كوپتەگەن ۇلت پەن ءدىنءنىڭ وكىلدەرىن شاشاۋ شىعارماي، ءتاتۋ-تاتتى ءتىرشىلىكتە ۇستاپ وتىرعان ورتاق شاڭىراعىمىز قازاقستاننىڭ ۇلتتىق يدەياسى – ەلباسى نۇرسۇلتان نازاربايەۆ ايشىقتاعان «ءماڭگىلىك ەل» جالپىۇلتتىق يدەياسى عانا ەمەس، ءبىرنەشە ۇرپاقتىڭ ومىرلىك ۇستانىمىنا اينالاتىن ۇلى مۇددە.
قوعامدى ۇيىستىراتىن ادامي قاسيەتتەر مەن پەرزەنتتىك مىندەتتەر تۇرعىسىندا قازاقتىڭ كۇمىسكومەي ءانشىسى، ۇلى دالانىڭ بۇلبۇل ءۇنى، كسرو حالىق ءارتىسى بيبىگۇل تولەگەنوۆانى اڭگىمەگە تارتقان ەدىك.
– بيبىگۇل اپا، ونەرىڭىز بەن تالانتىڭىزدىڭ ارقاسىندا تۋعان حالقىڭىزعا قىزمەت ەتۋمەن قاتار، ەلدىك پەن تەڭدىكتى پاش ەتىپ، ۇلتتىق تاتۋلىقتى ناسيحاتتايتىن رۋحاني-مادەني شارالاردىڭ دا بەل ورتاسىندا ءجۇرسىز. ۇلت بىرلىگىنە ۇندەيتىن سونداي يگى شارالار جونىندە نە ايتاسىز؟
– ەل بىرلىگىن ناسيحاتتاپ، مەملەكەتىمىزدىڭ نىعايۋى مەن ۇلتتار دوستىعىنىڭ بەرىكتىگىن باياندى ەتەتىن يگى شارالار بىزدە ۇدايى وتكىزىلىپ تۇرادى. حالقىمىزدىڭ اۋىزبىرشىلىگى مەن ەل تىنىشتىعىنا مۇنداي باسقوسۋلار مەن مەملەكەتتىك يدەولوگيالىق باعدارلامالاردىڭ قوسارى كوپ. بىزدەگى بەيبىت ءومىردىڭ كىلتى دە وسىندا بولسا كەرەك.
بيىل ەلوردامىز استانادا «ماڭگىلىك ەل – بولاشاعى ءبىرتۇتاس ەل» اتتى پاتريوتتار فورۋمى بولىپ، وندا ەلىمىزدىڭ ءار تۇكپىرىنەن وتانىن قۇرمەت تۇتىپ، ۇلتىن سۇيەتىن ۇل-قىزدار، ونەر جانە مادەنيەت قايراتكەرلەرى، قازاق رۋحانياتى مەن ەكونوميكاسىنا زور ۇلەس قوسىپ جۇرگەن تارلاندارىمىز، مەملەكەتىمىزدە ءتاتۋ-تاتتى ءومىر ءسۇرىپ جاتقان بارشا ۇلت وكىلدەرىنىڭ اتىنان كەلگەن پاتريوتتار قاتىستى. كىسىنى ءبىر قۋانتاتىنى – قازاقستانداعى دوستىق پەن باۋىرلاستىققا، ەلىمىزدىڭ دامۋى مەن ىلگەرى باسۋىنا وسى ۇلان-بايتاق جەرىمىزدى مەكەن ەتىپ جاتقان بارلىق ۇلت وكىلدەرىنىڭ شىنايى اتسالىسىپ وتىرعاندارىنا كۋا بولۋ جانە ادامزاتتىق ۇلى مىندەت جولىندا بىرلەسە ەڭبەكتەنۋدى سەزىنۋ ەكەن.
