تۇتىنۋشىلار تاراپىنان ۇلكەن سۇرانىسقا يە

داعدارىس ءوزىنىڭ شەڭگەلى مەن قىلبۇراۋىن قانشا جەردەن سالسا دا، ءوزىنىڭ ستراتەگيالىق مىندەتىن جان-جاقتى ويلاستىرا بىلگەن كاسىپورىنداردىڭ ۇپايى تۇگەل بولىپ قالا بەرمەك. بۇل ءوز كەزەگىندە ءونىم ساپاسىن جانە ونىڭ قاۋىپسىزدىگى مەن باسەكەگە قابىلەتتىلىگىن ودان ءارى كوتەرۋ دەگەن ءسوز. سونىمەن ءبىر مەزگىلدە شىعارىلعان ءونىمدى وتكىزۋ جونىندەگى رىنوك شەڭبەرىن ساقتاپ قانا قويماي، ونى ودان ءارى ۇلعايتۋدى كوزدەگەن كاسىپورىندارعا قانداي داعدارىس تا ءقاۋىپ تۋعىزا المايدى.

ورال وڭىرىندەگى ەت-بالىق، قۇس جانە كوكونىس تۇرلەرىن وڭدەيتىن بالاماسى جوق كاسىپورىن «كۋبلەيدى» ءدال وسى قاتارعا قوسا الامىز. ءويت­كەنى، قازىرگى ناعىز داعدارىس جاع­دايىندا دا كاسىپورىننىڭ تىنى­سى ودان ءارى كەڭەيمەسە، تارى­لا قويعان جوق. تۇراقتى دامۋ جولىن العا ۇستاي بىلگەن وتان­دىق كومپانيانىڭ ەلىمىزدەگى تا­ماق ونەركاسىبىنىڭ وركەندەۋىنە، ۇلت­تىق اسحانامىزدىڭ ءورىسى وسۋىنە قو­سىپ وتىرعان ۇلەسى قوماقتى. بيىل مۇنداعى ءونىم ءوندىرۋ ۇلەسى ءوت­كەن جىلمەن سالىستىرعاندا 10-15 پاي­ىزعا وسكەنى وسى ءسوزىمىزدىڭ دالەلى.

بۇلاي بولاتىن ءجونى دە بار ەكەن. ەكونوميكالىق-قارجى­لىق تۇر­عىدان ءبىر ىزعار مەن سالقىن­دىقتىڭ لەبىن الدىن الا سەز­گەن «كۋبلەيلىكتەر» وتكەن كوك­تەم مەن جاز ايلارىندا ءوندى­ءرىستى وركەندەتۋدىڭ كەڭ اۋقىم­دى باعدارلاماسىن جاساق­تاپ ۇلگەرىپتى. سوعان ساي تەحنو­لو­گيالىق جەلىلەر قايتا جاراقتان­دى­رىلۋدان وتكىزىلىپتى. وسى ارقى­لى زاۋىت كونۆەيەرىنەن بۇعان دەيىن تۇتىنۋشىلارعا جول تارتقان قالبىرداعى تاعام تۇرلەرى ودان ءارى كوبەيگەن. وسى تۇستا «كۋبلەي» ونىمدەرىنە الدىن الا مۇقيات سۇرىپتالعان تابيعي شيكىزات نەگىز بولاتىنىن ايتا كەتكەن ءجون.

بۇگىندە ۇلتتىق تاعام­دارى­مىزدىڭ ارتىقشىلىعى مەن ازىقتىق جۇعىمدىلىعىنا، ادام اعزاسىنا تيگىزەتىن وڭ اسەرىنە جانە ونىڭ ەكولوگيالىق تۇرعىداعى جو­عارى ساپالىق قاسيەتتەرىنە ءدۇ­نيەجۇزىلىك ساۋدا ۇيىمىنا ءمۇ­شە ەلدەر تۇتىنۋشىلارىنىڭ كوز­دەرىن جەتكىزىپ ۇلگەرە الماي جات­قانىمىز جاسىرىن ەمەس.

