ەلباسى ن. نازاربايەۆ ۇكىمەتتىڭ كەڭەيتىلگەن وتىرىسىندا «قازمۇنايگاز» ۇلتتىق كومپانياسىنىڭ باسشىسى ساۋات مىڭبايەۆتان جانار ماي باعاسىنىڭ ءوسۋ سەبەبىن ءتۇسىندىرۋدى سۇرادى. بۇل تۋرالى «قامشى» پورتالى حابارلايدى.

«قاراپايىم ادامدارعا نەگە بۇلاي ەكەنىن ءتۇسىندىرشى. مۇناي باعاسى ءۇش ەسە ءتۇستى، ال جانارماي بەكەتتەرىندە بەنزين باعاسى ءوسىپ بارادى. قاراپايىم شارۋاعا قاراپايىم تىلمەن ءتۇسىندىرشى» دەدى پرەزيدەنت. ساۋات مىڭبايەۆ مۇنى رەسەي مەن بەلورۋسيا شەكاراسىنىڭ اشىقتىعىمەن ءتۇسىندىردى. ونىڭ ايتۋىنشا، بۇل ەلدەردە بەنزين قىمباتتاۋ، سوندىقتان قازاقستان ولارمەن باعانى تەڭەستىرۋگە ءماجبۇر.

«بىزدە رەسەي مەن بەلورۋسيامەن ايىرماشىلىق بولۋى مۇمكىن ەمەس. ولاردا قانداي باعا بولسا، بىزدە سونداي، تەك كەي جەردە 5-7 پايىزعا ايىرماشىلىق بولۋى مۇمكىن. ءبىز بۇعان دەيىن باعانى ۇستاپ كەلدىك، كەيدە رەسەيدەن 40 پايىزعا تومەن بولدى. ناتيجەسىندە سولتۇستىك وبلىستاردىڭ بارلىعى بەنزيندى رەسەيگە تاسي باستادى»، -دەدى مىڭبايەۆ.

ول سونداي-اق بەنزين باعاسى از عانا ءوستى دەپ ەسەپتەيدى. «ءبىز باعانى از عانا كوتەردىك. ءقازىر 135، بۇعان دەيىن 110 بولعان»،-دەدى ول.

نازاربايەۆ پرەمەر-مينيستردىڭ ورىنباسارى باقىتجان ساعىنتايەۆقا بۇل ماسەلەنى ەۆرازيالىق وداق كوميسسياسىنىڭ وتىرىسىندا تالقىلاۋدى ۇسىندى. ال ساعىنتايەۆتىڭ ايتۋىنشا ەلىمىزدەگى مۇناي وڭدەۋ زاۋىتتارى كۇردەلى جوندەۋدەن وتكەن سوڭ، قازاقستان ىشكى سۇرانىسىن وتەپ قانا قويماي، كورشى ەلدەرگە دە ساتا الادى.

«بىزدە ميلليون توننا بەنزين دەفيسيت. كورشى ەلدەردە باعانىڭ قىمبات بولعاندىقتان ءبىز دە كوتەرۋگە ءماجبۇر بولدىق. قاجەتتى بەنزيندى ءوزىمىز وندىرە باستاعان كەزدە ولارعا تاۋەلدى بولمايمىز. مۇناي وڭدەۋشىلەر كۇردەلى جوندەۋ 2017 جىلى اياقتالادى دەپ وتىر. سول كەزدە بىزدەگى تاپشىلىق جويىلىپ، نارىقتى قامتاماسىز ەتە الامىز»،-دەدى ساعىنتايەۆ.

ەسكە سالايىق، قىركۇيەك ايىندا ۇكىمەت بەنزين باعاسىن رەتتەۋدەن باس تارتقان ەدى.