جاقىندا ورال قالاسىندا ب ا ق وكىلدەرىنىڭ اراسىندا قازاق سپورت جۋرناليستيكاسىنىڭ كوشباسشىسى، جازۋشى، قوعام قايراتكەرى سەيداحمەت بەردىقۇلوۆتى ەسكە تۇسىرۋگە ارنالعان ءىى رەسپۋبليكالىق سپارتاكيادا ءوتتى.
وعان استانا، الماتى قالالارى مەن ەلىمىزدىڭ جەتى وبلىسى جانە رەسپۋبليكالىق تەلەارنالاردان 12 كوماندا قاتىستى. كوماندالار سپورتتىڭ بىرنەشە تۇرىنەن، اتاپ ايتقاندا، شاعىن فۋتبول، ۆولەيبول، جەڭىل اتلەتيكا، ءجۇزۋ، قول كۇرەسى، ۇستەل تەننيسى، باسكەتبول، شاحمات، گىر كوتەرۋدەن كۇش سىناستى.
سپارتاكيادا 31 قازان مەن 2 قاراشا كۇندەرى ءوتتى. جارىس باستالار الدىندا مادەنيەت جانە سپورت مينيسترلىگى سپورت جانە دەنە شىنىقتىرۋ كوميتەتىنىڭ بۇقارالىق جانە وليمپيادالىق ەمەس سپورت تۇرلەرىن دامىتۋ باسقارماسىنىڭ باسشىسى بەكبولات بايجانوۆ باسپا ءسوز ءماسليحاتىن وتكىزىپ، سپارتاكيادانىڭ ەلباسى نۇرسۇلتان نازاربايەۆتىڭ جولداۋى مەن دەنساۋلىق ساقتاۋ سالاسىن دامىتۋدىڭ 2011-2015 جىلدارعا ارنالعان «سالاماتتى قازاقستان» مەملەكەتتىك باعدارلاماسىن ىسكە اسىرۋ، بۇقارالىق سپورتتى دامىتۋ جانە سالاماتتى ءومىر سالتىن ب ا ق قىزمەتكەرلەرى اراسىندا ناسيحاتتاۋ ماقساتىندا وتكىزىلەتىنىن ايتتى. وسى كۇنى مانداتتىق كوميسسيانىڭ وتىرىسى ءوتىپ، جەرەبە تاستالدى. سول جەردە كوماندالار قارسىلاستارىن انىقتاپ الدى.
كەلەسى كۇنى جارىستار ورالدىڭ بىرنەشە سپورت زالىندا ءوتتى. مىسالى، استانادان سپارتاكياداعا جالعىز بارعان «ەگەمەن قازاقستان» گازەتىنىڭ ءتىلشىسى ۇستەل تەننيسىنەن وتكەن تۋرنيرگە قاتىستى. وسى كەزدە شاحمات، سۋعا ءجۇزۋ، قول كۇرەسى، گىر كوتەرۋ، جەڭىل اتلەتيكادان جارىستار ءوتىپ جاتتى. بۇل جارىستاردىڭ بارلىعى كۇنى بويى وتسە، كوماندالىق سپورت تۇرلەرىنەن سىندار سپارتاكيادانىڭ جابىلۋ سالتاناتىنا دەيىن جالعاستى. ءسويتىپ، سپارتاكيادانىڭ قورىتىندىسىندا جالپىكوماندالىق ەسەپتە «حابار» تەلەارناسى جەڭىمپاز اتانسا، ەكىنشى ورىندى «قازاقستان» تەلەارناسى، ءۇشىنشى ورىندى اقتوبە وبلىسىنىڭ كومانداسى يەلەندى.
جالپى ايتقاندا، سپارتاكيادا جاقسى ءوتتى. جۋرناليستەر ءۇش كۇن بويى وزدەرى جارىسقا قاتىسىپ قويماي، باتىس قازاقستان وبلىسىندا سپورتتى دامىتۋعا بارلىق جاعدايدىڭ جاسالعانىن كورىپ قايتتى. بۇعان دەيىن مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتى 2011 جىلى شىمكەنت قالاسىندا جۋرناليستەردىڭ العاشقى سپارتاكياداسىن وتكىزگەن بولاتىن. مينيسترلىكتىڭ سپورت جانە دەنە شىنىقتىرۋ ىستەرى كوميتەتىنىڭ باسپا ءسوز حاتشىسى باقىتبەك ءحاميتتىڭ ايتۋىنشا، ەندى كەلەسى سپارتاكيادانىڭ قاي جەردە وتەتىنى 2018 جىلى بەلگىلى بولادى. «ال شاعىن فۋتبولدان ب ا ق وكىلدەرىنىڭ اراسىندا سەيداحمەت بەردىقۇلوۆتى ەسكە تۇسىرۋگە ارنالعان تۋرنير جىل سايىن ءوتىپ تۇراتىن بولادى. بۇل تۋرنير ون جىلدان استام ۋاقىتتان بەرى وتكىزىلىپ كەلەدى. قاءزىر مينيسترلىك تاراپىنان ونىڭ اياسىن كەڭەيتۋ ماقساتىندا شارالار قولعا الىنىپ جاتىر»، دەدى ول.
سپارتاكيادانىڭ سوڭىندا جەءڭىمپازدار مەن جۇلدەگەرلەرگە باعالى سىيلىقتار تابىس ەتىلدى.
دەرەككوز:ەگەمەن قازاقستان
