اق وردادا ءۇش ساعات بويى ۇكىمەت مۇشەلەرىمەن كەڭەيتىلگەن كەڭەس وتكىزگەن ەلباسى نۇرسۇلتان نازاربايەۆ مينيسترلەر كابينەتىنە ماڭىزدى مىندەتتەر ارتىلىپ وتىرعانىن ايتتى. بۇل تۋرالى «قامشى» پورتالى حابارلايدى.

جيىندا نەگىزگى اڭگىمەگە ەل ۇكىمەتىنىڭ ەكونوميكالىق داعدارىس جاعدايىنداعى جۇمىسى ارقاۋ بولدى.

«ارەكەت ەتەتىن، قىزىقتى ۋاقىت كەلدى. رەفورمالار ۋاقىتى، ەلدى، ەكونوميكانى جاڭا ساتىعا كوشىرەتىن وزگەرىستەر ۋاقىتى. سوندىقتان دا، سەندەردىڭ كوزدەرى وسى جۇمىس دەپ جانىپ تۇرۋى كەرەك. سەندەر ۇلكەن وزگەرىستەر جاسايىن دەپ تۇرسىڭدار. قاز بالاپاندارىنىڭ قاناتى شىققاندا يىقتارى اۋىرادى. مىنە، ءبىز وسىنداي ساتتە تۇرمىز. ءارى قاراي ۇشۋىمىز ءۇشىن وسى اۋىرتپالىققا شىداۋىمىز كەرەك» دەدى ەلباسى ۇكىمەت مۇشەلەرىنە قاراتا.

وسىلاردى ايتا كەلە، ەلباسى بۇگىندە بارلىق الەم باستان كەشىپ وتىرعان ەكونوميكالىق قيىندىقتارعا قاراماستان، قازاقستاندىقتاردىڭ جۇمىس ىستەۋگە قاجەتتى مۇمكىندىكتەرگە يە ەكەنىن، باستارىندا باسپانالارى، استىلارىندا كولىكتەرى، ۇستەلدەرىندە جەيتىن استارى بار ەكەنىن دە اتاپ ءوتتى. جاقىندا عانا قازاق حاندىعىنىڭ 550 جىلدىعىن اتاپ وتىلگەنى تۋرالى ءسوز ەتىپ وتىرىپ، مادەنيەت مينيسترىنەن: «بۇرىن قالاي ءومىر سۇردىك، ءقازىر قاندايمىز؟» دەپ سۇرادى. بۇل سۇراققا ارىستان مۇحامەدي ۇلى: «ءقازىر قازاقستاندىقتار باقىتتى شاقتا ءومىر سۇرۋدە» دەپ كەسىپ جاۋاپ بەردى.