اقمولا وبلىسىنىڭ اكىمى سەرگەي كۋلاگين كوكتەمگى سۋ تاسقىنىنان زارداپ شەككەن 40 وتباسىنا جاڭا پاتەرلەردىڭ كىلتىن تاپسىردى. قۋانىش يەلەرىن قۇتتىقتاۋ بارىسىندا ءوڭىر باسشىسى مۇنداي تابيعي اپاتتىڭ بۇرىن ەشقاشان بولماعانىن، سوندىقتان العاشقى كەزەكتە مەكتەپ عيماراتىندا، تۋىسقاندارىنىڭ ۇيىندە تۇرىپ جاتقان وتباسىلارىنا بەرىلەتىندىگىن اتاپ ءوتتى. بۇدان كەيىن بالالى وتباسىلارعا وسىنداي كىلتتەر تاپسىرىلادى. ال قالعان تۇرعىندار سالىنىپ جاتقان ۇيلەردىڭ پايدالانۋعا بەرىلۋىنە قاراي قونىستاناتىن بولادى.
ءۇيدى جوندەۋ مەن مۇلدەم جاڭا ءۇي سالۋدىڭ اراسى جەر مەن كوكتەي، دەدى وبلىس اكىمى. بۇگىن مۇندا بۇكىل اۋىل سالىنىپ جاتىر جانە ءبىر ءاي-بىر جارىم اي شاماسىندا بارلىق ۇيلەر پايدالانۋعا بەرىلەدى دەگەن ۇمىتتەمىز. تاسقىن زاردابى وتە اۋىر بولدى. تابيعي اپات بۇل اۋداندا عانا ەمەس، وزگە وڭىرلەردە دە ورىن الدى. ورازاقتاعى اۋقىمدى قۇرىلىس باستالماس بۇرىن 5 اۋدانداعى 84 ءۇيدى قالپىنا كەلتىردىك. العاشىندا ءبىز بۇل ماسەلەنى اۋداندىق اكىمدىك دەڭگەيىندە شەشە الدىق. سوڭعى ساتتە ورازاقتاعى توعان جويقىن سۋعا شىداس بەرمەدى. ونىڭ سالدارى بارشاڭىزعا ءمالىم.
ورازاقتا ەكى پاتەرلى 100 ءۇي سالىنادى. بۇل 200 پاتەر دەگەن ءسوز. بۇعان قوسىمشا قوسشى جانە اقمول اۋىلدارىندا تاعى دا 90 پاتەرلى ەكى ءۇيدىڭ قۇرىلىسى جەدەل قارقىنمەن ءجۇرىپ جاتىر. جۇمىس كولەمى وتە اۋقىمدى. جەرگىلىكتى تۇرعىنداردىڭ كەيبىرى سوندا كوشۋگە تىلەك ءبىلدىردى. وعان قارسى ەمەسپىز.
اكىم ءوز ءسوزىن جالپى قۇرىلىس جۇمىستارىنا 2 ميلليارد 200 ميلليون تەڭگە قارجى جۇمسالاتىندىعىمەن قورىتىندىلادى. ونىڭ ىشىندە ورازاق اۋىلىنداعى جاڭا ۇيلەرگە 1 ميلليارد 615 ميلليون تەڭگە جاراتىلماق. ال 45 پاتەرلى ەكى كوپقاباتتى ءۇيدىڭ قۇنى 320 ميلليون تەڭگەگە تەڭ. ورازاقتاعى ۇيلەر قازان ايىنىڭ سوڭىندا، ءارى بارسا 10 قاراشادا بارلىق قولايلىلىقتارىمەن پايدالانۋعا بەرىلەدى دەپ جوسپارلانۋدا. ال توتەنشە جاعدايلار جۇيەسىمەن سالىنىپ جاتقان 45 پاتەرلى ۇيلەر 20-25 قاراشادا ءوز تۇرعىندارىن قابىلدايدى. سونداي-اق، اكىمنىڭ تۇرعىندارمەن اڭگىمەسى بارىسىندا اپاتتىڭ الدىن الۋ ماقساتىندا اۋىل جاعالاي جاڭا بوگەتتەر سالىنىپ، ونىڭ بيىكتىگى بۇرىنعى 3 مەتردىڭ ورنىنا 5 مەترگە ۇزارتىلعانى بەلگىلى بولدى. جالپى، وبلىس اۋماعىنداعى سۋ تاسقىنى زاردابىن تولىق جويۋ ءۇشىن ءالى دە 320 پاتەر سالۋ قاجەت كورىنەدى.
ۇكىمەت قاۋلىسى نەگىزىندە تۇرعىن ءۇي قۇرىلىسىنا ۇكىمەت رەزەرۆىنەن 3 ميلليارد تەڭگەدەن استام ماقساتتى قارجى ءبولىندى. اتقارىلىپ جاتقان جۇمىستار بارىسى جوعارىدا اتالدى. ياعني، جۋىق ارادا 290 سەلينوگرادتىق جاڭا ۇيلەرگە قونىستاناتىنىنا سەنىم مول.
بۇعان قوسىمشا، «اقمول اۋىلىن جىلۋمەن قامتۋ جۇيەسىن قايتا قۇرۋ» جوباسىمەن جاڭا قازاندىق سالۋ جۇمىستارى اياقتالدى. قۋاتتىلىعى ساعاتىنا 53،8 گكال. بولاتىن قازاندىق 12،94 شاقىرىمدىق جىلۋ جەلىسىن قامتاماسىز ەتەدى.
دەرەككوز: ەگەمەن قازاقستان