وسى ولقىلىعىمىزدىڭ ورنىن وتاندىق كومپانيا – «كۋبلەي» تولتىرىپ وتىر دەسەك شىندىقتان الشاق كەتپەيمىز. بۇل باعىتتا كومپانيا تەحنولوگتارى وتاندىق جانە شەتەلدىك تۇتىنۋشىلاردىڭ تالاپ-تىلەكتەرىن تولىقتاي وتەۋ ءۇشىن ۇدايى ىزدەنىستەر مەن مار­كە­تينگتىك زەرتتەۋلەرگە بوي ۇرا ءبىل­ءدى. سونىڭ ناتيجەسىندە تەك «كۋب­لەيدىڭ» وزىنە عانا ءتان كونسەرۆى ازىرلەۋ رەسەپتىسى وندىرىسكە جول تارتتى. بۇل رەسەپت – اسا باي ۇلت­تىق اس ازىرلەۋ داستۇرلەرىنە ءساي­كەستەندىرىلدى. ەڭ باستىسى، اتال­عان ونىمدەردىڭ اتى مەن زاتىنان ەش كەمىستىك كورە المايسىز.

مىنە، قالبىرلارعا سالىنعان «كۋبلەيدىڭ» ونىمدەرىنە كوز سالىپ كورەيىكشى. بۇلار «قازى»، «قارتا»، «جال»، «جايا»، «قازاقشا اسىلعان ەت»، «بۇقتىرىلعان جىلقى ەتى»، «ءازىر تۇسكى تاماق»، «شۇجىق» دەپ جالعاسىپ كەتە بەرەدى. وسى ورايدا مۇنداعى ۇجىم مۇشەلەرى اراسىندا ورنىققان باستى ۇستانىمدى دا ايتا كەتكەن ءجون. بۇل «جۇعىمدى تاماق – ۇلت ساۋلىعى» دەلىنەدى. قالبىرداعى وتاندىق ونىمدەردىڭ تاعى ءبىر ارتىقشىلىعى – تابي­عي­لىعى مەن نارلىلىگىندە. اسا ءدام­دىلىگىندە. اسىرەسە، ەسىل ۋاقىت جەتە بەرمەيتىن وت الا قاشقان بۇگىن­گىدەي قىم-قۋىت كەزدە ونى وتە تەز پايدالانۋعا بولاتىندىعىندا. قالبىردىڭ قاقپاسىن قايىرىپ، قىزدىرا قويساڭىز قاس پەن كوزدىڭ اراسىندا تۇسكى تاماق ءازىر دەي بەرىڭىز.

«كۋبلەي» – حالقىمىزدىڭ ەجەل­گى ۇلتتىق تاعامدارىن قارا قا­زاننان جاڭا تۇسكەندەي بۋى بۇر­قىراعان ءازىر كۇيىندە قالبىرلاپ تۇتىنۋشىعا ۇسىنۋ تەحنولوگياسىن تەرەڭ تۇيسىنە بىلگەن ەلىمىزدەگى بالاماسى جوق كومپانيا. ونىڭ ونىمدەرىنىڭ وتىمدىلىگىنىڭ باستى سىرى – ەكولوگيالىق تۇرعىدان تازالىعىندا، قانداي دا بولماسىن جاساندى قوسپالار مەن دامدەۋىشتەرسىز ازىرلەنەتىنىندە، ءارى ازىق-تۇلىك قاۋىپسىزدىگىنىڭ بارلىق تالاپتارىنا سايكەس­ءتى­گىندە. سوندىقتان دا وعان ىشكى جانە سىرتقى نارىقتاردا قاشان­دا سۇرانىس مول. كاسىپورىن ءوز جۇ­مىسىن العاش باستاعان كەزدە تەك ءبىر عانا سيىر ەتىن قالبىر­لاپ شىعارعان بولسا، بۇگىندە زاۋىتتاعى ءازىر ونىمدەردىڭ تۇرلەرى جۇزدەن اسىپ جىعىلادى. ءارى مۇن­داعى كونۆەيەردە ءبىر اۋى­سىمدا ءجۇز مىڭ دانا كونسەرۆى شىعا­رىلادى.

