كەشە پرەزيدەنت جانىنداعى ورتالىق كوممۋنيكاسيالار قىزمەتىندە وتكەن كەزەكتى باسپا ءسوز ءماسليحاتىندا استانا تۇرعىندارىن جۇمىسپەن قامتۋ جايى تالقىلاندى. وندا ءمالىم بولعانداي، قازاقستان بويىنشا جۇمىسسىزدىقتىڭ ەڭ تومەنگى كورسەتكىشى استانادا تىركەلگەن ەكەن. ياعني، جۇمىسپەن قامتۋ باعدارلامالارىنىڭ اياسىندا استانانىڭ جەتى مىڭنان استام تۇرعىنى جۇمىسپەن قامتىلعان.
«استانانىڭ ەڭبەك نارىعىنا جۇرگىزگەن تالداۋىنىڭ نەگىزىندە اكىمدىك ازاماتتاردى جۇمىسپەن قامتۋ ماسەلەلەرىن شەشۋگە باعىتتالعان ناقتى ءىس-قيمىلدار جۇيەسىن ازىرلەدى. بارلىق جۇمىس استانا قالاسىنىڭ 2011-2015 جىلدارعا ارنالعان باعدارلاماسى جانە «جۇمىسپەن قامتۋدىڭ جول كارتاسى-2020» اياسىندا جۇرگىزىلىپ جاتىر»، دەدى باسپا ءسوز ءماسليحاتىنا قاتىسقان استانانىڭ جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ولگا دەموشكان. سونداي-اق، ول استانانىڭ ەڭبەك نارىعىنداعى جاعدايدى تۇراقتاندىرۋ ءۇشىن «استانا قالاسىنىڭ حالقىن جۇمىسپەن قامتاماسىز ەتۋدىڭ 2015 جىلعا ارنالعان كەشەندى جوسپارى» ىسكە اسىرىلىپ جاتقانىن تىلگە تيەك ەتتى. وسى ورايدا قىزمەتىنەن بوساعان جۇمىسشىلاردى ەڭبەكپەن قامتۋعا نەگىزدەلگەن شارالار اتقارىلۋدا. و.دەموشكاننىڭ مالىمدەۋىنشە، جەتى مىڭنان استام ادام باعدارلاماعا جۇمىلدىرىلىپ، ولاردىڭ 6590-ى جۇمىسپەن قامتىلعان، كاسىبي وقىتۋعا 772 ادام جىبەرىلىپتى، تولەنەتىن قوعامدىق جۇمىستاردا 1375 ادام ىستەۋدە. سونىمەن قاتار، الەۋمەتتىك جۇمىستارعا 102 ادام ورنالاستىرىلعان، تاعى 416-سى جاستار تاجىريبەسىنە جىبەرىلىپتى.
«بۇگىندە ەلوردامىزداعى ەكونوميكالىق بەلسەندى حالىقتىڭ سانى 428 مىڭعا جەتتى، ءوزىن-وزى جۇمىسپەن قامتىعاندار – 22 مىڭ. جۇمىسسىزدىق دەڭگەيى 0،6 پايىزعا تومەندەپ، 4،6 پايىزدى قۇرادى. بۇل ءوز كەزەگىندە استاناعا قازاقستان بويىنشا كوشباسشى پوزيسيادا تۇراقتاۋعا مۇمكىندىك بەردى»، دەدى و.دەموشكان.
ال ەندى استانا اكىمدىگىنىڭ جۇمىسپەن قامتۋ ورتالىعىنىڭ ديرەكتورى ولجاس وماروۆتىڭ ايتۋىنشا، ەلوردادا جۇمىسپەن قامتۋ ورتالىعىنا جۇگىنگەن ءاربىر ەكىنشى جۇمىسسىز ەڭبەكپەن قامتىلىپ جاتىر. «جىل باسىنان بەرگى 10 ايدا بىزگە 10 مىڭعا جۋىق ادام كەلىپ، 4،5 مىڭىن جۇمىسقا ورنالاستىردىق. ياعني، بىزگە جولىققانداردىڭ ءاربىر ەكىنشىسى جۇمىسپەن قامتىلدى»، دەدى ول. و.وماروۆتىڭ سوزىنە قاراعاندا، ەگەر دە قانداي دا ءبىر سەبەپتەرمەن جۇمىسقا ورنالاسۋ مۇمكىن بولماي جاتسا، وندا قايتا دايارلاۋ كۋرستارى ۇسىنىلادى. وسى ورايدا اعىمداعى جىلى 627 ادام قايتا دايارلاۋدان وتكەن.
سونىمەن قاتار، جاستارعا، ورتاشا ارنايى، جوعارى وقۋ ورىندارىنىڭ تۇلەكتەرى ءۇشىن ەڭبەگى تولەنەتىن جاستار تاجىريبەسىنەن ءوتۋ ۇسىنىلادى. بيىل 585 ادام جاستار تاجىريبەسىنە جىبەرىلدى. اتاپ ايتقاندا، مەملەكەت ايىنا 40 مىڭ تەڭگە تولەيدى. بۇدان بولەك و.وماروۆ حالىقتىڭ ماقساتتى توپتارى ءۇشىن الەۋمەتتىك جۇمىس ورىندارىنا جۇمىسقا ورنالاسۋدىڭ ارنايى باعدارلاماسى بار ەكەنىن ەسكە سالىپ ءوتتى. مۇنىمەن قوسا، جۇمىسسىزدار ۋاقىتشا جۇمىس ورىندارىنا جىبەرىلەدى، ياعني ەڭبەكاقىسى تولەنەتىن قوعامدىق جۇمىستارمەن قامتىلادى. بيىل 1700 ادام وسىنداي جەرلەرگە باعىتتالدى.
«وقۋداعى جاستارعا، ستۋدەنتتەرگە ارنالعان ءتيىستى شارا بار. وقۋدان بوس ۋاقىتىندا ولار قوسىمشا تابىس تابا الادى. 1،5 مىڭعا جۋىق ستۋدەنت وسى شارامەن قامتىلدى. سونىمەن بىرگە، ورتالىق بوس جۇمىس ورىندارى جارمەڭكەلەرىن وتكىزەدى. بيىل 12 جارمەڭكە ۇيىمداستىرىلدى»، دەدى ول.

دەرەككوز: ەگەمەن قازاقستان