بۇگىن الماتى قالاسىنىڭ اكىمى باۋىرجان بايبەك قالاداعى بيزنەس قاۋىمداستىق وكىلدەرىمەن كەزدەستى. جيىن بارىسىندا قالانىڭ 2016-2020 جىلدارعا ارنالعان دامۋ باعدارلاماسى تالقىلاندى. بۇل تۋرالى «قامشى» پورتالى قازاقپاراتقا سىلتەمە جاساپ حابارلايدى.

«ەكونوميكانىڭ ەڭ ماڭىزدى بولىگى  شوب وكىلدەرى. جاڭا باعدارلامانى سىزدەرمەن تالقىلاۋعا بەل بۋدىق. 100 ناقتى قادامدى شوب سۋبەكتىلەرىنسىز جۇزەگە اسىرۋ مۇمكىن ەمەس. وسى ۋاقىت ارالىعىندا 60 ماڭىزدى زاڭ قابىلداندى. بيزنەستى جۇرگىزۋ، الەۋمەتتىك ستاندارتتار، شارتتاردى جۇزەگە  اسىرۋ ءۇشىن اسا ماڭىزدى زاڭنامالىق قۇجاتتار قابىلداندى. تاۋەلسىزدىكتىڭ العاشقى جىلدارىندا جان باسىنا شاققانداعى ءجىو 600 اقش دوللارى ەدى، ءقازىر الماتىلىقتاردىڭ جان باسىنا شاققانداعى ءجاو 29 مىڭ اقش دوللارى بولىپ وتىر. بۇل كورسەتكىش 20 جىلدا 17 ەسە وسكەن»، - دەدى ب.بايبەك.

ونىڭ ايتۋىنشا، الەمدەگى كۇردەلى ەكونوميكالىق جاعداي الماتىعا اسەرىن تيگىزبەي قويمايدى.

«كەلەر جىلى قالا بيۋدجەتى 20 پايىزعا قىسقارۋى عاجاپ ەمەس. سونداي-اق، سالىقتىق بازا ازايۋى مۇمكىن. ىسكەرلىك بەلسەندىلىك تۇسەدى دەگەن بولجام بار. ءبىراق، ءبىز دامۋ باعدارلاماسىن جۇزەگە اسىرۋعا قاجەتتى رەسۋرستاردىڭ بارلىعى بار ەكەندىگىنە ابدەن كوز جەتكىزدىك»، - دەدى ول.

قالا اكىمى الماتىنىڭ سيمۆولى بولعان الما باقتارىن قايتا قالپىنا كەلتىرۋدى ۇسىندى.

«بۇرىنعى الماتى ەستەرىڭىزدە مە؟ مولدىرەگەن ارىقتار. ءيىسى اڭقىعان المالار. ءقازىر قالا ماڭىنداعى تاۋ بوكتەرلەرىنىڭ ءبارى جەكە قولعا ءوتىپ كەتكەن. ءبىراق، اينالىسام دەگەن بيزنەسمەن بولسا، ءبىز ولاردى تاۋىپ، جەر بولۋگە تىرىسامىز»، - دەدى قالا اكىمى.

ايتا كەتۋ كەرەك، قالا دامۋىنىڭ 2016-2020 جىلدارعا ارنالعان باعدارلاماسىن جاساۋعا «مcKinsey&Company» كومپانياسىنىڭ ساراپشىلارى تارتىلدى.

باعدارلاما جوباسى almaty.gov.kz سايتىندا جاريالانعان. قالا تۇرعىندارى كەلەسى ايعا دەيىن ۇسىنىستارىن almaty2020@a-a.kz ەلەكتروندى مەكەنجايىنا جىبەرە الادى.

 «الماتى-2020» باعدارلاماسىندا دامۋدىڭ 7 نەگىزگى باعىتى قاراستىرىلعان: جايلى قالا، ءقاۋىپسىز قالا، الەۋمەتتىك قالا، ەكونوميكالىق تۇراقتى قالا، جەكە كاپيتال مەن بيزنەسكە جايلى قالا، بەلسەندى ازاماتتار قالاسى، بەيىمدەلگەن قالا.