وسىدان ەكى جىل بۇرىن ورال قالاسىنداعى «كۋبلەي» ج ش س كومپانياسى پرەزيدەنتتىڭ «التىن ساپا» سىيلىعىنىڭ يەگەرى اتاندى. بۇعان قوسا ولار وزدەرى تەكتەس ارىپتەستەرى اراسىنان «حالىق تۇتىناتىن تاۋار شىعاراتىن ءۇز­دىك كاسىپورىن» اتالىمىن جەڭىپ الدى. وسى تۇرعىدا كومپانيا باسشىسى تالعات بەرەكەشيەۆ ءوز وي-پىكىرىن بىلايشا ساباقتادى.

– ءبىز ءوز ونىمدەرىمىزبەن حا­لىق­ارالىق كورمەلەرگە ءجيى قاتى­سىپ تۇرامىز. بيىلعى جازدا رە­سەيدىڭ ماسكەۋ قالاسىندا وتكىزىلگەن «پرودەكسپو-2015» XXII حا­لىقارالىق ازىق-تۇلىك كور­مەسىنە قاتىسىپ، ارنايى العىس­حاتپەن ماراپاتتالدىق. ارينە، باستى ماقسات – ماراپات الۋ ەمەس. اشىعىن ايتقاندا، مۇن­داي كورمەلەردىڭ جاڭا بايلانىس­تار ورناتۋعا، بىر-بىرىمىزدەن ءۇي­رەنۋگە جانە ءونىم وتكىزۋ كەڭىستىگىن كەڭەيتۋگە تيگىزەتىن پايداسى مول.

بۇگىندە «كۋبلەيدىڭ» كون­سەر­ۆىلەرى قازاقستاننىڭ بارلىق وڭىرلەرىنە جانە رەسەيدىڭ باتىس قازاقستانمەن شەكارالاس وبلىستارىنا، تۇرىكمەنستان مەن قىر­عىزستانعا تارالىپ وتىر. تاياۋدا مۇنداعى ءونىم وتكىزۋ اۋماعى ور، ماسكەۋ، ءنوۆوسىبىر جانە ۆولگوگراد قالالارىمەن تولىقتىرىلعان. «كۋبلەي» كومپانياسى قازىرگى كۇنى جەرگىلىكتى شيكىزاتتى پايدالانۋ كوزدەرىن ۇلعايتۋ ءۇشىن ورال قالاسىنىڭ ىرگەسىنەن ءىرى مال سويۋ كەشەنى قۇرى­لىسىن تۇرعىزۋ ۇستىندە. بۇل ءون­ءدىرىس ورنى الداعى جىلدىڭ باسىندا اياقتالادى دەپ كۇتىلۋدە. جاڭا كەشەن پايدالانۋعا بەرىلگەن كەزدە اۋىلشارۋاشىلىق ونىمدەرىن قال­دىقسىز وڭدەۋ تەحنولوگياسى ىسكە قوسىلماق. ياعني، بۇدان دا گورى تۇسىنىكتىرەك تىلمەن ايتقان­دا، مۇندا تەرى مەن سۇيەك-ساياق جانە مال سيراقتارى دا تەرەڭ تۇردە وڭدەلمەك.

قازىرگى تاڭدا «كۋبلەي» كون­ۆەيەرى مەن سەحتارىندا 400 ادام تۇراقتى جۇمىسقا تار­تىل­عان. كومپانيا باسشىسى، حالقى­مىز­دىڭ نامىس­تان جارا­تىلعان وتانشىل ازاماتتارىنىڭ ءبىرى تالعات بەرەكەشيەۆ ولاردىڭ بىردە-بىرى قىسقارتۋدىڭ قامىتىنا كيلىكپەيدى دەپ مالىمدەپ وتىر.

دەرەككوز: ەگەمەن قازاقستان