– بىرلىكتى ماقسات تۇتقان بۇگىنگى قازاقستاننىڭ باعدارى قانداي دەپ ويلايسىز؟
– ەل بىرلىگىنىڭ رۋحاني وزەگى ءارى العا باسۋداعى ناقتى باعدار ول جالپىحالىقتىق «ماڭگىلىك ەل» يدەياسى بولىپ تابىلادى. ەلباسى نۇرسۇلتان نازاربايەۆ ءاردايىم ەل تىنىشتىعى مەن ۇلتتار دوستىعى، الەمدە كەزدەسەتىن ءتۇرلى كەدەرگىلەرگە ءبىرتۇتاس ۇلت رەتىندە مويىماي، بەيبىت تۇردە جاۋاپ بەرە ءبىلۋ، ءومىر جولىندا سەپتەسىپ قاتار جۇرە وتىرىپ، قورشاعان ورتاعا پايدا كەلتىرۋ تۋرالى تالماي ايتىپ كەلەدى. مىنە، ادامزات قۇندىلىعىنىڭ التىن تىرەگى بولعان ۇلى ماقسات ەلىمىزدىڭ مەملەكەتتىك يدەياسىنا اينالىپ، تاتۋ حالقىمىزدى تاعى دا ءبىر ماقسات اياسىندا بىرىكتىرە تۇسۋدە.
بۇگىندە قازاقستان – كوپتەگەن يگى ناتيجەلەرگە قول جەتكىزگەن ەل. تىرشىلىكتىڭ بارلىق سالاسىندا. وسىنداي بىرلىگى مەن بەرەكەسى جاراسقان ەلدى نىعايتا ءتۇسۋ ءۇشىن بىزدەر، ونەر مەن ادەبيەت، ساياسات پەن ەكونوميكا، ءبىلىم مەن عىلىم سالاسىندا جۇرگەن ءاربىر قازاقستاندىق ءوز سالامىزدا وزىق بولۋىمىز كەرەك. ەلىن سۇيگەن پاتريوتتىق دەگەنىمىز وسى، ەلباسى ايتقان «ماڭگىلىك ەل» وسى. الدىڭعى بۋىن وكىلدەرى قازاق حالقىنىڭ تۇتاستىعى مەن كەلەر عاسىرعا جەتۋىنە ءوز ۇلەسىن قوسا ءبىلدى، ەندىگى ءۇمىت جاستاردا. ەگەر ءبىزدىڭ بۇگىنگى ۇرپاق ءبىلىمى اسىپ، ءبىر-بىر سالانى مەڭگەرسە، ءوز ءىسىنىڭ مايتالمانى بولسا، وندا قازاقستان دامىعان ۇستىنە دامي بەرمەك، ۇلتىمىزدىڭ ادامزاتتىق كەڭىستىگى كەڭي تۇسپەك.
– «ۇلتتى ءسۇيۋ، وتانعا قىزمەت ەتۋ – يماننان» دەپ ايتقان ەكەن الدىڭعى اعا بۋىن وكىلدەرى، ءسىزدىڭ پايىمىڭىزداعى ناعىز پاتريوت – ول كىم؟
– مەنىڭ ۇعىمىمداعى ناعىز پاتريوت – ول ءوز ءومىرىن تۋعان ەلىنە، تۋعان حالقىنا ارناعان ادام. ەڭبەكتىڭ بەلگىلى ءبىر سالاسىن مەڭگەرۋمەن قاتار، وعان بارىن سالا جانداندىرىپ، جاڭالىق ەنگىزەتىن جانە سول ءىسىن ءوز مەملەكەتىنىڭ ىلگەرى دامۋى ءۇشىن جاسايتىن ادام، مىنە، ناعىز پاتريوت. مەنىڭ جۇرەگىمدەگى ۇلكەن ارمانىم – اسپانىمىز ماڭگى اشىق بولىپ، ەلىمىز بەيبىتشىلىكتە، حالقىمىز تىنىشتىق پەن توقشىلىقتا كۇن كەشسە، سونداي-اق، مەملەكەتتىلىگىمىزدى قالىپتاستىرا ءتۇسۋ جولىندا ەش كەدەرگى بولماسا ەكەن دەگەن ارمان. «ماڭگىلىك ەل» يدەياسى بارشا قازاقستاندىقتاردىڭ جۇرەگىنەن ورىن الدى، ەندى كۇللى الەم ءبىزدىڭ بەيبىت ەلىمىز – قازاقستاننىڭ شىن مانىندەگى «ماڭگىلىك ەل» ەكەندىگىنە كۋا بولا بەرسە ەكەن دەيمىن.
اڭگىمەلەسكەن
قانات ەسكەندىر،
دەرەككوز: ەگەمەن قازاقستان
