگى مۇمكىندىگىن كەڭىنەن پايدالانۋ. پارتيا فراكسياسى ارقىلى حالىقتىڭ وڭىردەگى كوكەيكەستى ماسەلەلەرىن شەشەتىن زاڭنامالاردىڭ دەر كەزىندە قابىلدانۋىنا كۇش سالۋ. التىنشى – سىبايلاس جەمقورلىققا قارسى يدەولوگيا مەن وسى جۇمىستاردى جەرگىلىكتى جەردەگى پارتيالىق قۇرىلىمداردى تارتا وتىرىپ، كۇشەيتۋ.
ەلباسىنىڭ «ۇلى دالا ەلى» يدەياسىنىڭ اياسىندا ەلىمىز بويىنشا كوپتەگەن جۇمىستار جۇرگىزىلۋدە. سول جۇمىستى شيراتۋ ءۇشىن «نۇر وتان» پارتياسى ءوز جانىنان قۇرىلعان «ميراس» قوعامدىق رەسپۋبليكالىق كەڭەسىندە وسى ماسەلەنى جان-جاقتى تالقىدان وتكىزگەن. ءقازىردىڭ وزىندە باسىلىم بەتتەرىندە «ەركىن مىنبە» («سۆوبودنايا تريبۋنا»)، «بيلىك نازارىنا» ايدارلارى اشىلىپ، وڭىرلەردەگى ازاماتتاردىڭ شەشىمىن تاپقان ماسەلەلەرى جان-جاقتى كورسەتىلەتىن بولادى. بۇل رەتتە، بەرىك ءۋالي ۇلى «نۇرلى جول» باعدارلاماسىنىڭ قانشالىقتى دەر كەزىندە ءارى ساپالى جۇزەگە اسىرىلىپ جاتقاندىعىن اشىپ كورسەتۋ ماقساتىندا پارتيالىق ەمەس بۇقارالىق اقپارات قۇرالدارىنا دا جۇگىنەتىندىكتەرىن جەتكىزدى. سونداي-اق، 13 پارتيالىق جوبا وڭتايلاندىرىلىپ، 8 جوباعا بىرىكتىرىلگەنى دە اتاپ ءوتىلدى. پارتيالىق بۇقارالىق اقپارات قۇرالدارىندا «ۇلى دالا وسيەتى» ايدارىمەن ەل تاريحىنداعى ورنى ەرەكشە ۇلى ويشىلداردىڭ ناقىل سوزدەرىن، تالىم-تاربيەلىك ماڭىزى بار وسيەتتەرىن وسكەلەڭ ۇرپاق ساناسىنا ءسىڭىرۋ ماقساتىنداعى بەينەروليكتەر كورسەتىلىپ، ارنايى ايدارلار اشىلۋدا. تاعى ءبىر جاڭا جوبا اۋىلداعى جۇمىسسىزدىق ماسەلەسىن شەشۋگە باعىتتالىپ، وتباسىلىق شارۋالارعا قولداۋ كورسەتۋ جۇيەسىن قۇرۋدى كوزدەيدى. بۇل ءوز كەزەگىندە اۋىل شارۋاشىلىعىن ىلگەرىلەتۋگە وزىندىك ۇلەسىن قوسۋى ءتيىس.
«نۇر وتان» پارتياسى ورتالىق اپپاراتىنىڭ جەتەكشىسى جانات قوجاحمەتوۆ ەلباسى، پارتيا ءتوراعاسى ن.ءا.نازاربايەۆتىڭ قويعان مىندەتتەرى اياسىندا پارتيالىق باقىلاۋ مەن وڭىرلەردەگى جۇمىس تيىمدىلىگىن ارتتىرۋ جونىندە اتقارىلعان جۇمىستار جايىنان حاباردار ەتتى. ول ۇلت جوسپارىن زاڭنامالىق تۇرعىدان قامتاماسىز ەتۋ بويىنشا ماجىلىستەگى پارتيا فراكسياسىنا كەلىپ تۇسكەن 62 زاڭ جوباسىنىڭ 59-ى ماقۇلدانىپ، ۇستىمىزدەگى جىلدىڭ 1 قاراشاداعى مالىمەتىنە سايكەس، پارلامەنتتە 36 زاڭ جوباسى قابىلدانعانىن جەتكىزدى. بۇدان باسقا، وڭىرلەردەن ورتالىق اپ­پاراتقا كەلگەن ۇسىنىستار سارالانىپ، پارلامەنت ءماجىلىسىنىڭ جۇمىس توپتارىنا جەتكىزىلەتىنى ەرەكشە اتالدى.
«نۇرلى جول» باعدارلاماسىنىڭ جۇزەگە اسىرىلۋىن باقىلاۋ جونىندە ءماجىلىس پەن ءماسليحاتتارداعى پارتيا فراكسيالارى جانىندا 4 كوميسسيا قۇرىلعانىن تىلگە تيەك ەتكەن ج.قوجاحمەتوۆ الداعى ۋاقىتتا اگروونەركاسىپ كەشەنىنە قاتىستى تاعى ءبىر كوميسسيا قۇرىلاتىنىن جەتكىزدى. كەلتىرىلگەن مالىمەتكە قاراعاندا، قوعامدىق قابىلداۋ بولمەلەرى مەن «ەلەكتروندى پارتيا» حالىقپەن كەرى بايلانىستىڭ نىعايا تۇسۋىنە ىقپال ەتكەن. اتاپ ايتقاندا، 2 جىلدا مەملەكەتتىك ورگانداردىڭ جەتەكشىلەرى مەن دەپۋتاتتاردىڭ ازاماتتاردى جەكە قابىلداۋلارىنىڭ سانى 8 ەسە وسكەن. شاعىمداردىڭ ءاربىر التىنشىسى ەلەكتروندى تۇردە قابىلدانسا، سونىمەن قاتار، ماجىلىستەگى پارتيا فراكسياسىنىڭ مۇشەلەرىنە تىكەلەي ءوتىنىش جىبەرۋگە مۇمكىندىك بەرەتىن «دەپۋتات بلوگى» قىزمەت ەتىپ تۇرعان.
ورتالىق اپپاراتتا جۇزەگە اسىرىلعان وڭتايلاندىرۋ بارىسى دا ءسوز ەتىلدى. نەگىزىنەن، پارتيا ءتوراعاسىنىڭ ءبىرىنشى ورىنباسارى اسقار مىرزاحمەتوۆ بۇعان دەيىن 1 قاراشادان باستاپ پارتيانىڭ ورتالىق اپپاراتى مەن وڭىرلىك فيليالدار جاڭا شتات كەستەسى بويىنشا جۇمىس اتقارا باستايتىنىن حابارلاعان بولاتىن. سونىمەن، ورتالىقتا جۇمىس ىستەيتىن قىزمەتكەرلەر سانى 132-دەن 116-عا دەيىن قىسقارىپ، تيىسىنشە وڭىرلىك فيليال قىزمەتكەرلەرىنىڭ سانى 43%-عا، ياعني 358 بىرلىككە كوبەيگەنى بەلگىلى بولىپ وتىر. سونداي-اق، فيليالداردىڭ جۇمىس ساپاسى مەن تيىمدىلىگىن باعالاۋدىڭ نىسانالى ينديكاتورلارى ازىرلەنىپتى.

دەرەككوز: ەگەمەن قازاقستان