وسىنداي جانايقاي بۇگىن پارلامەنت سەناتىنىڭ تورىنەن ەستىلدى. ايتقان – سەنات دەپۋتاتى قۋانىش ايتاحانوۆ. بۇل تۋرالى «قامشى» پورتالى حابارلايدى.
بۇگىن سەناتتا قازاقستان رەسپۋبليكاسى مەن حالىقارالىق دامۋ جانە قايتا قۇرۋ بانكى اراسىنداعى قارىز تۋرالى زاڭ جوباسىن تالقىلاۋ قىزۋ پىكىر-تالاسقا ۇلاستى. سەناتورلار كاسىپكەرلەردى وقىتۋ مەن ءىس-ساپارعا جىبەرۋ ءۇشىن دە 40 ميلليون دوللار قارىز الۋ كەرەك پە دەپ، ۇكىمەت ازىرلەگەن زاڭ جوباسىنا قارسى شىقتى.
جوعارى پالاتا دەپۋتاتى قۋانىش ايتاحانوۆ «مينيسترلىكتىڭ بولجامىنشا بۇل قاراجات وقىتۋ مەن ترەنينگتەر وتكىزۋ ءۇشىن جۇمسالادى ەكەن. ياعني، قاراجات جول ءجۇرۋ مەن تاماقتانۋعا باعىتتالادى. بىزگە قازىرگى ۋاقىتتا وسىنداي نەسيەلەر كەرەك پە؟ بۇگىنگى جاعدايدا بۇل ارتىق شىعىن ەمەس پە؟»،-دەپ سۇراقتى توتەسىنەن قويدى.
دەپۋتاتتىڭ جۇرگىزگەن زەرتتەۋىنشە، ۇستىمىزدەگى جىلدىڭ 1 قازانىنداعى جاعداي بويىنشا ەلدىڭ مەملەكەتتىك قارىزى 7،6 تريلليون تەڭگەگە جەتكەن. ونىڭ 98،8 پايىزىن ۇكىمەت قارىزى قۇرايدى.
«تەك 9 ايدا ۇكىمەتتىك قارىز ۆاليۋتا باعامىنداعى ايىرماشىلىقتى قوسا ەسەپتەگەندە 1،9 تريلليون تەڭگەگە ارتقان. مىنا تۇرىمىزبەن بۇل قارىزداردى وسكەلەڭ ۇرپاقتىڭ موينىنا ءىلىپ قويۋىمىز مۇمكىن»،- دەيدى سەناتور.
ميللياردتاعان قارىزداردى سەناتور شاعىن جانە ورتا بيزنەسكە ارزان نەسيە تۇرىندە بەرىپ، اكىمشىلىك كەدەرگىلەردى جويۋدى ۇسىندى.
«كاسىپكەرلىك ماسەلەلەرىن شەشسەك، ءبىز شەتەلدەن بۇلاي كوپ مولشەردە قارىز سۇرامايتىن بولامىز. بۇلاي قارىز الاردا مەملەكەت ونىڭ تيىمدىلىگى تۋرالى دا ويلانۋى كەرەك»، - دەگەندى قوسا ايتتى.
ءدال وسى زاڭ جوباسى تومەنگى پالاتا دەپۋتاتتارىنىڭ دا نارازىلىعىن تۋعىزعانىن ەستەرىڭىزگە سالامىز. ۇلتتىق ەكونوميكا ءمينيسترى ەربولات دوسايەۆتىڭ ايتۋىنشا، بۇل مەملەكەتتىك بيۋدجەت ەسەبىنەن تولەنەتىن جالعىز قارىز ەمەس كورىنەدى. سوعان قاراعاندا، ەل ۇكىمەتى كەز-كەلگەن قارىزدىڭ «كۇلىپ كەلىپ، جىلاپ قايتاتىنىن» تۇسىنە قويماعان سىڭايلى.
دارحان مۇقان
