اقتوبە. 6 قاراشا. اقتوبەدەگى «قونىس» سپورت سارايىندا داڭقتى پالۋان، گرەك-ريم كۇرەسىنەن وليمپيادا چەمپيونى جاقسىلىق ۇشكەمپىروۆتىڭ ماسكەۋ وليمپياداسىندا چەمپيون بولعانىنا 35 جىل تولۋىنا ارنالعان گرەك-ريم، ەركىن جانە ايەلدەر كۇرەسىنەن قازاقستان كۋبوگى جولىنداعى جارىس وتۋدە. بۇل تۋرالى egemen.kz ءتىلشىسى حابارلادى.
بايراقتى باسەكەگە ەلىمىزدىڭ ون ءتورت وبلىسىنان جانە الماتى مەن استانا قالالارىنان 300-دەن استام پالۋان جينالدى. ولار الدىن الا ىرىكتەۋ بەلدەسۋلەرىن باستاپ تا كەتتى. جارىس قورىتىندىسى بويىنشا الەم كۋبوگىنا، ازيا جانە الەم بىرىنشىلىكتەرىنە دايىندالىپ، قاتىسۋ ءۇشىن قازاقستان قۇراما كومانداسى جاساقتالاتىن بولعاندىقتان ىلگەرى كۇنگە ءۇمىت ارتقان ءار پالۋان بەلدەسۋلەرىن جەڭىسكە دەگەن جىگەرمەن وتكىزۋدە. پالۋاندار «مىڭنان تۇلپار» شىعۋ ءۇشىن بار شەبەرلىكتەرىن سالۋدا.
سوندىقتان دا بولار سپورت سارايىندا وتكەن جارىستىڭ سالتاناتتى اشىلۋىنا جانكۇيەرلەر دە كوپ جينالدى. جانكۇيەرلەر تالاي مارتە بوز كىلەمنىڭ اجارىن اشىپ، بايگە تورىنەن كورىنگەن ساڭلاق بالۋانداردى جارىستىڭ قۇرمەتتى قوناقتارى قاتارىندا كوردى. ولاردىڭ اراسىندا ماسكەۋ وليمپياداسىنىڭ چەمپيونى، الەم چەمپيونى، الەم كۋبوگىنىڭ يەگەرى، ەۋروپا چەمپيوناتىڭ كۇمىس جۇلدەگەرى، كسرو-نىڭ ەكى دۇركىن چەمپيونى، كسرو بىرىنشىلىگىنىڭ كۇمىس، قولا جۇلدەگەرى، كسرو حالىقتارى سپارتاكيداسىنىڭ چەمپيونى، كسرو-عا ەڭبەگى سىڭگەن سپورت شەبەرى جاقسىلىق ۇشكەمپىروۆ، وليمپيادا ويىندارىنىڭ، الەم جانە ازيا چەمپيوناتتارىنىڭ جەڭىمپازدارى مەن جۇلدەگەرلەرى يۋريي مەلنيچەنكو، باحتيار بايسەيىتوۆ، نۇرباقىت تەڭىزبايەۆ جانە باسقالارى بار. سونداي-اق، وليمپيادا ويىندارىنىڭ ەكى دۇركىن چەمپيونى، الەمنىڭ التى دۇركىن چەمپيونى، ەۋروپا جانە كسرو بىرىنشىلىكتەرىنىڭ بىرنەشە دۇركىن چەمپيونى سەرگەي بەلوگلازوۆ تا كەلگەن.
پالۋاندار جارىسىنىڭ سالتاناتتى اشىلۋىندا ءسوز العان وبلىس اكىمى بەردىبەك ساپاربايەۆ ۇلتتى، مەملەكەتتى وزگە ەلدەرگە تانىتاتىن سپورت ەكەنىن ايتا كەلىپ، حالقىمىزدىڭ الىپ كۇش يەلەرى، جاۋىرىنى جەرگە تيمەگەن پالۋان پەرزەنتتەرى بالۋان شولاق، قاجىمۇقاننىڭ ءىزباسارلارىنىڭ تاۋەلسىز قازاقستاندى الەمگە مويىنداتۋداعى ەرەن ەڭبەكتەرىن العا تارتا سويلەدى.
