وتىزدان استام كىتاپتىڭ اۆتورى – اڭگىمە جازۋدىڭ شەبەرى، كورنەكتى پروزاشى، قازاقستاننىڭ ەڭبەك سىڭىرگەن قايراتكەرى الىبەك اسقاروۆ بىرىككەن ۇلتتار ۇيىمى اياسىندا قۇرىلعان حالىقارالىق جازۋشىلار وداعىنىڭ «ۇلت ماقتانىشى» توسبەلگىسىمەن ماراپاتتالىپ وتىر.
جازۋشىعا ۇلكەن جاۋاپكەرشىلىك جۇكتەيتىن حالىقارالىق سىيلىق الىبەك اسقاروۆتىڭ ءوزى باسقارىپ وتىرعان ق ر ۇلتتىق كىتاپحاناسىنىڭ ۇجىمى الدىندا تابىستالىپ، قازاق ادەبيەتى ءۇشىن ايتۋلى وقيعاعا الماتىداعى زيالى قاۋىم وكىلدەرى ورتاقتاستى. جازۋشىنىڭ «سوسياليزم اڭگىمەلەرى» مەن «ايەل پاراساتى» توپتاماسىنا بەرىلگەن توسبەلگىنى «بەيبىتشىلىك الەمى» حالىقارالىق قازاق شىعارماشىلىق بىرلەستىگىنىڭ قاراعاندى وبلىسى بويىنشا وكىلەتتى ديرەكتورى مۇحامەدقالي بايمۇحانوۆ تاپسىردى.
ءارى قازاق قالامگەرلەرىنىڭ دە قاۋىشىپ، ديدارلاسۋىنا سەپتەسكەن سالتاناتتى وقيعادا ادەبيەتتىڭ، اڭگىمە جانرىنىڭ توڭىرەگىندە تاماشا پىكىرلەر ايتىلدى. الىبەك اسقاروۆتىڭ قالامىنا ارقاۋ بولعان ايەل جانىنىڭ كۇردەلىلىگى، انا پاراساتى، قيىندىق كورسە قايىسپاعان قازاق قىزدارىنىڭ كوركەم بەينەسى تۋرالى ءسوز بولدى. كوركەم ادەبيەتكە دەگەن زامانا تالابى، وقىرمان سۇرانىسى جايلى ءمۇددەلى ويلار ورتاعا سالىندى.
– الىبەك اسقاروۆ – بۇگىنگى ادەبيەتىمىزدىڭ كورنەكتى وكىلى، قوعام قايراتكەرى. جازۋشىنىڭ سونى ءتاسىل، تىڭ ورنەكتەرمەن ورىلگەن شىعارمالارى ەستەتيكالىق تۇرعىدان اسەرلى، كوركەمدىك دەڭگەيى بيىك دۇنيەلەر. سونداي-اق، ول شىعارمالار وبراز سومداۋداعى وزىندىك تاسىلمەن، بوياۋىنىڭ قانىقتىعىمەن، تابيعاتتى سۋرەتتەۋدەگى نازىك ناقىشتارىمەن دارالانادى. تابيعاتى تۇنىپ تۇرعان كاتونقاراعاي ءوڭىرىنىڭ تۋمالارى – قاليحان ىسقاق، ورالحان بوكەيەۆ سىندى كوركەمسوز زەرگەرلەرىنىڭ لايىقتى ءىزباسارى بولا بىلگەن الىبەك اسقاروۆ وسى ءۇردىستى جالعاستىرىپ كەلەدى.
الىبەك اسقاروۆتىڭ ءاربىر شىعارماسى تىلسىم تابيعاتقا، تۋعان جەرگە، اۋىل ادامدارىنا دەگەن سۇيىسپەنشىلىككە، جۇرەك جىلۋىنا تولى. جازۋشى شەبەرلىگىنىڭ ءبىر سىرى – كەز كەلگەن ۋاقىت وزگەرىستەرىن، زامان تالقىسىن وقىرمان كوز الدىنا كەلەتىندەي قازاقتىڭ قاراسوزىمەن سومداي ءبىلۋى، دەيدى ارىپتەستەرى قالامگەردىڭ قولتاڭباسى جايىندا.
الماتى زيالىلارىنىڭ رۋحاني ورداسىنا اينالىپ كەلە جاتقان ۇلتتىق كىتاپحانادا جالپى ادەبيەتكە قاتىستى، ونىڭ ىشىندە، سۋرەتشى-جازۋشى الىبەك اسقاروۆتىڭ تۋىندىلارىن دارالايتىن ايشىقتى ءستيلى حاقىندا ادەمى اڭگىمە ءوربىدى.
دەرەككوز: ەگەمەن قازاقستان
