كەشە «نۇر وتان» پارتياسىنىڭ ورتالىق اپپاراتىندا «نۇر وتان» پارتياسى ءتوراعاسىنىڭ ءبىرىنشى ورىنباسارى اسقار مىرزاحمەتوۆتىڭ قاتىسۋىمەن پارتيا جانىنداعى مادەنيەت پەن ونەردى دامىتۋ ماسەلەلەرى جونىندەگى «ميراس» رەسپۋبليكالىق قوعامدىق كەڭەسىنىڭ كەڭەيتىلگەن وتىرىسى ءوتتى.
كۇن تارتىبىندە ەلباسى، پارتيا ءتوراعاسى ن.ءا.نازاربايەۆتىڭ «ۇلى دالا ەلى» يدەياسىن ناسيحاتتاۋ شارالارى جانە قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسىنىڭ ورىندالۋى ماسەلەلەرى قارالىپ، مەملەكەتتىك ءتىلدىڭ بيزنەس پەن مەملەكەتتىك قىزمەت سالاسىنداعى قولدانىلۋ اياسى تالقىلاندى.
وتىرىستى پارلامەنت ءماجىلىسىنىڭ دەپۋتاتى، كەڭەس ءتوراعاسى ماۋلەن اشىمبايەۆ اشىپ، بيىلعى جىلى ءۇشىنشى رەت وتكىزىلىپ وتىرعان بۇل كەڭەس وسى كەزەڭ ىشىندە قوعامداعى بىرلىك پەن ىنتىماقتى ساقتاۋ، قازاقستاندىق ءپاتريوتيزمدى قالىپتاستىرۋ باعىتىندا ەل زيالىلارى پىكىر بىلدىرەتىن الاڭ بولىپ ايقىندالعاندىعىن اتاپ ءوتتى. كەڭەستىڭ كەزەكتى وتىرىسىندا دا اۋقىمى كەڭ، ءمانى تەرەڭ ماسەلەلەر قامتىلعاندىعىن جەتكىزىپ، ەلدىك ماسەلەلەردى ەركىن تالقىلاپ، وي بولىسۋگە شاقىردى.
ەلباسى، پارتيا ءتوراعاسى ن.ءا.نازاربايەۆ­تىڭ «ۇلى دالا ەلى» يدەيا­سى – حالقىمىزدى بىرەگەي اتاۋدىڭ استىنا توپتاستىرىپ، ورتاق ماقساتقا جۇمىلدىرۋدى، وزىندىك تاريحى مەن وركەنيەتى، دەربەس بولمىسى مەن مادەنيەتى قالىپتاسقان ەل رەتىندە الەمگە تانىتۋدى ماقسات تۇتادى. وسى ماسەلە جونىندە كەڭىنەن توقتالعان پارتيا ءتوراعاسىنىڭ ءبىرىنشى ورىنباسارى ا.مىرزاحمەتوۆ «نۇر وتان» پارتياسى مادەني جانە رۋحاني قۇندىلىقتاردى ساقتاپ، ۇلعايتۋدى ءوز دوكتريناسىندا باسىمدىق رەتىندە بەلگىلەپ وتىرعانىن اتاپ ءوتىپ، بۇل جوبالار مەملەكەت باسشىسىنىڭ «ۇلى دالا ەلى» يدەياسىمەن تۇتاستاي ۇيلەسىم تاپقاندىعىن جەتكىزدى. ەلباسى ۇسىنعان ومىرشەڭ ۇعىمدى جۇزەگە اسىرۋدا پارتيا تاراپىنان ءبىرقاتار تىڭ باستامالار قولعا الىنىپ جاتقاندىعىن مالىمدەدى.
اتاپ ايتقاندا، «نۇر وتان» پارتيا­سى «ۇلى دالا ەلى» ۇعىمىن بىلدىرەتىن نىشاننىڭ (لوگوتيپتىڭ) قابىلدانۋىنا ءوز ۇلەسىن قوسىپ، ديزاينەرلەر اراسىندا كونكۋرس وتكىزبەك. وسى يدەيانى ناسيحاتتاۋعا ارنالعان رەسپۋبليكالىق ءىس-شارالار جوسپارىن ازىرلەۋدى قولعا الىپ، «ۇلى دالا وركەنيەتى» بەينە ەنسيكلوپەدياسىن شىعارۋعا سەپ بولماق. پارتيالىق بۇقارالىق اقپارات قۇرالدارى ارقىلى «ۇلى دالا وسيەتى» جەلىسىمەن حالقىمىزدىڭ كەمەڭگەر تۇلعالارىنىڭ ەلدىك پەن بىرلىكتى ساقتاۋ تۋرالى ايتقان دانالىق سوزدەرىن جۇيەلى تۇردە ناسيحاتتاماق. دالا تاريحى مەن وركەنيەتىن، مادەنيەتىن دارىپتەيتىن قىسقامەتراجدى فيلمدەردىڭ تۇسىرىلۋىنە ىقپال ەتىپ، الەۋمەتتىك جەلىلەر ارقىلى تاراتۋعا مۇرىندىق بولماق. «جاس وتان» جاستار قاناتىنىڭ شارالارىن «ۇلى دالا ەلى» يدەياسىمەن ۇيلەستىرىپ، «جاس ۇلان» قوزعالىسىن وسى يدەيامەن ۇشتاستىرماق.
