بۇگىن پرەمەر-مينيستر كارىم ءماسىموۆتىڭ جەتەكشىلىگىمەن ءوتىپ جاتقان ۇكىمەت وتىرىسىندا «نۇرلى جول» مەملەكەتتىك ينفراقۇرىلىمدى دامىتۋ باعدارلاماسىنىڭ جۇزەگە اسىرۋ بارىسى تالقىلاندى. ول بويىنشا بايانداما جاساعان ۇلتتىق ەكونوميكا ءمينيسترى ەربولات دوسايەۆ باعدارلاما بارىسىنداعى ءبىرقاتار پروبلەمالاردى اتاپ ءوتتى. بۇل تۋرالى «قامشى» پورتالى قازاقپاراتقا سىلتەمە جاساپ حابارلايدى.

ءمينيستردىڭ ايتۋىنشا، «نۇرلى جول» باعدارلاماسىنىڭ «تۇرعىن ءۇي كوممۋنالدىق شارۋاشىلىق سالاسىن جاڭعىرتۋ» باعىتى بويىنشا 96 وڭىرلىك جوبالار جوسپارلانىپ، اكىمدىكتەرگە 60 ملرد. تەڭگە بولىنگەن.  «2015-2016 جىل بويىنشا جالپى 258،8 شاقىرىم جىلۋ جانە سۋمەن قامتۋ جەلىلەرىن، سۋ ءبولۋ جۇمىستارىن اتقارۋ جوسپارلانعان. جىل سوڭىنا دەيىن 51،4 شاقىرىمعا دەيىن جەلىلەردى سالۋ مەن قۇرىلىسىن جاڭعىرتۋ كوزدەلەدى. قالعان  57،4 شاقىرىم 2016 جىلى اتقارىلادى. باعدارلامانى جۇزەگە اسىرۋ بارىسىندا ءبىرقاتار پروربلەمالار انىقتالدى. بىرىنشىدەن، بيۋدجەتتى يگەرۋ ءماز ەمەس. ماسەلەن، اقمولا (57%)، پاۆلودار (66%)، قوستاناي (40%) وبلىستارى مەن الماتى (43%) جانە استانا (13%) قالالارىندا بۇل كورسەتكىش تومەن. بۇل نەگىزىنەن كونكۋرستىق ۇدەرىستەردى وتكىزۋ مەرزىمىنىڭ كەشىگۋىمەن بايلانىستى»، دەپ اتاپ ءوتتى مينيستر دوسايەۆ. 

بۇدان بولەك، مينيستر باعدارلامانى جۇزەگە اسىرۋ بارىسىنداعى جوسپارلاۋدىڭ تيىمسىزدىگىن دە اتاپ ءوتتى. ماسەلەن، قاراعاندى وبلىسى مەن الماتى قالاسىندا جوبالار جوبالىق-سمەتالىق قۇجاتتاردىڭ جوقتىعىنا بايلانىستى كەيىنگە شەگەرىلگەن. سونىڭ سالدارىنان بيۋدجەتتى قايتا قاراۋ بارىسىندا 3،5 ملرد. تەڭگە قايتا ءبولىندى. «ۇشىنشىدەن، قۇرىلىس-مونتاجداۋ جۇمىسىنىڭ ساپاسى دا سىن كوتەرمەيدى. اتاپ ايتقاندا، قۇرىلىس نورمالارى مەن ەرەجەلەرىنەن اۋىتقۋشىلىق الماتى، شىعىس قازاقستان، باتىس قازاقستان، قىزىلوردا، پاۆلودار، سولتۇستىك قازاقستان جانە وڭتۇستىك قازاقستان وبلىستارىندا بايقالدى. سونىمەن بىرگە، بولىنگەن قاراجاتتىڭ تولىق يگەرىلۋى ءۇشىن وبلىس اكىمدەرىنە كەلەر جىلى كونكۋرستىق ۇدەرىستەردى ۋاقىتىلى وتكىزۋ تۋرالى تاپسىرما بەرۋىڭىزدى سۇرايمىن»، - دەدى ە. دوسايەۆ.