ءالدي-انا

كىرپىك ىلمەي جاتىرسىڭ نەگە، اناشىم؟..
قاراڭعى ءتۇن. ۇيقىسىز سەن عاناسىڭ. 
"جاس تەرەكتى" نەسىنە ۋايىمدادىڭ، 
جەل سوعادى، ايتەۋىر جەل بولعاسىن.

جۇلدىز بىتكەن جۇتىلىپ جانارىڭا، 
مەيىرىمگە تۇنشىقتى-اۋ عالام مىنا.
جەر دەگەنىڭ - پەندەگە بولسا مەكەن، 
اسپاندى اكەپ قويامىن تابانىڭا!

تاۋسىلماشى... ەمەس بۇل جاناشۋىم -
انالاردىڭ قاشان دا باعاسى ۇلى!
سەنىڭ كوزىڭ - قۇدايعا سىيىناتىن، 
ون سەگىز مىڭ عالامنىڭ قاراشىعى. 

كىرپىك ىلمەي جاتىرسىڭ نەگە، اناشىم؟..
قاراڭعى ءتۇن. ۇيقىسىز سەن عاناسىڭ. 
"جاس تەرەكتى" نەسىنە ۋايىمدادىڭ، 
سەل جۇرەدى، ايتەۋىر سەل بولعاسىن.

ال، مىنا ءتۇن - وزگەرمەس بايىرعى ءتۇن، 
قايىرسىز كىم، بىلمەيمىن قايىرلى كىم...
ۇيىقتاشى، اناشىم، الاڭداماي، 
ۇيىقتاڭدار، انالار، قايىرلى ءتۇن! 

ءالدي، انا...

    كۇلىكتىڭ كوز جاسى

                                           «جۇرەگىم جىلقىداي جىلايدى...»

                                                                             ب.قاراعىز ۇلى

كۇرەڭ بەلدە كىسىنەسە ءبىر قۇلىن،

بەيمازا بوپ وتەتىندەي بۇل ءتۇنىم.

جاس تامعانىن كورىپ پە ەدىڭ، قالقاتاي،

جانارىنان جىلقىنىڭ؟

كورسەڭ ەتتى، كورسەڭ ەتتى مۇنى دا،

جانۋاردىڭ قانىق بولىپ مۇڭىنا.

مەن سياقتى بالاۋدى دا قويۋشى ەڭ،

كەي ادامدى ۇلىعا!

تەرىن الىپ، سايىن دالا توسىندە،

مەن تايىممەن شابۋشى ەدىم كوسىلە.

سولاي جورتىپ كەلە جاتقان ساتتە ءبىر،

سۇرىنگەنى ەسىمدە.

وت تۇياعى ورعا كىرىپ كەتكەننەن،

ءبىر اياعى سىنعاندىعىن ءدوپ كورگەم.

(كەيدە وسىلاي سۇرىنەدى كىسى دە،

ءوتۋ ءۇشىن وتكەلدەن).

كۇرەڭىمە كورىنگەندەي اسقار جات،

جاتىر ەكەن كوزدەرىنەن جاس پارلاپ.

بولدى سوندا بار نازارى اتتىڭ تەك،

اق بۇلت جۇزگەن اسپان جاق.

...كەل، جارقىنىم، ۇركيدى دەپ قاشپاعىن،

ونىڭ مۇڭى – سەن كورگەننەن باسقا مۇڭ.

كۇلىك سىندى جىلاعاندا سەزەسىڭ،

جۇرەگىڭدە تاس بارىن.

اتتەڭ، اتتەڭ، جوق بولعان سوڭ مۇڭداسى،

جىلقى جۇرەك كۇرسىنەدى، تىڭداشى.

عۇمىر بويى پەندە توككەن مونشاقتار –

سايگۇلىكتىڭ ءبىر جاسى...

       قايىرشى

توقتاماي ءبىر جان وتە مە؟
قالانىڭ دەمى - تىم سۋىق.
ول نەگە جاتىر كوشەدە، 
ول نەگە جاتىر كۇرسىنىپ؟..

قايعىدان تاس بوپ قالساڭ دا، 
تۇرساڭشى ەندى، بايعۇسىم.
بىرەۋگە كۇلكى بولساڭ دا، 
مەن ءۇشىن اۋىر قايعىسىڭ. 

ءجىبىتىپ كوڭىل توڭىڭدى، 
قايعىڭدى كۇندەي ەرىتكەن،
اللاعا جايار قولىڭدى، 
ادامعا جايدىڭ نەلىكتەن؟!

سىناققا كەلەر دايىن كىم، 
ولشەۋلى مىناۋ بەس كۇندە. 
شاراناسىندا ۋايىمنىڭ، 
شاراسىز قالعىپ كەتتىڭ بە؟ 

ءۇمىتتىڭ وتىن جاعا الماي، 
مۇڭ تولدى كوڭىل-كەسەمە.
ءبارىمىز - باقىت تابا الماي، 
قاڭعىعان جانبىز كوشەدە...

                        قار

قار جاۋىپ تۇر... قالقام، سەن كەلشى بەرى، 
بىزدىك سەزىم - جۇرەكتىڭ ەلشىلەرى. 
قوس ەرىنى تۇيىسكەن ەكەۋمىزگە، 
اقىن-اسپان جىر وقىپ بەرسىن ەندى. 

ايىپتاسىن، بىرەۋلەر كىنالاسىن، 
كوكىرەگىمدە ونسىز دا كۇنا باسىم.
قۇشاعىندا مۇز-قاردى بالقىتقان، جەر، 
سەزىمىمدى سەن عانا ۇعا الاسىڭ. 

قىز الدىندا دارمەنسىز ەكەنىمدى، 
كورسەتەدى مىنا ءتۇن بەكەر ۇلگى. 
جالعىز قالسام، كەشىرمەس جالقى قۇداي، 
ەكى دۇنيە كەشىرەر ەكى ەرىندى...

عارشى يەسى جاراتقان ەكەۋ قىلىپ، 
عاشىقتاردىڭ قاشاندا جەتەگى ءۇمىت.
قار اسپاننان قۇلديلاپ تۇسكەن سايىن، 
ءبىز اسپانعا بارامىز كوتەرىلىپ. 

قار جاۋىپ تۇر...

ءبىرجان ەرمەك ۇلى احمەر

شاكارىم اتىنداعى سەمەي مەملەكەتتىك ۋنيۆەرسيتەتىنىڭ 3-كۋرس ستۋدەنتى، قادىر مىرزا الىگە ارنالعان رەسپۋبليكالىق «ولمەس ولەڭ» اتتى ءجىر-مۇشايراسىنىڭ 1-ورىن يەگەرى، قازاق حاندىعىنىڭ 550 جىلدىعىنا وراي ۇيىمداستىرىلعان «ماڭگىلىك ەل – تاعدىرىم» اتتى رەسپۋبليكالىق ءجىر-مۇشايراسىنىڭ 1-ورىن يەگەرى.