ۇكىمەت ەلباسىنىڭ كۇتىلەتىن جولداۋى اياسىندا بيۋدجەتكە جىل سوڭىنا دەيىن تاعى وزگەرىستەر ەنگىزۋى مۇمكىن. بۇگىن ماجىلىستە «2016 - 2018 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىن ماقۇلدانعاننان كەيىن، ق ر پرەمەر-مينيسترترى كارىم ءماسىموۆ وسىلاي مالىمدەدى. بۇل تۋرالى «قامشى» پورتالى قازاقپاراتقا سىلتەمە جاساي وتىرىپ حابارلايدى.

جيىن بارىسىندا دەپۋتاتتىق كورپۋسقا بيۋدجەت جوباسىنا قولداۋ بىلدىرگەندەرى ءۇشىن العىسىن ايتقان ۇكىمەت باسشىسى، بۇل ەلىمىزدىڭ ەكونوميكالىق ساياساتىن جۇزەگە اسىرۋعا اسا قاجەتتى ءارى ماڭىزدى قۇجات ەكەنىن اتاپ ءوتتى. 

«ەلباسى ۇكىمەتتىڭ بۇگىنگى كەڭەيتىلگەن وتىرىسىندا ناقتى تاپسىرمالار بەردى. سونىمەن قاتار، پرەزيدەنت الداعى ۋاقىتتا بۇدان دا ناقتى قادامدار ۇكىمەتكە جۇكتەلەتىنىن ايتتى. ونداي مىندەتتەر ەلباسىنىڭ جولداۋىندا قامتىلادى، ال ول جولداۋ 2015 جىلدىڭ اياعىنا دەيىن جاريالانادى. وسىعان بايلانىستى، دەپۋتاتتارعا الدىن الا ءوتىنىش ايتقىم كەلەدى، ويتكەنى، ءبىز الداعى ۋاقىتتا ەلباسىنىڭ جولداۋى اياسىندا جۇكتەلەتىن مىندەتتەرگە سايكەس، بيۋدجەتكە ءبىرقاتار تۇزەتۋلەر ەنگىزۋىمىز دە مۇمكىن. ونداي بولىپ جاتسا، ءبىز پارلامەنتكە تاعى دا بيۋدجەت بويىنشا وزگەرىستەر مەن تولىقتىرۋلار جاساپ كەلەتىن بولامىز»،-  دەدى ك. ءماسىموۆ.