زەينەت جاسىنىڭ نەلىكتەن ۇزارتىلعانىن حالىققا دۇرىستاپ ءتۇسىندىرۋ قاجەت. بۇل تۋرالى بۇگىن اقوردادا وتكەن ۇكىمەتتىڭ كەڭەيتىلگەن وتىرىسىندا نۇرسۇلتان نازاربايەۆ ايتتى. بۇل تۋرالى «قامشى» پورتالى قازاقپاراتقا سىلتەمە جاساپ حابارلايدى.
«زەينەت جاسىن كوتەرۋ جاي انشەيىن دەپ ويلايسىزدار ما؟ قاراپايىم ادام ءۇشىن – بۇل اۋىرتپالىق. ءبىراق، وعان سەنىڭ بالالارىڭ 15 جىلدان كەيىن زەينەتاقى الا المايدى دەسەڭ، ول مۇنى تۇسىنبەيدى. وعان بىزدە ءومىر ءسۇرۋ ۇزاقتىعى كوز الدىمىزدا نەبارى 10 جىلدىڭ ىشىندە 64-تەن 72 جاسقا وسكەنىن ءتۇسىندىرۋ قاجەت. بىردە-بىر مەملەكەت ءدال وسىنداي ۋاقىت ىشىندە مۇنداي ءومىر ۇزاقتىعىنا قول جەتكىزگەن جوق»، – دەدى پرەزيدەنت.
ەلباسىنىڭ اتاپ وتۋىنشە، بۇگىنگى تاڭدا ەلىمىزدە دە، الەمدە دە قارتتار سانى ارتىپ، سول سەبەپتى جۇمىسشىلاردىڭ سانى، سوعان سايكەس زەينەتاقى اۋدارىمدارىنىڭ كولەمى كەمۋدە.
«ەگەر ءبىز جاستى ۇلعايتپاساق، وندا زەينەتاقىعا دا اقشا بولمايدى. مەنىڭشە، بۇل بارلىعىنا دا تۇسىنىكتى. ياعني، مەملەكەت ادامداردىڭ بۇگىنگى كۇنى عانا ەمەس، الداعى ءومىرى دە جاقسى بولۋى ءۇشىن الدىن الۋ شارالار قابىلداۋى كەرەك. بۇل رەتتە ازاماتتاردىڭ بارىنشا زارداپ شەكپەۋىن نازارعا العان ءجون»، – دەدى مەملەكەت باسشىسى.