«ەلباسى حالىقتىق بەس رەفورمادا بولاشاعى ءبىرتۇتاس ۇلتتى قالىپتاستىرۋدا مەملەكەت قۇراۋشى ۇلت رەتىندە حالقىمىزعا ەرەكشە جاۋاپكەرشىلىك جۇكتەلەتىنىن اتاپ كورسەتتى. وسى ورايدا، «ميراس» قوعامدىق كەڭەسى شەجىرەلى تاريحىمىز بەن باي مادەنيەتىمىزدى تۇگەندەۋگە، رۋحاني قۇندىلىقتارىمىزدى جاڭعىرتۋعا ولشەۋسىز ۇلەس قوسىپ، بۇكىل ەلدىڭ مادەني-رۋحاني وركەندەۋىنە قىزمەت ەتىپ كەلەدى. الداعى ۋاقىتتا قوعامدى ورتاق يدەيا شەڭبەرىندەگى باستامالارعا جۇمىلدىرىپ، جەتكەن جەتىستىكتى ەسەلەۋ پارىز. بۇگىنگى كەزدەسۋدەگى باستى ماقسات – وزدەرىڭىزبەن وسى ماسەلە بويىنشا وي ءبولىسۋ»، – دەدى ا.مىرزاحمەتوۆ.
مەملەكەت باسشىسى ۇسىنعان يدەيانىڭ اياسىنا قوعامدى توپتاستىرۋ جونىندە ءوز ۇسىنىس-پىكىرلەرىن بىلدىرگەن مەملەكەت جانە قوعام قايراتكەرى، فيلولوگيا عىلىمدارىنىڭ دوكتورى، پروفەسسور مىرزاتاي جولداسبەكوۆ، قازاقستاننىڭ ەڭبەك سىڭىرگەن ءارتىسى، قوعام قايراتكەرى، ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان، حالىقارالىق تۇركى اكادەمياسىنىڭ پرەزيدەنتى دارحان ءقىدىرالى ەلباسى قازاقستاننىڭ بەيرەسمي سيمۆولدىق اتاۋىن بۇكىل الەم بويىنشا ىلگەرىلەتۋ تۋرالى تىڭ مىندەت قويعاندىعىن اتاپ ءوتىپ، بۇل ءوز كەزەگىندە ۇلى دالانىڭ مول رۋحاني بايلىعىن قوعامدىق سانادا جاڭعىرتۋعا باستايتىن قادام دەپ باعالادى. ەل زيا­لىلارى «مەملەكەتىمىزگە «ۇلى دالا ەلى» اتالىمىنىڭ تەلىنۋى حالقىمىزدىڭ وتكەنىن بۇگىنىمەن جالعاپ، كەلەشەگىن كەمەل ەتپەك. ۇلت ۋىزىنا بالاناتىن سالت-سانامىزبەن قايتا قاۋىشتىرىپ، سان عاسىرلىق ءبولمىس-بىتىمىمىزدى بەكەمدەي تۇسپەك. سوندىقتان، ەلىمىزدىڭ سيمۆولدىق اتاۋى ۇرپاق جادىنا تاۋەلسىزدىك يدەياسىن سىنالاپ سىڭىرەدى»، – دەپ وي ءتۇيدى.
كەڭەستىڭ كۇن تارتىبىنە قويىلعان ەكىنشى ماسەلە – قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسىنىڭ ورىندالۋى بويىنشا ەسەپتى مادەنيەت جانە سپورت ۆيسە-مينيسترى مارات ءازىلحانوۆ جاسادى. ول ءوز سوزىندە مەملەكەتتىك باعدارلاما اياسىندا جوسپارلانعان شارالاردىڭ اتقارىلۋى جونىندە كەڭ ماعلۇمات بەردى. مەملەكەتتىك ورگانداردا مەملەكەتتىك تىلدە ءىس جۇرگىزۋ كەزەڭ-كەزەڭىمەن جۇزەگە اسىپ جاتقاندىعىن مالىمدەپ، ءتىل ساياساتى سالاسىنداعى تۇيىندەردى تارقاتۋدا مينيسترلىك تاراپىنان ۇسىنىلىپ وتىرعان باستامالاردى ورتاعا سالدى.
وسى ماسەلە جونىندە پىكىر بىلدىرگەن پارلامەنت سەناتىنىڭ دەپۋتاتى نۇرلان ورازالين ەلباسىنىڭ «ۇلى دالا ەلى» يدەياسى شەڭبەرىندە مەملەكەتتىك ءتىل دە وركەن جايۋى كەرەكتىگىنە نازار اۋداردى.
كەڭەس وتىرىسىن قورىتىندىلاعان م.اشىمبايەۆ ماڭىزدى ماسەلەلەر قارالعان كەلەلى جيىندا قاتىسۋشىلار تاراپىنان قۇندى وي-پىكىرلەر ايتىلعانىن، بۇل ۇسىنىستار مەملەكەتتىك ورگاندارعا ءتيىستى شەشىم شىعارۋ ءۇشىن جولداناتىنىن مالىمدەپ، جيىنعا بەلسەنە قاتىسقان كەڭەس مۇشەلەرىنە العىسىن ءبىلدىردى.

دەرەككوز: ەگەمەن قازاقستان