قازاقستان پرەزيدەنتى نۇرسۇلتان نازاربايەۆ بازارلارعا بارىپ، سورەلەردە قازاقستاندىق تاۋارلاردىڭ قانشالىقتى قويىلىپ وتىرعاندىعىن تەكسەرمەك. بۇل تۋرالى بۇگىن ەلباسى اقوردادا وتكەن ۇكىمەتتىڭ كەڭەيتىلگەن وتىرىسىندا ءمالىم ەتتى،- دەپ حابارلايدى «قامشى» پورتالى قازاقپاراتقا سىلەمە جاساپ.

«بىزدە ءوندىرىلىپ وتىرعان تاۋارلارعا باعانى وسىرۋگە قانداي نەگىز بار؟! بىزدە بىرنەشە يمپورتتىق پوزيسيالار عانا قالدى، كوپ ەمەس.  قانت جەتپەيتىن، الايدا بيىل الماتى، جامبىل وبلىستارى قانشاما قانت قىزىلشاسىن ءوندىردى. قانت ءوندىرىسى 25 پايىزعا ارتىپ، ونى سىرتتان تاسىمالداۋ تومەندەدى»، - دەپ توقتالدى ەلباسى.

وسى ورايدا ن. نازاربايەۆ ق ر اۋىل شارۋاشىلىعى ءمينيسترى اسىلجان مامىتبەكوۆكە قاراتىپ ايتقاندا ەلىمىزدەگى وڭدەۋ سالاسىن دامىتۋعا جەكە جاۋاپ بەرەتىندىگىن قاداپ ايتتى. «مەن ءوزىم بازارلارعا بارىپ، ءبىزدىڭ تاۋارلاردىڭ قالاي وزگەرگەنىن قارايتىن بولامىن. ءبىرىنشى قاجەتتىلىكتەگى تاۋارلاردى باقىلاپ وتىرىڭدار. ولاردىڭ باعاسى ارتپاۋى كەرەك»، - دەدى ەلباسى.

پرەزيدەنت الەۋمەتتىك ماڭىزى بار كوپتەگەن تاۋار تۇرلەرى بويىنشا باعانىڭ ءوسۋى بايقالىپ وتىرعانىن اتاپ ءوتتى. «وسىعان بايلانىستى ۇكىمەت پەن اكىمدەر ءبىرىنشى قاجەتتىلىكتەگى تاۋارلاردىڭ باعالارى بويىنشا مونيتورينگ جۇمىستارىن جانداندىرۋى كەرەك، اسىرەسە ازىق-تۇلىك تاۋارلارىنا قاتىستى. قاجەت بولعان جاعدايدا حالىقتىڭ از قورعالعان توپتارىنا اتاۋلى الەۋمەتتىك كومەك ارقىلى قولداۋدى قامتاماسىز ەتۋ كەرەك»، - دەدى پرەزيدەنت.