«ماسكەۋ وليمپياداسىندا داڭقتى پالۋان جاقسىلىق ۇشكەمپىروۆ چەمپيون بولىپ، قازاق ەلىن تورتكۇل دۇنيەگە تانىتتى. بۇل ۇلت ءۇشىن ۇلكەن ماقتانىش ەدى. تاۋەلسىزدىك جىلدارى يۋريي مەلنيچەنكو تۇڭعىش وليمپيادا چەمپيونى بولدى. الەمدىك دودالاردا الدەنەشە رەت ولجا سالعان، وليمپيادا ويىندارىندا جۇلدەگەر بولعان داۋلەت تۇرلىحانوۆتىڭ جەتكەن جەتىستىگى ءوز الدىنا ءبىر توبە. مۇنداي ءىس-شارا جاستارىمىزعا ۇلاعاتتى تاربيە، وسىنداي بولماق كەرەك دەگەن ۇلگى-ونەگە بولىپ تابىلادى. ءقازىر بوز كىلەمدەگى پالۋانداردىڭ شەبەرلىكتەرىن كورىپ وتىرعان جاستاردىڭ اراسىنان دا الەمدىك جارىستاردا كوك بايراعىمىزدى جەلبىرەتەتىن بۇلا كۇشتى، شەبەرلىگى شىڭدالعان پالۋاندار شىعارىنا سەنىم مول»، – دەدى ءوڭىر باسشىسى.
بەردىبەك ساپاربايەۆ وسى جارىسقا دەمەۋشىلىك جاساعان «اقپان» جشس-نە ريزاشىلىعىن بىلدىرە كەلىپ، ماسكەۋ وليمپياداسىنىڭ چەمپيونى جاقسىلىق ۇشكەمپىروۆكە شەتەلدىك تەمىر تۇلپاردىڭ كىلتىن تاپسىردى.
سودان كەيىن مادەنيەت جانە سپورت مينيسترلىگى سپورت كوميتەتى ءتوراعاسىنىڭ ورىنباسارى ءادىل ءدوڭباي جارىسقا قاتىسۋشىلاردى قۇتتىقتادى. ول ەلىمىزدە 136 مىڭ سپورتشىنىڭ كۇرەس تۇرلەرىمەن اينالىساتىنىن، ولارعا 2400 جاتتىقتىرۋشى پالۋاندىقتىڭ قىر-سىرىن ۇيرەتەتىنىن جەتكىزدى. جارىستى وتكىزۋدەگى ماقسات سالاۋاتتى ءومىر سالتىن ناسيحاتتاۋ، بۇقارالىق سپورتتى دامىتۋ ەكەنىن دە اتاپ ءوتتى. ول وليمپيادا چەمپيوندارى جاقسىلىق ۇشكەمپىروۆ پەن يۋريي مەلنيچەنكوعا «قازاق حاندىعىنىڭ 550 جىلدىعى» مەرەكەلىك مەدالىن تاپسىردى.
ءوز كەزەگىندە جاقسىلىق ۇشكەمپىروۆ سپورتتاعى جەتكەن جەتىستىگى جانە ەرەن ەڭبەگى ءۇشىن وسىنداي ۇلىم بار دەپ الاقاندارىنا سالىپ، ايالاپ كەلە جاتقان حالقىنا جانە ەلباسىنا العىس سەزىمىن ارنادى.
اتاقتى پالۋاننىڭ الەمدىك دودادان التىن ولجالاپ ورالعان اقتوبەلىك جاس پالۋان مەيرامبەك ايناعۇلوۆقا ءوزى كيگەن سپورتتىق كيىمى مەن ءومىربايانى جازىلعان كىتاپتى سىيعا تارتۋى دا جاراسىمدى بولدى. ول جاقىندا وڭتۇستىك كورەيادا وتكەن ءۇى الەمدىك اسكەري ويىنداردىڭ جەڭىمپازى بولدى، 2013 جىلعى ەرەسەكتەر اراسىنداعى قازاقستان كۋبوگىنىڭ يەگەرى، ەرەسەكتەر اراسىندا قازاقستاننىڭ وتكەن جىلعى چەمپيونى، ەرەسەكتەر اراسىندا قازاقستاننىڭ ءىۇ جازعى سپارتاكياداسىنىڭ جەڭىمپازى.
قازاقستان رەسپۋبليكاسى گرەك-ريم، ەركىن جانە ايەلدەر كۇرەسى فەدەراسياسىنىڭ ۆيسە پرەزيدەنتى ەرلان قوجاسباي قۇتتىقتاۋ تىلەگىن جەتكىزدى. «قازمۇنايگاز» اق وكىلى باقىت يمانعالييەۆ جاقسىلىق ۇشكەمپىروۆتىڭ يىعىنا شاپان جاۋىپ، العىس حات تاپسىردى.
جارىستىڭ سالتاناتتى اشىلۋى گرەك-ريم كۇرەسىنەن ءبىرىنشى جانە ءتورتىنشى ورىندار ءۇشىن بەلدەسۋلەرگە ۇلاستى. جارىس قورىتىندىسىندا وڭتۇستىك قازاقستان وبلىسىنىڭ قۇراما كومانداسى ءبىرىنشى، اقتوبەلىكتەر ەكىنشى، ال قاراعاندى وبلىسىنىڭ قۇراما كۇمانداسى ءۇشىنشى ورىندى يەلەندى. ەركىن جانە ايەلدەر كۇرەسىنەن بەلدەسۋلەر جالعاسۋدا.

دەرەككوز: ەگەمەن قازاقستان